କଲମ୍ବୋ: ଏସିଆ କପରେ ଆଜି ଭାରତ ଓ ଶ୍ରୀଲଙ୍କା ମଧ୍ୟରେ ଫାଇନାଲ ଖେଳାଯିବ । ରୋହିତ ଶର୍ମାଙ୍କ ନେତୃତ୍ୱାଧୀନ ଟିମ୍ ଇଣ୍ଡିଆ ଆଘାତ ସମସ୍ୟାରେ ଛନ୍ଦି ହୋଇପଡିଥିବା ଶ୍ରୀଲଙ୍କା ବିପକ୍ଷରେ ଟାଇଟଲ ଦାବିଦାର ଭାବେ ପଡିଆକୁ ଓହ୍ଲାଇବ। ଏକ ବହୁରାଷ୍ଟ୍ରୀୟ ଟୁର୍ଣ୍ଣାମେଣ୍ଟରେ ପାଞ୍ଚ ବର୍ଷର ଟ୍ରଫି ମରୁଡ଼ିକୁ ଶେଷ କରିବାକୁ ଲକ୍ଷ୍ୟରେ ରହିବ ଭାରତ ।
ଅକ୍ଷର ପଟେଲ ଭାରତୀୟ ଦଳର ଏକ ଗୁରୁତ୍ୱପୂର୍ଣ୍ଣ ଅଂଶବିଶେଷ । କିନ୍ତୁ ତାଙ୍କ ଆଘାତ ଚିନ୍ତାର ବିଷୟ ହୋଇଛି । ଶ୍ରୀଲଙ୍କା ଦଳ ମଧ୍ୟ ଏହାର ମୁଖ୍ୟ ସ୍ପିନର ମହିଶ ତୀକ୍ଷାନାଙ୍କ ସେବାରୁ ବଞ୍ଚିତ ହେବ । କାରଣ ଜଂଘରେ ଆଘାତ ଯୋଗୁଁ ସେ ବାଦ୍ ପଡ଼ିଛନ୍ତି ।
ଭାରତୀୟ ଦଳ ଗତ ପାଞ୍ଚ ବର୍ଷ ମଧ୍ୟରେ କୌଣସି ବହୁରାଷ୍ଟ୍ରୀୟ ଟାଇଟଲ୍ ଜିତି ନାହିଁ । ତେଣୁ ରବିବାର ଏହାର କ୍ୟାବିନେଟରେ ଆଉ ଏକ ଟ୍ରଫି ଯୋଡିବା ପାଇଁ ଏକ ଭଲ ସୁଯୋଗ ରହିଛି ।
ବିଶ୍ୱକପ ପୂର୍ବରୁ ଏକ ଟାଇଟଲ୍ ବିଜୟ ମଧ୍ୟ ଦଳର ମନୋବଳ ବୃଦ୍ଧି କରିବ ଯାହା ସମସ୍ତ ବିଭାଗରେ ଆଶାନୁରୂପ ପ୍ରଦର୍ଶନ କରିପାରି ନାହିଁ | କିନ୍ତୁ ଗଛ କିଛି ମାସ ତୁଳନାରେ ଦଳ ଅପେକ୍ଷାକୃତ ଶକ୍ତିଶାଳୀ ଦେଖାଯାଉଛି।
କ୍ରିକେଟ୍ ର ତିନୋଟି ଫର୍ମାଟରେ ଭାରତ ଶେଷ ଥର ପାଇଁ ୨୦୧୮ରେ ଟାଇଟଲ୍ ଜିତିଥିଲା ଯେତେବେଳେ ଦୁବାଇରେ ଅନୁଷ୍ଠିତ ଏସିଆ କପ୍ ରେ ରୋହିତଙ୍କ ଦଳ ବାଂଲାଦେଶକୁ ତିନି ୱିକେଟରେ ହରାଇଥିଲା । ଉକ୍ତ ବିଜୟ ପରେ ଭାରତ ଆଉ କୌଣସି ଗୁରୁତ୍ୱପୂର୍ଣ୍ଣ ମ୍ୟାଚ୍ କିମ୍ବା ଟୁର୍ଣ୍ଣାମେଣ୍ଟରେ ଆଶ୍ଚର୍ଯ୍ୟଜନକ ଭାବେ ପ୍ରାଧାନ୍ୟ ବିସ୍ତାର କରିବାରେ ବିଫଳ ହୋଇଛି ।
