ଫିଫା ବିଶ୍ୱକପ: ଦକ୍ଷିଣ କୋରିଆକୁ ୪-୧ରେ ହରାଇ କ୍ବାର୍ଟରରେ ବ୍ରାଜିଲ, ପେନାଲ୍ଟିରେ ଜାପାନକୁ ପରାସ୍ତ କଲା କ୍ରୋଏସିଆ

ଦୋହା: କତାରରେ ଚାଲିଥିବା ଫିଫା ବିଶ୍ୱକପରେ ସୋମବାର ଖେଳାଯାଇଥିବା ପ୍ରି-କ୍ୱାର୍ଟରରେ ଦକ୍ଷିଣ କୋରିଆକୁ ୪-୧ ଗୋଲରେ ହରାଇ ପାଞ୍ଚ ଥରର ଚାମ୍ପିୟନ ବ୍ରାଜିଲ କ୍ୱାର୍ଟର ଫାଇନାଲରେ ପ୍ରବେଶ କରିଛି। କ୍ୱାର୍ଟର ଫାଇନାଲରେ ବ୍ରାଜିଲର ମୁକାବିଲା ଗତଥରର ରନର୍ସ ଅପ୍ କ୍ରୋଏସିଆ ସହ ହେବ।

ବ୍ରାଜିଲ ପାଇଁ ନେମାର ଚମତ୍କାର ପ୍ରଦର୍ଶନ କରିଥିଲେ। ଆଘାତ କାରଣରୁ ଗତ ଦୁଇଟି ମ୍ୟାଚ୍‌ ଖେଳିପାରି ନଥିବା ନେମାର ପ୍ରି-କ୍ବାର୍ଟରରେ ଗୋଟିଏ ଗୋଲ୍ କରିଥିଲେ। ଏହା ତାଙ୍କର ୭୬ ତମ ଗୋଲ ଥିଲା | ବର୍ତ୍ତମାନ ସେ ପେଲେଙ୍କ ରେକର୍ଡ ଠାରୁ ମାତ୍ର ଦୁଇ ପାଦ ଦୂରରେ ଅଛନ୍ତି । ପେଲେ ହେଉଛନ୍ତି ବ୍ରାଜିଲର ସର୍ବାଧିକ ଗୋଲ ସ୍କୋରର । ନେମାରଙ୍କ ବ୍ୟତୀତ ଭିନିସିୟସ୍ ଜୁନିଅର, ରିଚାର୍ଲିସନ୍ ଏବଂ ଲୁକାସ୍ ପାକେଟା ମଧ୍ୟ ବ୍ରାଜିଲ ପାଇଁ ଗୋଲ୍ କରିଥିଲେ।

ଅନ୍ୟପକ୍ଷରେ ଆଉ ଏକ ରୋମାଞ୍ଚକ ପ୍ରି-କ୍ବାର୍ଟରରେ କ୍ରୋଏସିଆର ଦଳ ମଧ୍ୟ ସୋମବାର କ୍ୱାର୍ଟର ଫାଇନାଲରେ ପ୍ରବେଶ କରିଛି। ନିର୍ଦ୍ଧାରିତ ସମୟ ଓ ଅତିରିକ୍ତ ସମୟରେ ମ୍ୟାଚ୍ ୧-୧ରେ ବରାବର ରହିବା ପରେ ପେନାଲ୍ଟି ସୁଟଆଉଟରେ ଫଳାଫଳ ନିର୍ଣ୍ଣୟ ହୋଇଥିଲା । ପେନାଲ୍ଟି ସୁଟଆଉଟରେ କ୍ରୋଏସିଆ ଜାପାନକୁ ୩-୧ରେ ପରାସ୍ତ କରିଥିଲା ।

ଦଳର ବିଜୟର ହିରୋ ଥିଲେ ଗୋଲକିପର ଡୋମିନିକ୍ ଲିଭକୋଭିକ୍, ଯିଏ ସୁଟ୍ଆଉଟରେ ଚମତ୍କାର ରକ୍ଷଣ କରିଥିଲେ।

ପେନାଲ୍ଟି ସୁଟଆଉଟରେ ଜାପାନର ତିନୋଟି ଉଦ୍ୟମ ବିଫଳ ହୋଇଥିଲା । ଦଳ ତରଫରୁ କେବଳ ଆସାନୋ ହିଁ ଗୋଲ୍ କରିପାରିଥିଲେ । ଅନ୍ୟ ପଟେ କ୍ରୋଏସିଆ ତରଫରୁ ଏନ୍ ଭ୍ଲାସିଚ୍, ବ୍ରୋଜୋଭିଚ୍ ଏବଂ ଏମ୍ ପାସାଲିଚ୍ ଗୋଲ୍ ସ୍କୋର କରିଥିଲେ। କେବଳ ମାର୍କୋ ଲିଭାଜା କ୍ରୋଏସିଆର ପେନାଲ୍ଟିରୁ ଲାଭ ଉଠାଇ ପାରିନଥିଲେ।