ଅଯୋଧ୍ୟା ବିମାନବନ୍ଦରର ନାମ ‘ମହର୍ଷି ବାଲ୍ମିକୀ ଅନ୍ତର୍ଜାତୀୟ ବିମାନବନ୍ଦର, ଅଯୋଧ୍ୟାଧାମ’ ରଖିବାକୁ କେନ୍ଦ୍ର କ୍ୟାବିନେଟର ମଞ୍ଜୁରି

ନୂଆଦିଲ୍ଲୀ: ଅଯୋଧ୍ୟା ବିମାନବନ୍ଦରକୁ ‘ମହର୍ଷି ବାଲ୍ମିକୀ ଅନ୍ତର୍ଜାତୀୟ ବିମାନବନ୍ଦର, ଅଯୋଧ୍ୟାଧାମ’ ନାମରେ ନାମିତ କରିବା ପ୍ରସ୍ତାବକୁ କେନ୍ଦ୍ର କ୍ୟାବିନେଟ୍ ଶୁକ୍ରବାର ମଞ୍ଜୁରି ପ୍ରଦାନ କରିଛି। ଏହାଛଡ଼ା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ବିମାନବନ୍ଦରକୁ ଅନ୍ତର୍ଜାତୀୟ ବିମାନବନ୍ଦର ଭାବରେ ଘୋଷଣା କରିବାକୁ ମଧ୍ୟ ନିଷ୍ପତ୍ତି ନିଆଯାଇଛି। ଡିସେମ୍ବର ୩୦ରେ ପ୍ରଧାନମନ୍ତ୍ରୀ ମୋଦୀ ଅଯୋଧ୍ୟା ବିମାନବନ୍ଦରର ଉଦଘାଟନ କରିଥିଲେ।

ଏକ ଆନୁଷ୍ଠାନିକ ବିଜ୍ଞପ୍ତିରେ କୁହାଯାଇଛି, ବିମାନବନ୍ଦରର ନାମକରଣ ‘ମହର୍ଷି ବାଲ୍ମିକୀ ଅନ୍ତର୍ଜାତୀୟ ବିମାନବନ୍ଦର, ଅଯୋଧ୍ୟାଧାମ’ କରିବା ରାମାୟଣ ମହାକାବ୍ୟର ରଚୟିତା ମହର୍ଷି ବାଲ୍ମିକୀଙ୍କ ପ୍ରତି ଏକ ଶ୍ରଦ୍ଧାଞ୍ଜଳି । ଏହି ନାମ ବିମାନବନ୍ଦରର ପରିଚୟରେ ଏକ ସାଂସ୍କୃତିକ ଭାବନା ମଧ୍ୟ ଯୋଡିଛି |

ବିଜ୍ଞପ୍ତିରେ କୁହାଯାଇଛି, ଅଯୋଧ୍ୟାର ଅର୍ଥନୈତିକ ସାମର୍ଥ୍ୟ ଏବଂ ବିଶ୍ୱସ୍ତରୀୟ ତୀର୍ଥସ୍ଥଳ ଭାବେ ଏହାର ମହତ୍ତ୍ୱକୁ ଅନୁଭବ କରିବା ଏବଂ ବିଦେଶୀ ତୀର୍ଥଯାତ୍ରୀ ଏବଂ ପର୍ଯ୍ୟଟକଙ୍କ ପାଇଁ ଦ୍ବାର ଖୋଲିବା ପାଇଁ ଅଯୋଧ୍ୟା ବିମାନବନ୍ଦରକୁ ଆନ୍ତର୍ଜାତୀୟ ମାନ୍ୟତା ଦେବା ବେଶ୍ ଗୁରୁତ୍ୱପୂର୍ଣ୍ଣ | ଅଯୋଧ୍ୟା ନିଜର ଗଭୀର ସାଂସ୍କୃତିକ ମୌଳିକତା ସହିତ ରଣନୀତିକ ଭାବେ ଏକ ପ୍ରମୁଖ ଅର୍ଥନୈତିକ ପେଣ୍ଠସ୍ଥଳୀ ଏବଂ ତୀର୍ଥସ୍ଥଳୀ ହେବାକୁ ପ୍ରସ୍ତୁତ ହେଉଛି।