ଭାରତ ୨୦୧୯ ଦିନିକିଆ ବିଶ୍ୱକପ ଏବଂ ୨୦୨୨ ଟି-୨୦ ବିଶ୍ୱକପର ସେମିଫାଇନାଲରେ ହାରିଥିଲା | ଏହାଛଡ଼ା ୨୦୧୯ ବିଶ୍ୱ ଟେଷ୍ଟ ଚାମ୍ପିଅନସିପ୍ (ଡବ୍ଲଟିସି) ଏବଂ ୨୦୨୩ ଡବ୍ଲୁଟିସି ଫାଇନାଲରେ ବି ଝୁଣ୍ଟିଥିଲା |
ଗତ ବର୍ଷ ଟି-୨୦ ଫର୍ମାଟରେ ଖେଳାଯାଇଥିବା ଏସିଆ କପରେ ମଧ୍ୟ ଭାରତୀୟ ଦଳ ନିଜ ଉପସ୍ଥିତି ସାବ୍ୟସ୍ତ କରିବାରେ ବିଫଳ ହୋଇଥିଲା, ଯେଉଁଥିରେ ଶ୍ରୀଲଙ୍କା ଟାଇଟଲ୍ ଜିତିଥିଲା ।
ଭାରତ ନିଜ ଗୌରବମୟ କ୍ରିକେଟ୍ ପରମ୍ପରାକୁ ନେଇ ଗର୍ବିତ । ତେଣୁ ଗତ ପାଞ୍ଚ ବର୍ଷ ଧରି କୌଣସି ବହୁରାଷ୍ଟ୍ରୀୟ ଟୁର୍ଣ୍ଣାମେଣ୍ଟ ଜିତି ନ ପାରିବା ନିଶ୍ଚିତ ଭାବେ ଏକ ଖରାପ ରେକର୍ଡ । ବର୍ତ୍ତମାନ ଦଳ ମୁଖ୍ୟ କୋଚ୍ ରାହୁଲ ଦ୍ରାବିଡ ଏବଂ ଅଧିନାୟକ ରୋହିତଙ୍କ ସହ କିଛି ନୂଆ ଧାରା ସୃଷ୍ଟି କରିବାକୁ ଉଦ୍ୟମ କରିବେ। ଭାରତୀୟ ଦଳ ନିଶ୍ଚିତ ଅବଗତ ଯେ ରବିବାର ଏହାର କ୍ୟାବିନେଟରେ ଆଉ ଏକ ଟ୍ରଫି ଯୋଡିବାର ଏକ ବଡ଼ ସୁଯୋଗ ରହିଛି।
ଶୁକ୍ରବାର ବାଂଲାଦେଶ ବିପକ୍ଷ ଶେଷ ସୁପର ଫୋର ମ୍ୟାଚରେ ଭାରତ ଏହାର ପାଞ୍ଚ ପ୍ରମୁଖ ଖେଳାଳିଙ୍କୁ ବିଶ୍ରାମ ଦେଇଥିଲା, ଯେଉଁମାନେ ଫାଇନାଲରେ ଫେରିବେ। ଏହି ମ୍ୟାଚକୁ ଦଳ ୬ ରନ୍ ହାରିଥିଲା ।
