‘କେବଳ କାଶ୍ମୀର ଫାଇଲ୍ସ ନୁହେଁ, ଗୁଜରାଟ ଫାଇଲ୍ସ ଉପରେ ବି ଚର୍ଚ୍ଚା ହେବା ଉଚିତ’

ପୁଣେ: ‘କାଶ୍ମୀର ଫାଇଲ୍ସ’ ଫିଲ୍ମକୁ ନେଇ ବିଜେପି ଯେଉଁଭଳି ରାଜନୀତି କରୁଛି ତାକୁ ବରିଷ୍ଠ କଂଗ୍ରେସ ନେତା ତଥା ପୂର୍ବତନ କେନ୍ଦ୍ର ମନ୍ତ୍ରୀ ସୁଶୀଲକୁମାର ସିନ୍ଦେ ସମାଲୋଚନା କରିଛନ୍ତି। ସିନ୍ଦେ କହିଛନ୍ତି ଯେ ‘କାଶ୍ମୀର ଫାଇଲ୍ସ’ ଭଳି ୨୦୦୨ ଗୁଜୁରାଟ ଦଙ୍ଗା ଉପରେ ଜଣେ ସାମ୍ବାଦିକାଙ୍କ ଦ୍ୱାରା ଲିଖିତ ଏକ ପୁସ୍ତକର ମଧ୍ୟ ପ୍ରଚାର କରାଯିବା ଉଚିତ। ଏହି ପ୍ରସଙ୍ଗରେ ପ୍ରଧାନମନ୍ତ୍ରୀ ଏବଂ ଭାରତୀୟ ଜନତା ଦଳର ଅନ୍ୟ ନେତାମାନଙ୍କୁ ସେ ଟାର୍ଗେଟ କରିଥିଲେ। ସେ କହିଛନ୍ତି ଯେ ବିବେକ ଅଗ୍ନିହୋତ୍ରୀଙ୍କ ଦ୍ୱାରା ଲିଖିତ ତଥା ନିର୍ଦ୍ଦେଶିତ ଏହି ଫିଲ୍ମ ସେ ଦେଖି ନାହାଁନ୍ତି। ମୁଁ ଫିଲ୍ମ (କାଶ୍ମୀର ଫାଇଲ୍ସ) ଦେଖି ନାହିଁ କିନ୍ତୁ ଅନେକ ଲୋକ ଏହା ବିଷୟରେ କହୁଛନ୍ତି। କିନ୍ତୁ କାଶ୍ମୀର ଫାଇଲ୍ସ ପୂର୍ବରୁ ସାମ୍ବାଦିକ ରାଣା ଆୟୁବଙ୍କ ଗୁଜୁରାଟ ଫାଇଲ୍ସ (ଆନାଟୋମି ଅଫ୍ କଭର୍-ଅପ୍) ପୁସ୍ତକ ମଧ୍ୟ ଅଛି।

ସୋଲାପୁରରେ ସିନ୍ଦେ ଗଣମାଧ୍ୟମକୁ କହିଛନ୍ତି, “ପ୍ରଧାନମନ୍ତ୍ରୀ ଏବଂ ଅନ୍ୟମାନେ ‘କାଶ୍ମୀର ଫାଇଲ୍ସ’ର ପ୍ରଚାର କରୁଛନ୍ତି। ସେମାନେ ଗୁଜୁରାଟ ଫାଇଲ୍ସ ବିଷୟରେ ମଧ୍ୟ ଆଲୋଚନା କରିବା ଉଚିତ୍।” ସେ କହିଛନ୍ତି ଯେ ଏହି ଉପାୟରେ ଲୋକଙ୍କ ଭାବନାକୁ ଉଦ୍ରେକ କରିବାକୁ ଚେଷ୍ଟା କରିବା ହେଉଛି ବିଜେପିର ଏକ ପୁରୁଣା ରଣନୀତି।

ସିନ୍ଦେ ବସ୍ତିର ଏବଂ ଅବହେଳିତ ସହରାଞ୍ଚଳ ପରିବେଶରେ ଫୁଟବଲ ପ୍ରତିଭାଙ୍କ ଉପରେ ନିର୍ମିତ ଫିଲ୍ମ ‘ଝୁଣ୍ଡ’କୁ ପ୍ରଶଂସା କରିଛନ୍ତି ।