ଆଜି ପୁଣି ‘ଦିଲ୍ଲୀ ଚଲୋ’ ଅଭିଯାନ ଆରମ୍ଭ କରିବେ କୃଷକ

ନୂଆଦିଲ୍ଲୀ: ଆଜି କୃଷକଙ୍କ ‘ଦିଲ୍ଲୀ ଚଲୋ’ ଆନ୍ଦୋଳନର ଦ୍ୱିତୀୟ ଦିନ। ଗତକାଲି ଶମ୍ଭୁ ସୀମାରେ ପୋଲିସ ସହ ସଂଘର୍ଷ ପରେ କୃଷକମାନେ ଦିଲ୍ଲୀ ଯାତ୍ରାକୁ ସ୍ଥଗିତ ରଖିଥିଲେ। ବିକ୍ଷୋଭକାରୀ କୃଷକମାନେ ଆଜି ପୁଣି ଦିଲ୍ଲୀ ଅଭିମୁଖେ ଯାତ୍ରା ଆରମ୍ଭ କରିବେ। ଗତକାଲି ପଞ୍ଜାବ-ହରିୟାଣ ଶମ୍ଭୁ ସୀମାରେ କୃଷକ ଓ ହରିୟାଣା ପୋଲିସ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା। ବ୍ୟାରିକେଡ୍ ଭାଙ୍ଗିବାକୁ ଉଦ୍ୟମ କରୁଥିବା ଚାଷୀଙ୍କୁ ଘଉଡ଼ାଇବା ପାଇଁ ପୋଲିସ ଲୁହବୁହା ଗ୍ୟାସ ପ୍ରୟୋଗ କରିଥିଲା । ଚାଷୀଙ୍କ ସହ ପୋଲିସର ସଂଘର୍ଷରେ ଉଭୟ ପକ୍ଷର ଅନେକ ଆହତ ହୋଇଥିଲେ। ଆହତଙ୍କ ମଧ୍ୟରେ ଜଣେ ପୋଲିସ ଡିଏସପି ମଧ୍ୟ ଅଛନ୍ତି। ସର୍ବନିମ୍ନ ସହାୟକ ମୂଲ୍ୟ (ଏମ୍ଏସପି) ନେଇ କୃଷକମାନେ ଆଇନ ଆଣିବାକୁ ଦାବି କରୁଛନ୍ତି ।

ଚାଷୀଙ୍କୁ ଅଟକାଇବା ପାଇଁ ଦିଲ୍ଲୀର ସମସ୍ତ ସୀମା ସିଲ୍ କରାଯାଇଛି। ସିଙ୍ଗୁ ସୀମା, ଟିକିରୀ ଏବଂ ଗାଜିପୁର ସୀମାରେ ବହୁ ସଂଖ୍ୟକ ପୋଲିସ ଫୋର୍ସ ମୁତୟନ ହୋଇଛନ୍ତି। କଣ୍ଟା ତାର ଏବଂ ସିମେଣ୍ଟ ବ୍ୟାରିକେଡ୍ ଦ୍ୱାରା ସୀମା ସିଲ୍ ‌ହୋଇଛି । କୃଷକମାନେ ସେମାନଙ୍କ ଦାବି ପୂରଣ ନେଇ ଅଟଳ ରହିଛନ୍ତି। ସେମାନେ କହିଛନ୍ତି ଯେ ସରକାର ସେମାନଙ୍କ ଦାବି ପ୍ରତି ଗମ୍ଭୀର ନୁହଁନ୍ତି। ଏଭଳି ପରିସ୍ଥିତିରେ କୃଷକମାନେ ସମସ୍ତ ବାଧାବିଘ୍ନ ସତ୍ତ୍ୱେ ଆଜି ପୁଣି ଦିଲ୍ଲୀ ଯିବାକୁ ଚେଷ୍ଟା କରିବେ।