ଫାଇନାଲ ପାଇଁ ବିରାଟ କୋହଲି ଏବଂ ହାର୍ଦ୍ଦିକ ପାଣ୍ଡ୍ୟାଙ୍କ ପ୍ରତ୍ୟାବର୍ତ୍ତନ ନିଶ୍ଚିତ ଭାବରେ ବାଂଲାଦେଶ ସ୍ପିନରଙ୍କ ବିପକ୍ଷରେ ସଂଘର୍ଷ କରିଥିବା ବ୍ୟାଟିଂ ବିଭାଗକୁ ମଜବୁତ କରିବ। ଓପନର୍ ଶୁଭମାନ ଗିଲ୍ ଏକ ଚମତ୍କାର ଶତକୀୟ ଇନିଂସ୍ ଖେଳିଥିଲେ । କିନ୍ତୁ ମିଡିଲ ଅର୍ଡର ବ୍ୟାଟ୍ସମ୍ୟାନମାନେ ମଝି ଓଭରରେ ଷ୍ଟ୍ରାଇକ୍ ରୋଟେସନ କରିପାରିନଥିଲେ । ଯାହା ଫଳରେ ଲୋୟର ଅର୍ଡର ଉପରେ ଅଧିକ ଚାପ ପଡ଼ିଥିଲା।
ଏହି ମ୍ୟାଚ୍ ସ୍ପଷ୍ଟ ପ୍ରମାଣ ଯେ ଦଳର ଏପରି ଅନେକ ଦୁର୍ବଳତା ରହିଛି ଯାହାକୁ ତୁରନ୍ତ ସୁଧାରିବାକୁ ପଡ଼ିବ । ପ୍ରାରମ୍ଭିକ ୱିକେଟ୍ ଖସାଇବା ସତ୍ତ୍ୱେ ଭାରତୀୟ ବୋଲର ପ୍ରତିପକ୍ଷ ଦଳକୁ ଅଟକାଇବାରେ ବିଫଳ ହୋଇଥିଲେ।
ବାଂଲାଦେଶର ୫୯ ରନରେ ଚାରିଟି ୱିକେଟ୍ ହରାଇଥିଲା କିନ୍ତୁ ଭାରତୀୟ ବୋଲରମାନେ ଶେଷ ଓଭରରେ ବହୁ ରନ୍ ଦେଇଥିଲେ । ଯାହା ଫଳରେ ବିପକ୍ଷ ଦଳ ୨୬୫ ରନ୍ କରିବାକୁ ସଫଳ ହୋଇଥିଲା ।
ତେବେ ଦ୍ରୁତ ବୋଲର ଜସପ୍ରୀତ ବୁମରା, ମହମ୍ମଦ ସିରାଜ ଏବଂ ବାମହାତୀ ସ୍ପିନର କୁଲଦୀପ ଯାଦବଙ୍କ ପ୍ରତ୍ୟାବର୍ତ୍ତନ ଫାଇନାଲ ମ୍ୟାଚରେ ଫେରିବା ପରେ ଏହି ସମସ୍ୟାର ସମାଧାନ ହେବ ବୋଲି ଆଶା କରାଯାଉଛି ।
ଅକ୍ଷର ପଟେଲଙ୍କ ଆଘାତ ଉପରେ ମଧ୍ୟ ଭାରତ ନଜର ରଖିବ । ଟିମ୍ ମ୍ୟାନେଜମେଣ୍ଟ ମଧ୍ୟ ବେଙ୍ଗାଲୁରୁରେ ଏସିଆନ୍ ଗେମ୍ସ ଦଳ ସହିତ ତାଲିମ ନେଉଥିବା ଅଫ୍ ସ୍ପିନର ୱାଶିଂଟନ୍ ସୁନ୍ଦରଙ୍କୁ ଡ଼ାକିଛି । ସେ ଗତକାଲି ଦଳରେ ଯୋଗଦେଇଛନ୍ତି । ଭାରତର ଏହି ସମସ୍ୟାଗୁଡିକ ବର୍ତ୍ତମାନ ପାଇଁ ଏସିଆ କପ୍ ଫାଇନାଲରେ ସୀମିତ ରହିଥାଇପାରେ । କିନ୍ତୁ ଦଳ ଏହାଠାରୁ ଆହୁରି ବ୍ୟାପକ ସ୍ଥିତି ବିଷୟରେ ଅଜ୍ଞ ରହିପାରିବ ନାହିଁ |
