ମିଜୋରାମରେ ମଣିପୁର ହିଂସାର ପ୍ରଭାବ, ଧମକ ପରେ ମୈତେଇ ସମ୍ପ୍ରଦାୟର ଲୋକଙ୍କ ପଳାୟନ

ଗୁଆହାଟି: ମଣିପୁରରେ ହିଂସାର ପ୍ରଭାବ ଏବେ ପଡ଼ୋଶୀ ରାଜ୍ୟ ମିଜୋରାମରେ ବି ଦେଖିବାକୁ ମିଳିଛି। ମଣିପୁରରେ ଦୁଇ ଜଣ ମହିଳାଙ୍କୁ ଉଲଗ୍ନ କରି ବୁଲାଇବା ଭାଇରାଲ ଭିଡିଓ ପରେ ମିଜୋରାମର ମୈତେଇ ସମ୍ପ୍ରଦାୟକୁ ରାଜ୍ୟ ଛାଡ଼ି ଚାଲିଯିବାକୁ ଧମକ ମିଳୁଛି । ଭୟରେ ମୈତେଇ ସମ୍ପ୍ରଦାୟର ୪୧ ଜଣ ଲୋକ ମିଜୋରାମ ଛାଡ଼ି ଆସାମରେ ପହଞ୍ଚିଛନ୍ତି। ମିଜୋରାମର ଏକ ଉଗ୍ରବାଦୀ ଗୋଷ୍ଠୀ ମୈତେଇ ସମ୍ପ୍ରଦାୟକୁ ରାଜ୍ୟ ଛାଡିବାକୁ ଚେତାବନୀ ଦେଇଛି ।

କଛାର ପୋଲିସ ଏସପି ନମଲ ମହାତ୍ମା କହିଛନ୍ତି ଯେ ଏହି ଲୋକମାନେ ଶନିବାର ରାତିରେ ପଡୋଶୀ ମିଜୋରାମରୁ ସିଲଚରରେ ପହଞ୍ଚିଛନ୍ତି । ପରେ ସେମାନେ ବିନାନାଣ୍ଡି ଅଞ୍ଚଳରେ ଲାଖୀପୁର ବିକାଶ ବ୍ଲକ ଭବନରେ ରହିଥିଲେ।

ସେ କହିଛନ୍ତି ଯେ ମିଜୋରାମରୁ ଆସିଥିବା ଏହି ସବୁ ପରିବାର ଆର୍ଥିକ ସ୍ୱଚ୍ଛଳ ବର୍ଗର ଅଟନ୍ତି । ସେମାନେ ନିଜ ନିଜ ଗାଡିରେ ଆସିଛନ୍ତି। କେତେକ କଲେଜ ପ୍ରଫେସର ହୋଇଥିବାବେଳେ କେତେକ ବରିଷ୍ଠ ସରକାରୀ କର୍ମଚାରୀ ଭାବରେ କାର୍ଯ୍ୟ କରନ୍ତି। ସେ କହିଛନ୍ତି ଯେ ଏପର୍ଯ୍ୟନ୍ତ ମିଜୋରାମରେ ମୈତେଇଙ୍କ ଉପରେ କୌଣସି ଆକ୍ରମଣ ଘଟଣା ଘଟିନାହିଁ ।

ମିଜୋରାମ ସରକାର ମୈତେଇ ସମ୍ପ୍ରଦାୟକୁ ସମସ୍ତ ପ୍ରକାର ସୁରକ୍ଷା ଯୋଗାଇବାକୁ ଆଶ୍ବାସନା ଦେଇଛନ୍ତି । କିନ୍ତୁ ସେମାନେ କୌଣସି ରିସ୍କ ନେବାକୁ ଚାହୁଁନାହାଁନ୍ତି ଏବଂ ନିଜ ସୁରକ୍ଷା ପାଇଁ ଆସାମ ଚାଲି ଆସିଛନ୍ତି। ସେ କହିଛନ୍ତି ଯେ ପରିସ୍ଥିତି ସ୍ୱାଭାବିକ ନହେବା ପର୍ଯ୍ୟନ୍ତ ସେମାନେ ଏଠାରେ ରହିବେ। ଆସାମ ପୋଲିସ ସେମାନଙ୍କୁ ସୁରକ୍ଷା ଯୋଗାଉଛି।