ନୂଆଦିଲ୍ଲୀ: ଚନ୍ଦ୍ରଯାନ-୩ ମିଶନର ସଫଳ ସୂକ୍ଷ୍ମାବତରଣ ପରେ ଭାରତୀୟ ମହାକାଶ ଗବେଷଣା ସଂଗଠନ (ଇସ୍ରୋ) ଶୁକ୍ରବାର ଆଉ ଏକ ଭିଡିଓ ଜାରି କରିଛି।
ଏହି ଭିଡିଓରେ ଚନ୍ଦ୍ରଯାନ-୩ ରୋଭର ଲ୍ୟାଣ୍ଡରରୁ ବାହାରି କିପରି ଧୀରେ ଧୀରେ ଚନ୍ଦ୍ରପୃଷ୍ଠରେ ଅବତରଣ କରୁଛି ତାହା ଦେଖିବାକୁ ମିଳୁଛି। ଇସ୍ରୋ ଏହି ଭିଡିଓକୁ ଏକ୍ସ (ଟ୍ୱିଟର)ରେ ସେୟାର କରିଛି ।
ଚନ୍ଦ୍ରଯାନ-୩ ବୁଧବାର (ଅଗଷ୍ଟ ୨୩) ସନ୍ଧ୍ୟା ୬ ଘଣ୍ଟା ୪ ମିନିଟରେ ଚନ୍ଦ୍ରର ଦକ୍ଷିଣ ମେରୁରେ ସଫଳ ଅବତରଣ କରିଥିଲା | ବିଶ୍ବର ପ୍ରଥମ ଦେଶ ଭାବେ ଭାରତ ଚନ୍ଦ୍ରର ଦକ୍ଷିଣ ମେରୁରେ ପହଞ୍ଚି ଇତିହାସ ରଚିଥିଲା । ଏହାଛଡ଼ା ଚନ୍ଦ୍ରରେ ପହଞ୍ଚିବାରେ ଆମେରିକା, ସୋଭିଏତ୍ ସଂଘ (ରୁଷ) ଓ ଚୀନ୍ ପରେ ଭାରତ ହୋଇଥିଲା ଚତୁର୍ଥ ଦେଶ ।
ଇସ୍ରୋ କହିଛି ଯେ ଚନ୍ଦ୍ରପୃଷ୍ଠରେ ଅନେକ ଚ୍ୟାଲେଞ୍ଜ ରହିଛି, ଯାହା ମହାକାଶଯାନ ପ୍ରଥମ ଥର ଅନୁଭବ କରିପାରେ । ବିଶେଷ କରି ଚନ୍ଦ୍ରର ଧୂଳି ଏବଂ ତାପମାତ୍ରା ରୋଭର ଉପରେ ପ୍ରଭାବ ପକାଇପାରେ | ପ୍ରଜ୍ଞା ନାମକ ଏହି ରୋଭର ଆସନ୍ତା ୧୪ ଦିନ ପର୍ଯ୍ୟନ୍ତ ଚନ୍ଦ୍ରରେ ବୁଲି ପୃଥିବୀର ଏହି ଏକମାତ୍ର ପ୍ରାକୃତିକ ଉପଗ୍ରହ ସମ୍ପର୍କରେ ଗୁରୁତ୍ୱପୂର୍ଣ୍ଣ ତଥ୍ୟ ସଂଗ୍ରହ କରିବ । ‘ପ୍ରଜ୍ଞା’ ମଧ୍ୟ ଚନ୍ଦ୍ର ପୃଷ୍ଠରେ ଜଳର ସନ୍ଧାନ କରିବ | ଏହାଛଡ଼ା ଏଥିରେ ଥିବା ଚାରି ପେଲୋଡ୍ ଚନ୍ଦ୍ରର ମ୍ୟାପିଂ ବ୍ୟତୀତ ଅନ୍ୟ ମହତ୍ତ୍ୱପୂର୍ଣ୍ଣ ପରୀକ୍ଷଣ କରିବେ | ‘ପ୍ରଜ୍ଞା’ ରୋଭରର ଓଜନ ପ୍ରାୟ ୨୬ କିଲୋଗ୍ରାମ |
Comments are closed.