ନୂଆଦିଲ୍ଲୀ: ନିର୍ବାଚନ ଆୟୋଗ ଏକ ଅନ୍ତରୀଣ ନିଷ୍ପତ୍ତି କ୍ରମେ ଶିବସେନାର ନିର୍ବାଚନ ଚିହ୍ନ ‘ଧନୁ-ତୀର’କୁ ଫ୍ରିଜ୍ କରିଛନ୍ତି। ଏବେ ଠାକରେ କିମ୍ବା ଟିମ୍ ଗୋଷ୍ଠୀ ଏହି ଚିହ୍ନ ବ୍ୟବହାର କରିପାରିବେ ନାହିଁ। ଏହା ସହିତ କମିଶନ ‘ଶିବସେନା’ ନାମ ବ୍ୟବହାର ଉପରେ ମଧ୍ୟ କଟକଣା ଲଗାଇଛନ୍ତି। ଅର୍ଥାତ୍ ଆଗାମୀ ଉପନିର୍ବାଚନରେ ଉଭୟ ଉଦ୍ଧବ ଓ ସିନ୍ଦେ ଗୋଷ୍ଠୀ ଶିବସେନା ଦଳର ନାମ କି ଚିହ୍ନ ବ୍ୟବହାର କରିପାରିବେ ନାହିଁ। ଉପନିର୍ବାଚନ ପାଇଁ ଉଭୟ ଗୋଷ୍ଠକୁ ନୂଆ ନିର୍ବାଚନ ଚିହ୍ନ ଦିଆଯିବ ବୋଲି ଆୟୋଗ କହିଛନ୍ତି ।
ଗତ କିଛି ମାସ ଧରି ଶିବସେନାର ‘ଧନୁ-ତୀର’ ଚିହ୍ନ ଉପରେ ଟିମ୍ ଉଦ୍ଧବ ଏବଂ ଟିମ୍ ସିନ୍ଦେ ମଧ୍ୟରେ ଟଣାଓଟରା ଚାଲିଥିଲା । ଉଭୟ ଗୋଷ୍ଠୀ ନିଜକୁ ପ୍ରକୃତ ଶିବସେନା କହି ଦଳର ଚିହ୍ନ ବ୍ୟବହାର କରିବାକୁ ଦାବି ଉପସ୍ଥାପନ କରିଥିଲେ । ଉଦ୍ଧବ ଠାକରେ ଏହାକୁ ନିଜ ପିତାଙ୍କ ଦଳ ବୋଲି କହି ଦାବି କରୁଥିବାବେଳେ ସିଏମ ସିନ୍ଦେଙ୍କ ଯୁକ୍ତି ଥିଲା ଯେ ଗଣତନ୍ତ୍ରରେ ସଂଖ୍ୟାଗରିଷ୍ଠ ଦଳ ହିଁ ପ୍ରକୃତ ଶିବସେନା | କିନ୍ତୁ ବର୍ତ୍ତମାନ ନିର୍ବାଚନ ଆୟୋଗଙ୍କ ଏହି ଘୋଷଣା ପରେ ଉଭୟ ଗୋଷ୍ଠୀ ଦଳର ନାମ ଓ ପ୍ରତୀକ ବ୍ୟବହାରରୁ ବଞ୍ଚିତ ହୋଇଛନ୍ତି।
ଉଲ୍ଲେଖଯୋଗ୍ୟ ଯେ ଅନ୍ଧେରି ଇଷ୍ଟରେ ହେବାକୁ ଥିବା ଉପ-ନିର୍ବାଚନକୁ ଦୃଷ୍ଟିରେ ରଖି ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଗୁରୁବାର ନିର୍ବାଚନ ଆୟୋଗଙ୍କୁ ଚିଠି ଲେଖି ଶିବସେନାର ନିର୍ବାଚନ ଚିହ୍ନ ଧନୁ-ତୀର ଉପରେ ଦାବି ଉପସ୍ଥାପନ କରିଥିଲେ। ଉଦ୍ଧବ ଗୋଷ୍ଠୀ ଏହାକୁ ବିରୋଧ କରି ଦଳର ଚିହ୍ନ ଉପରେ ଏହାର ହକ୍ ଅଛି ବୋଲି କହିଥିଲା । ଏନେଇ ଉଭୟ ଗୋଷ୍ଠୀ ପକ୍ଷରୁ ନିର୍ବାଚନ ଆୟୋଗ ନିକଟରେ ଜବାବ ଦାଖଲ କରିଥିଲେ ।
Comments are closed.