ବିଶ୍ୱକପ ପୂର୍ବରୁ ଭାରତକୁ ଏହାର ସମସ୍ତ ବିଭାଗର ପ୍ରସ୍ତୁତି ପରଖିବା ପାଇଁ ଅଭ୍ୟାସ ମ୍ୟାଚ୍ ବ୍ୟତୀତ ଆଉ ଚାରିଟି ଦିନିକିଆ (ଏସିଆ କପ୍ ଫାଇନାଲ୍ ଏବଂ ଅଷ୍ଟ୍ରେଲିଆ ବିପକ୍ଷରେ ତିନୋଟି ମ୍ୟାଚ୍) ଖେଳିବାକୁ ଅଛି |
ଆସନ୍ତା ମାସରୁ ଆରମ୍ଭ ହେବାକୁ ଥିବା ବିଶ୍ୱକପ ପୂର୍ବରୁ ଦଳର ମନୋବଳ ବଢାଇବାରେ ଏସିଆ କପ୍ ଟାଇଟଲ ବିଜୟ ଗୁରୁତ୍ୱପୂର୍ଣ୍ଣ ହେବ । କାରଣ ଦଳ ୧୦ ବର୍ଷର ଆଇସିସି ଟ୍ରଫି ମରୁଡ଼ିକୁ ଶେଷ କରିବାକୁ ଚାହୁଁଛି।
ଅନ୍ୟପକ୍ଷରେ ଶ୍ରୀଲଙ୍କା ଦଳ ମଧ୍ୟ ଆତ୍ମବିଶ୍ୱାସରେ ଭରି ରହିଥିବା ମନେ ହେଉଛି । ଦଳ ଦିନିକିଆ ଫର୍ମାଟରେ ଭଲ ପ୍ରଦର୍ଶନ ଜାରି ରଖିଛି।
ଭାରତ: ରୋହିତ ଶର୍ମା (ଅଧିନାୟକ), ବିରାଟ କୋହଲି, ଶ୍ରେୟସ୍ ଆୟର, କେଏଲ୍ ରାହୁଲ, ଶୁଭମାନ ଗିଲ୍, ସୂର୍ଯ୍ୟକୁମାର ଯାଦବ, ତିଳକ ବର୍ମା, ଇଶାନ କିଶନ, ହାର୍ଦ୍ଦିକ ପାଣ୍ଡ୍ୟା (ଉପଅଧିନାୟକ), ରବୀନ୍ଦ୍ର ଜାଡେଜା, ଅକ୍ଷର ପଟେଲ, ଶାର୍ଦୁଲ ଠାକୁର, ଯଶପ୍ରୀତ ବୁମରା, ମହମ୍ମଦ ସିରାଜ, କୁଲଦୀପ ଯାଦବ, ପ୍ରସିଦ୍ଧ କ୍ରିଷ୍ଣା, ୱାଶିଂଟନ୍ ସୁନ୍ଦର (ଆହତ ଅକ୍ପଷର ଟେଲଙ୍କ ପାଇଁ କଭର) |
ଶ୍ରୀଲଙ୍କା:ଦାସୁନ୍ ଶନକା (ଅଧିନାୟକ), ପୃଥମ୍ ନିସଙ୍କା, ଦିମୁଥ୍ କରୁଣାରାଟେନ୍, କୁସାଲ୍ ଜେନିଥ୍ ପେରେରା, କୁସାଲ୍ ମେଣ୍ଡିସ୍ (ଉପଅଧିନାୟକ), ଚରିଥ ଆସାଲଙ୍କା, ଧନଞ୍ଜୟ ଡି ସିଲଭା, ସାଦିରା ସମରୱିକ୍ରମା, ମହିଷ ତୀକ୍ଷାନା, ଦୁନିଥ ଓ୍ବେଲାଲାଗେ, ମଥୀଶା ପାଥିରାନା, ଦୁସାନ ହେମନ୍ତ, କସୁନ ରଜିତା, ବିନୁରା ଫର୍ଣ୍ଣାଣ୍ଡୋ, ପ୍ରମୋଦ ମଦୁଶାନ୍ |
Comments are closed.