୫ଜି ସ୍ପେକ୍ଟ୍ରମ୍ ନିଲାମ ଦୌଡ଼ରେ ଆଦାନୀ ଗ୍ରୁପ୍ ସାମିଲ, ଅମ୍ବାନୀଙ୍କ ଜିଓ ଓ ମିତ୍ତଲଙ୍କ ଏୟାରଟେଲକୁ ଦେବ ଟକ୍କର

ନୂଆଦିଲ୍ଲୀ: କୋଟିପତି ଉଦ୍ୟୋଗୀ ଗୌତମ ଆଦାନୀଙ୍କ ଗ୍ରୁପ୍ ଏବେ ଟେଲିକମ୍ କ୍ଷେତ୍ରରେ ଏଣ୍ଟ୍ରି ପାଇଁ ଯୋଜନା କରୁଛି । ସୂତ୍ରରୁ ଜଣାପଡ଼ିଛି ଯେ ସ୍ପେକ୍ଟ୍ରମ ନିଲାମ ଦୌଡ଼ରେ ଆଦାନୀ ଗ୍ରୁପ ମଧ୍ୟ ସାମିଲ ହୋଇପାରେ । ଏଭଳି ସ୍ଥିତିରେ ଆଦାନୀ ଗ୍ରୁପ୍ ସହ ମୁକେଶ ଅମ୍ବାନୀଙ୍କ ରିଲାଏନ୍ସ ଜିଓ ଏବଂ ସୁନୀଲ ଭାରତୀ ମିତ୍ତଲଙ୍କ ଏୟାରଟେଲର ସିଧାସଳଖ ଟକ୍କର ହେବ । ପଞ୍ଚମ ପୀଢ଼ି ତଥା ୫ଜି ଭଳି ଉଚ୍ଚ କ୍ଷମତା ସମ୍ପନ୍ନ ଓ ହାଇସ୍ପିଡ୍ ଇଣ୍ଟରନେଟ ସେବା ଯୋଗାଇବାରେ ସକ୍ଷମ ଏହି ସ୍ପେକ୍ଟ୍ରମ୍ ଗୁଡ଼ିକର ନିଲାମରେ ଅଂଶଗ୍ରହଣ କରିବାକୁ ଆବେଦନ ଶୁକ୍ରବାର ବନ୍ଦ ହୋଇଥିବା ବେଳେ ଅତି କମରେ ୪ଟି କମ୍ପାନୀ ଆବେଦନ ଦାଖଲ କରିଛନ୍ତି | ୫ଜି ସ୍ପେକ୍ଟ୍ରମ୍ ନିଲାମ ଜୁଲାଇ ୨୬ରେ ଅନୁଷ୍ଠିତ ହେବ |

ଏହି ବିଷୟରେ ଜ୍ଞାନ ଥିବା ତିନୋଟି ସୂତ୍ରରୁ ପ୍ରକାଶ ଯେ ଟେଲିକମ୍ କ୍ଷେତ୍ରର ତିନୋଟି ଘରୋଇ କମ୍ପାନୀ – ଜିଓ, ​​ଏୟାରଟେଲ୍ ଏବଂ ଭୋଡାଫୋନ୍ ଆଇଡିଆ ଆବେଦନ କରିଛନ୍ତି। ଚତୁର୍ଥ ଆବେଦନକାରୀ ଆଦାନୀ ଗ୍ରୁପ୍ ବୋଲି ସୂତ୍ରରୁ ପ୍ରକାଶ। ଏହି ଗ୍ରୁପ୍ ନିକଟରେ ନ୍ୟାସନାଲ ଲଙ୍ଗ ଡିଷ୍ଟାନ୍ସ (ଏନ୍ଏଲଡି) ଏବଂ ଇଣ୍ଟରନ୍ୟାସନାଲ ଲଙ୍ଗ ଡିଷ୍ଟାନ୍ସ (ଆଇଏଲଡି) ପାଇଁ ଲାଇସେନ୍ସ ହାସଲ କରିଛି | ତେବେ ଏହି ଦାବି ସ୍ବାଧୀନ ଭାବେ ଯାଞ୍ଚ୍ ହୋଇପାରି ନାହିଁ। ଏହି ପରିପ୍ରେକ୍ଷୀରେ ଆଦାନୀ ଗ୍ରୁପ କୌଣସି ପ୍ରତିକ୍ରିୟା ମଧ୍ୟ ଦେଇନାହିଁ।

