ଜାହାଙ୍ଗୀରପୁରୀରେ ଫେରୁଛି ଶାନ୍ତି, ‘ତ୍ରିରଙ୍ଗା ଯାତ୍ରା’ ପରେ ଆଜି ହିନ୍ଦୁ-ମୁସଲିମ ମିଶି ଆୟୋଜନ କରିବେ ଇଫତାର ପାର୍ଟି

ନୂଆଦିଲ୍ଲୀ: ଦିଲ୍ଲୀର ଜାହାଙ୍ଗୀରପୁରୀରେ ହିଂସା ପରେ ଶାନ୍ତି ଫେରାଇ ଆଣିବାକୁ ଉଦ୍ୟମ ଚାଲିଛି। ଜାହାଙ୍ଗୀରପୁରୀରେ ପାରସ୍ପରିକ ଭାଇଚାରା ରକ୍ଷା ପାଇଁ ଆଜି ଦୁଇ ସମ୍ପ୍ରଦାୟ ମିଶି ଇଫତାର ପାର୍ଟିର ଆୟୋଜନ କରିବେ | ରବିବାର ଦିନ କାନ୍ଧରେ କାନ୍ଧରେ ମିଶାଇ ଏହି ଅଞ୍ଚଳର ଉଭୟ ସମ୍ପ୍ରଦାୟର ଲୋକ ଏକ ତ୍ରିରଙ୍ଗା ଯାତ୍ରା ବାହାର କରିଥିଲେ । ଏହି ସମୟରେ ଭାରତ ମାତା କି ଜୟ ଧ୍ବନିରେ ସମଗ୍ର ଅଞ୍ଚଳ ପ୍ରକମ୍ପିତ ହୋଇଥିଲା। ଯାତ୍ରା ବାହାର କରି ଲୋକମାନେ ପାରସ୍ପରିକ ଭାଇଚାରା ବାର୍ତ୍ତା ଦେଇଥିଲେ | ଛୋଟ ପିଲାମାନଙ୍କ ହାତରେ ମଧ୍ୟ ତ୍ରିରଙ୍ଗା ଥିଲା | ପିଲା ଠାରୁ ବୟସ୍କ ପର୍ଯ୍ୟନ୍ତ ସମସ୍ତଙ୍କ ମୁହଁରେ ହସ ଦେଖିବାକୁ ମିଳିଥିଲା | ବର୍ତ୍ତମାନ ଜାହାଙ୍ଗୀରପୁରୀର ଲୋକମାନେ ପାରସ୍ପରିକ ସଦଭାବ ଏବଂ ଏକତାକୁ ପ୍ରୋତ୍ସାହିତ କରିବା ପାଇଁ ଆଉ ଏକ ପଦକ୍ଷେପ ନେଇଛନ୍ତି | ଆଜି ଜାହାଙ୍ଗୀରପୁରୀରେ ଇଫତାର ପାର୍ଟିର ଆୟୋଜନ ହେବାକୁ ଯାଉଛି। ଉଭୟ ସମ୍ପ୍ରଦାୟର ଲୋକମାନେ ଏହି ଅଞ୍ଚଳରେ ସୃଷ୍ଟି ହୋଇଥିବା ଉତ୍ତେଜନା ଦୂର କରି ଜୀବନଯାତ୍ରା ସ୍ବାଭାବିକ କରିବା ପାଇଁ ପଦକ୍ଷେପ ନେଉଥିବା ଦେଖିବାକୁ ମିଳିଛି |

ଏପ୍ରିଲ ୧୬ ରେ ସାମ୍ପ୍ରଦାୟିକ ହିଂସା ପରେ ଶାନ୍ତି ଏବଂ ସଦଭାବର ବାର୍ତ୍ତା ଦେଇ ହିନ୍ଦୁ ଓ ମୁସଲମାନମାନେ ରବିବାର ଦିନ ଜାହାଙ୍ଗୀରପୁରୀ ସି-ବ୍ଲକରେ ଦିଲ୍ଲୀ ପୋଲିସର ସାହାଯ୍ୟରେ ଏକ ‘ତିରଙ୍ଗା ଯାତ୍ରା’ ବାହାର କରିଥିଲେ। ଉଭୟ ସମ୍ପ୍ରଦାୟର ପ୍ରାୟ ୫୦ ଜଣଙ୍କୁ ଏହି ଯାତ୍ରାରେ ଅଂଶଗ୍ରହଣ କରିବାକୁ ଅନୁମତି ଦିଆଯାଇଥିଲା | ସି-ବ୍ଲକର ଅନେକ ବାସିନ୍ଦା ରାସ୍ତା କଡ଼ରେ ଠିଆ ହୋଇଥିବାବେଳେ ଅନ୍ୟମାନେ ଘର ଝରକା ଏବଂ ବାଲକୋନିରୁ ଏହି ଶୋଭାଯାତ୍ରା ଦେଖୁଥିଲେ | ଅନେକ ଲୋକ ମଧ୍ୟ ଏହି ତ୍ରିରଙ୍ଗା ଯାତ୍ରା ଉପରେ ଫୁଲ ବର୍ଷା କରିଥିଲେ । ଉତ୍ତର-ପଶ୍ଚିମ ଦିଲ୍ଲୀର ଡେପୁଟି କମିଶନର ଉଷା ରଙ୍ଗନାନି କହିଛନ୍ତି ଯେ ଏହି ରାଲିରେ ସୌହାର୍ଦ୍ଦ୍ୟ ଏବଂ ଶାନ୍ତିର ବାର୍ତ୍ତା ଦିଆଯାଇଛି। ଉଭୟ ସମ୍ପ୍ରଦାୟର ସଦସ୍ୟମାନେ ଦର୍ଶାଇଛନ୍ତି ଯେ ଦେଶ ହେଉଛି ସର୍ବୋଚ୍ଚ ପ୍ରାଥମିକତା |