ରାହୁଲ ଗାନ୍ଧୀଙ୍କ ନାଁରେ ନିଜର ସବୁ ସମ୍ପତ୍ତି କରିଦେଲେ ବୃଦ୍ଧା

ଦେହରାଡୁନ୍: ଉତ୍ତରାଖଣ୍ଡ ଦେହରାଡୁନର ଜଣେ ବୃଦ୍ଧା କଂଗ୍ରେସ ନେତା ରାହୁଲ ଗାନ୍ଧୀଙ୍କ ନାଁରେ ନିଜର ସମସ୍ତ ସମ୍ପତ୍ତି କରି ଦେଇଛନ୍ତି । ଏଠାରେ ଏକ କୋର୍ଟରେ ଦାଖଲ କରିଥିବା ଇଚ୍ଛାପତ୍ରରେ ୮୦ ବର୍ଷୀୟା ପୁଷ୍ପା ମୁଞ୍ଜିଆଲ ତାଙ୍କ ସମ୍ପତ୍ତିର ସମ୍ପୂର୍ଣ୍ଣ ବିବରଣୀ ପ୍ରଦାନ କରି ତାଙ୍କ ସମ୍ପତ୍ତିର ମାଲିକାନା ତାଙ୍କ ପରେ ରାହୁଲ ଗାନ୍ଧୀଙ୍କୁ ହସ୍ତାନ୍ତର କରିବାକୁ କୋର୍ଟଙ୍କୁ ଅନୁରୋଧ କରିଛନ୍ତି। ଦେହରାଡୁନ୍ ମହାନଗର ନିଗମର ସଭାପତି ଲାଲଚାନ୍ଦ ଶର୍ମା କହିଛନ୍ତି ଯେ ପରେ ମୁଞ୍ଜିଆଲ ଯମୁନା କଲୋନୀରେ ଥିବା ତାଙ୍କ ବାସଭବନରେ ପୂର୍ବତନ ରାଜ୍ୟ କଂଗ୍ରେସ ସଭାପତି ପ୍ରୀତମ ସିଂହଙ୍କୁ ସମ୍ପତ୍ତିର ଇଚ୍ଛାପତ୍ର ହସ୍ତାନ୍ତର କରିଛନ୍ତି।

ଏକ ସରକାରୀ ବିଦ୍ୟାଳୟର ପ୍ରାକ୍ତନ ଶିକ୍ଷୟତ୍ରୀ ମୁଞ୍ଜିଆଲ କହିଛନ୍ତି ଯେ ରାହୁଲ ଗାନ୍ଧୀଙ୍କ ବିଚାରଧାରା ଦ୍ଵାରା ସେ ବେଶ୍ ପ୍ରଭାବିତ। ଏଥିପାଇଁ ରାହୁଲଙ୍କୁ ସେ ତାଙ୍କ ସବୁ ସମ୍ପତ୍ତିର ମାଲିକାନା ହସ୍ତାନ୍ତର କରିବାକୁ ନିଷ୍ପତ୍ତି ନେଇଛନ୍ତି । ମୁଞ୍ଜିଆଲ କହିଛନ୍ତି ଯେ ଦେଶର ସ୍ବାଧୀନତା ପରଠାରୁ ଆଜି ପର୍ଯ୍ୟନ୍ତ ଗାନ୍ଧୀ ପରିବାର ସର୍ବଦା ଆଗକୁ ବଢ଼ିଛି ଏବଂ ଦେଶ ପାଇଁ ସର୍ବୋଚ୍ଚ ବଳିଦାନ ଦେଇଛନ୍ତି।

ସେ କହିଛନ୍ତି ଯେ ଇନ୍ଦିରା ଗାନ୍ଧୀ ହେଉ ବା ରାଜୀବ ଗାନ୍ଧୀ, ଦେଶର ଏକତା ତଥା ଅଖଣ୍ଡତା ପାଇଁ ନିଜ ଜୀବନକୁ ଉତ୍ସର୍ଗ କରିଛନ୍ତି । ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀ ଦେଶର ସେବା ପାଇଁ ନିଜକୁ ଉତ୍ସର୍ଗ କରିଛନ୍ତି। ବୃଦ୍ଧ ମହିଳା ଏହା ମଧ୍ୟ କହିଛନ୍ତି ଯେ ଦେଶର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କ ସହ ତାଙ୍କ ପିତାଙ୍କର ଘନିଷ୍ଠ ସମ୍ପର୍କ ଥିଲା। ଅବିବାହିତ ଥିବା ମୁଞ୍ଜିଆଲ ସମ୍ପ୍ରତି ଦେହରାଡୁନର ପ୍ରେମଧାମ ଜରାଶ୍ରମରେ ରହୁଛନ୍ତି।