ମହନ୍ତ ନରେନ୍ଦ୍ର ଗିରିଙ୍କ ମୃତ୍ୟୁ ମାମଲା: ତିନି ଜଣଙ୍କ ବିରୋଧରେ ଚାର୍ଜସିଟ୍ ଦାଖଲ କଲା ସିବିଆଇ

ନୂଆଦିଲ୍ଲୀ: ଅଖିଳ ଭାରତ ଆଖଡା ପରିଷଦର ସଭାପତି ମହନ୍ତ ନରେନ୍ଦ୍ର ଗିରିଙ୍କ ମୃତ୍ୟୁ ମାମଲାରେ ସିବିଆଇ କୋର୍ଟରେ ଚାର୍ଜସିଟ ଦାଖଲ କରିଛି। ସିବିଆଇ ଚାର୍ଜସିଟରେ ମହନ୍ତ ନରେନ୍ଦ୍ର ଗିରିଙ୍କ ମୃତ୍ୟୁ ଆତ୍ମହତ୍ୟା ବୋଲି କୁହାଯାଇଛି । ଏହି ମାମଲାରେ ସିବିଆଇ ଆଇପିସିର ଧାରା ୩୦୬ ଏବଂ ୧୨୦-ବି ଅନୁଯାୟୀ ଏକ ଚାର୍ଜସିଟ୍ ଦାଖଲ କରିଛି |

ମୃତ୍ୟୁ ପାଇଁ ଆନନ୍ଦ ଗିରି, ଆଧାର ପ୍ରସାଦ ତିୱାରୀ ଏବଂ ସନ୍ଦୀପ ତିୱାରୀଙ୍କୁ ଦାୟୀ କରାଯାଇଛି। ଫରେନସିକ୍ ଦ୍ବାରା ହସ୍ତଲିଖନ ଯାଞ୍ଚ ପରେ ଏହା ନିଶ୍ଚିତ ହୋଇଛି ଯେ ମହନ୍ତ ନରେନ୍ଦ୍ର ଗିରି ନିଜେ ତାଙ୍କ ସୁଇସାଇଡ୍ ନୋଟ୍ ଲେଖିଛନ୍ତି। ମୃତ୍ୟୁ ପୂର୍ବରୁ ସେ ଭିଡିଓ ମଧ୍ୟ ଜାରି କରିଥିଲେ। ଚାର୍ଜସିଟରେ ଉକ୍ତ ତିନି ଅଭିଯୁକ୍ତ ନରେନ୍ଦ୍ର ଗିରିଙ୍କୁ ଆତ୍ମହତ୍ୟା କରିବା ପାଇଁ ଉସକାଇଥିବା ଅଭିଯୋଗ ହୋଇଛି। ଅନ୍ୟ ଅଭିଯୁକ୍ତଙ୍କ ବିରୋଧରେ ତଦନ୍ତ ଜାରି ରହିଛି ବୋଲି ସିବିଆଇ କହିଛି। ସିବିଆଇ ଦ୍ୱାରା ଦାଖଲ ହୋଇଥିବା ଏହା ହେଉଛି ପ୍ରଥମ ଚାର୍ଜସିଟ୍ |

ମାମଲାର ତଦନ୍ତ ଶେଷ ହେବା ପରେ ସିବିଆଇ ଏକ ସପ୍ଲିମେଣ୍ଟାରୀ ଚାର୍ଜ ସିଟ୍ ମଧ୍ୟ ଦାଖଲ କରିପାରେ। ମୃତ୍ୟୁ ପୂର୍ବରୁ ମହନ୍ତ ନରେନ୍ଦ୍ର ଗିରି ତାଙ୍କର ଦୁଇ ସେବକଙ୍କ ସହ କଥା ହୋଇଥିଲେ। ସେମାନଙ୍କୁ ସେ ପଚରିଥିଲେ ଯେ ଫଟୋ ଏବଂ ଭିଡିଓରେ ଚେହେରା ବଦଳାଇ ଭୁଲ ଭିଡିଓ ତିଆରି କରାଯାଇପାରିବ କି? ଓକିଲ ଜରିଆରେ ଚାର୍ଜସିଟର ଏକ କପି ଆନନ୍ଦ ଗିରିଙ୍କୁ ପ୍ରଦାନ କରିବାକୁ ସିଜେଏମ୍ କୋର୍ଟ ନିର୍ଦ୍ଦେଶ ଦେଇଛନ୍ତି। ବର୍ତ୍ତମାନ ଏହି ମାମଲାରେ ଆନନ୍ଦ ଗିରିଙ୍କ ଓକିଲ ହାଇକୋର୍ଟରେ ଜାମିନ ଆବେଦନ କରିବେ। ତିନି ଅଭିଯୁକ୍ତଙ୍କ ନ୍ୟାୟିକ ହେପାଜତକୁ ନଭେମ୍ବର ୨୫ ପର୍ଯ୍ୟନ୍ତ କୋର୍ଟ ବୃଦ୍ଧି କରିଛନ୍ତି। ନଭେମ୍ବର ୨୫ ରେ ଏହି ମାମଲାର ଶୁଣାଣି ହେବ।