ୱାଶିଂଟନ୍: ଆମେରିକାର ପ୍ରଥମ ମହିଳା ପରରାଷ୍ଟ୍ର ସଚିବ ମ୍ୟାଡେଲିନ୍ ଆଲବ୍ରାଇଟଙ୍କ ପରଲୋକ ହୋଇଯାଇଛି। ସେ କ୍ୟାନ୍ସରରେ ପୀଡ଼ିତ ଥିଲେ। ବୁଧବାର ତାଙ୍କ ପରିବାର ଏହି ସୂଚନା ଦେଇଛନ୍ତି। ଆଲବ୍ରାଇଟଙ୍କୁ ୮୪ ବର୍ଷ ବୟସ ହୋଇଥିଲା | ତତ୍କାଳୀନ ରାଷ୍ଟ୍ରପତି ବିଲ୍ କ୍ଲିଣ୍ଟନ୍ ୧୯୯୬ରେ ଅଲବ୍ରାଇଟଙ୍କୁ ବୈଦେଶିକ ସଚିବ ଭାବରେ ନିଯୁକ୍ତ କରିଥିଲେ ଏବଂ ସେ କ୍ଲିଣ୍ଟନ୍ ପ୍ରଶାସନର ଶେଷ ଚାରି ବର୍ଷ ଏହି ପଦବୀରେ ରହିଥିଲେ। ସେହି ସମୟରେ ଆମେରିକାର ଇତିହାସରେ ମ୍ୟାଡଲିନ୍ ଅଲବ୍ରାଇଟ୍ ଏକ ସର୍ବୋଚ୍ଚ ପଦବୀରେ ଅବସ୍ଥାପିତ ମହିଳା ଥିଲେ।
ଅଲବ୍ରାଇଟଙ୍କ ସମ୍ପୂର୍ଣ୍ଣ ନାମ ହେଉଛି ମ୍ୟାଡଲିନ୍ ଜାନା କୋରବେଲ ଅଲବ୍ରାଇଟ୍ । ସେ ୧୫ ମଇ ୧୯୩୭ରେ ଜନ୍ମଗ୍ରହଣ କରିଥିଲେ। ଅଲବ୍ରାଇଟ୍ ୧୯୯୭ ରୁ ୨୦୦୧ ପର୍ଯ୍ୟନ୍ତ ଯୁକ୍ତରାଷ୍ଟ୍ର ଆମେରିକାର ୬୪ତମ ବୈଦେଶିକ ସଚିବ ଭାବରେ ଦାୟିତ୍ବ ତୁଲାଇଥିଲେ। ଅଲବ୍ରାଇଟ୍ ୧୯୪୮ ମସିହାରେ ଚେକୋସ୍ଲୋଭାକିଆରୁ ଆମେରିକାକୁ ଯାଇଥିଲେ। ତାଙ୍କ ପିତା କୂଟନୀତିଜ୍ଞ ଜୋସେଫ କୋରବେଲ ନିଜ ପରିବାରକୁ କଲରାଡୋର ଡେନଭରକୁ ନେଇ ସେଠାରେ ଅବସ୍ଥାନ କରିଥିଲେ। ଏବଂ ସେ ୧୯୫୭ ମସିହାରେ ଆମେରିକାର ନାଗରିକତ୍ବ ଗ୍ରହଣ କରିଥିଲେ।
ଅଲବ୍ରାଇଟ୍ ୧୯୫୯ରେ ୱେଲ୍ସଲି କଲେଜରୁ ସ୍ନାତକ ଶିକ୍ଷା ସମାପ୍ତ କରିବା ପରେ ପ୍ରାଗ ସ୍ପ୍ରିଙ୍ଗ ଉପରେ ଗବେଷଣା ପୂର୍ବକ ୧୯୭୫ ରେ କଲମ୍ବିଆ ୟୁନିଭରସିଟିରୁ ପିଏଚଡି କରିଥିଲେ । ଅଲବ୍ରାଇଟ୍ ୧୯୯୩ରେ ମିଳିତ ଜାତିସଂଘରେ ଆମେରିକାର ରାଷ୍ଟ୍ରଦୂତ ଭାବରେ ନିଯୁକ୍ତ ହୋଇଥିଲେ | ୧୯୯୭ ପର୍ଯ୍ୟନ୍ତ ସେ ବୈଦେଶିକ ସଚିବ ହେବା ପର୍ଯ୍ୟନ୍ତ ଏହି ପଦବୀରେ ରହିଥିଲେ। ୨୦୦୧ରେ କ୍ଲିଣ୍ଟନ୍ ଅଫିସ୍ ଛାଡିବା ପର୍ଯ୍ୟନ୍ତ ଆଲବ୍ରାଇଟ୍ ସେହି କ୍ଷମତାରେ କାର୍ଯ୍ୟ କରିଥିଲେ |
Comments are closed.