ଭୁବନେଶ୍ୱର – ଓଡ଼ିଶାରେ ଆଜି ଜମିବ ନିର୍ବାଚନ ପ୍ରଚାର। ହାଇଭୋଲଟେଜ କ୍ୟାମ୍ପେନ ପାଇଁ ଆଜି ଓଡ଼ିଶା ଆସୁଛନ୍ତି ବିଜେପି ଓ କଂଗ୍ରେସର ଟାଣୁଆ ନେତା । ବିଜେପି ରାଷ୍ଟ୍ରୀୟ ସଭାପତି ଜେ.ପି. ନଡ୍ଡା, କେନ୍ଦ୍ର ଗୃହ ମନ୍ତ୍ରୀ ଅମିତ ଶାହା ଏବଂ କଂଗ୍ରେସ ନେତା ରାହୁଲ ଗାନ୍ଧି ଆଜି ଓଡ଼ିଶା ଆସୁଛନ୍ତି। କେନ୍ଦ୍ର ଗୃହ ମନ୍ତ୍ରୀ ଅମିତ ଶାହା ଆସ୍କା ସଂଦୀୟ କ୍ଷେତ୍ରର ସୋରଡାରେ ବିଜେପିର ବିଜୟ ସଂକଳ୍ପ ସମାବେଶରେ ଯୋଗ ଦେବେ। ଏହା ପରେ ସନ୍ଧ୍ୟା ୫ଟାରେ କଟକରେ ରୋଡ-ଶୋ କରିବେ ଅମିତ ଶାହା । ବିଜେପି ସଭାପତି ଜେ.ପି ନଡ୍ଡା ଆଜି ଭୁବନେଶ୍ୱରରେ ଦଳୀୟ କର୍ମଶାଳାରେ ଯୋଗଦେବେ। ନଡ୍ଡା ଆସନ୍ତାକାଲି ବରଗଡ ଜିଲା ପଦ୍ମପୁର ଏବଂ ସୁନ୍ଦରରଗଡଠାରେ ବିଜୟ ସଂକଳ୍ପ ସମାବେଶରେ ଯୋଗ ଦେବେ।
କଂଗ୍ରେସ ନେତା ରାହୁଲ ଗାନ୍ଧି ଆଜି ଓଡ଼ିଶା ଗସ୍ତରେ ଆସି ବଲାଙ୍ଗିର ଜିଲାରେ ବାଇକ ରାଲି କରିବା ସହିତ ଜନସାଧାରଣଙ୍କୁ ସମ୍ବୋଧିତ କରିବାର କାର୍ଯ୍ୟକ୍ରମ ରହିଛି। ଦ୍ବିତୀୟ ପର୍ଯ୍ୟାୟ ନିର୍ବାଚନ ପ୍ରଚାର ପାଇଁ ରାହୁଲ କଂଗ୍ରେସ ସାଂସଦ ଓ ବିଧାନସଭା ପ୍ରାର୍ଥୀଙ୍କ ପାଇଁ ଭୋଟ ମାଗିବେ। ରାହୁଲ ବିମାନରେ ଦିଲ୍ଲୀରୁ ସିଧା ଝାରସୁଗୁଡା ବିମାନ ବନ୍ଦରରେ ପହଞ୍ଚି ସେଠାରୁ ହେଲିକପ୍ଟର ଯୋଗେ ବଲାଙ୍ଗିର ଯାଇ ପୂର୍ବାହ୍ନ ସାଢେ ୧୧ଟାରେ ଜନସଭାକୁ ସମ୍ବୋଧିତ କରିବା କାର୍ଯ୍ୟକ୍ରମ ରହିଛି। ରାହୁଲଙ୍କ ଗସ୍ତକୁ ନେଇ ଓଡ଼ିଶା ପ୍ରଦେଶ କଂଗ୍ରେସ କମିଟି ପକ୍ଷରୁ ସମସ୍ତ ପ୍ରକାର ପ୍ରସ୍ତୁତି ସରିଛି। ସୂଚନାଯୋଗ୍ୟ, ରାହୁଲ ଏପ୍ରିଲ ୨୮ରେ ସାଲେପୁର ଆସି ନିର୍ବାଚନ ପ୍ରଚାର କରିଥିଲେ। ମେ’ ୩ରେ ମଧ୍ୟ ସେ ରାୟଗଡ଼ା ଆସିବାର ଥିଲା ।କିନ୍ତୁ ରାଏବରେଲିରେ ରାହୁଲ ନାମାଙ୍କନପତ୍ର ଭରିବାରୁ ତାଙ୍କ ଗସ୍ତ କାର୍ଯ୍ୟକ୍ରମକୁ ସ୍ଥଗିତ ରଖାଯାଇଥିଲା।
Comments are closed.