ନିଲାମ ସମୟସୀମା ଅନୁଯାୟୀ ଆବେଦନକାରୀଙ୍କ ମାଲିକାନା ବିବରଣୀ ଜୁଲାଇ ୧୨ରେ ପ୍ରକାଶ ପାଇବ | ଟେଲିକମ୍ ସ୍ପେକ୍ଟ୍ରମର ନିଲାମ ୨୬ ଜୁଲାଇ ୨୦୨୨ରୁ ଆରମ୍ଭ ହେଉଛି ଏବଂ ଅତି କମରେ ୪.୩ ଲକ୍ଷ କୋଟି ଟଙ୍କାରେ ମୋଟ ୭୨,୦୯୭.୮୫ ମେଗାହର୍ଜ ସ୍ପେକ୍ଟ୍ରମ ନିଲାମ ପାଇଁ ଉପଲବ୍ଧ କରାଯିବ।

ଉଭୟ ଅମ୍ବାନୀ ଏବଂ ଆଦାନୀ ଗୁଜୁରାଟର ମୂଳ ବାସିନ୍ଦା । ଏବଂ ଉଭୟ କମ୍ପାନୀ ବଡ଼ ବ୍ୟବସାୟ ସମୂହ ଗଠନ କରିଛନ୍ତି | ତେବେ ଏପର୍ଯ୍ୟନ୍ତ ଦୁହିଁଙ୍କର କୌଣସି ବ୍ୟବସାୟରେ ସିଧାସଳଖ ମୁହାଁମୁହିଁ ହୋଇନଥିଲା। ଅମ୍ବାନୀଙ୍କ ବ୍ୟବସାୟ ତୈଳ ଏବଂ ପେଟ୍ରୋକେମିକାଲ୍ସ ଠାରୁ ଟେଲିକମ୍ ଏବଂ ଖୁଚୁରା ପର୍ଯ୍ୟନ୍ତ ବ୍ୟାପିଥିବାବେଳେ ଆଦାନୀ ବନ୍ଦରରୁ କୋଇଲା, ବିଦ୍ୟୁତ୍ ବଣ୍ଟନ ଏବଂ ବିମାନ ଚଳାଚଳ ପର୍ଯ୍ୟନ୍ତ ବ୍ୟାପିଛି।

ତେବେ କେହି କେହି କହୁଛନ୍ତି ଯେ ଦୁହିଁଙ୍କ ସ୍ୱାର୍ଥ ବହୁତ ବ୍ୟାପକ ହେବାରେ ଲାଗିଛି ଏବଂ ବର୍ତ୍ତମାନ ସେମାନଙ୍କ ମଧ୍ୟରେ ବିବାଦ ପାଇଁ କ୍ଷେତ୍ର ପ୍ରସ୍ତୁତ ହୋଇଛି।

ପେଟ୍ରୋକେମିକାଲ୍ ବ୍ୟବସାୟରେ ପ୍ରବେଶ କରିବା ପାଇଁ ଆଦାନୀ ଗତ କିଛି ମାସ ମଧ୍ୟରେ ଏକ ସହାୟକ କମ୍ପାନୀ ସୃଷ୍ଟି କରିଥିଲେ | ଅନ୍ୟପକ୍ଷରେ ଅମ୍ବାନୀ ଶକ୍ତି ବ୍ୟବସାୟରେ ମଧ୍ୟ ଅନେକ ବିଲିୟନ ଡଲାର ଯୋଜନା ନିବେଶ ନେଇ ଘୋଷଣା କରିଛନ୍ତି।