ଓ୍ବେଲିଂଟନ: ନଭେମ୍ବର ୧୮ ରୁ ଭାରତ ବିପକ୍ଷରେ ତିନୋଟି ଟି-୨୦ ଓ ସମାନ ସଂଖ୍ୟକ ଦିନିକିଆ ସିରିଜ୍ ପାଇଁ ନ୍ୟୁଜିଲାଣ୍ଡ ଦଳ ଘୋଷଣା ହୋଇଛି। ଭାରତ ବିପକ୍ଷ ଉଭୟ ଦିନିକିଆ ଏବଂ ଟି-୨୦ ସିରିଜରୁ ଷ୍ଟାର୍ ଦ୍ରୁତ ବୋଲର ଟ୍ରେଣ୍ଟ ବୋଲ୍ଟ ଏବଂ ଓପନିଂ ବ୍ୟାଟ୍ସମ୍ୟାନ୍ ମାର୍ଟିନ ଗପ୍ଟିଲ ବାଦ୍ ପଡିଛନ୍ତି । ଚୟନକର୍ତ୍ତାମାନେ ଉଭୟ ସିରିଜ୍ ପାଇଁ ଯୁବ ବ୍ୟାଟ୍ସମ୍ୟାନ୍ ଫିନ୍ ଆଲେନଙ୍କୁ ଦଳରେ ସ୍ଥାନ ଦେଇଛନ୍ତି। ଦୁଇ ଦଳ ମଧ୍ୟରେ ପ୍ରଥମ ଟି-୨୦ ୱେଲିଂଟନରେ ୧୮ ନଭେମ୍ବରରେ ଖେଳାଯିବ | ଆଲେନ୍ ପ୍ରଥମ ଥର ପାଇଁ ଭାରତ ବିପକ୍ଷରେ ଖେଳିବେ । ଏହି ୨୩ ବର୍ଷୀୟ ବ୍ୟାଟ୍ସମ୍ୟାନ୍ ନ୍ୟୁଜିଲାଣ୍ଡ ପାଇଁ ଏପର୍ଯ୍ୟନ୍ତ ୨୩ ଟି-୨୦ ଏବଂ ୮ଟି ଦିନିକିଆ ଖେଳିଛନ୍ତି। ସେ ଉଭୟ ଫର୍ମାଟରେ ୫ଟି ଅର୍ଦ୍ଧଶତକ ଓ ଗୋଟିଏ ଶତକ ହାସଲ କରିଛନ୍ତି | ଦଳରେ ଆଲେନଙ୍କୁ ସାମିଲ କରାଯିବା ପରେ ଏହା ସ୍ପଷ୍ଟ ହୋଇଛି ଯେ ଟପ୍ ଅର୍ଡରରେ ଗପ୍ଟିଲଙ୍କ ସ୍ଥାନ ଆଉ ସୁରକ୍ଷିତ ନୁହେଁ ।
ଭାରତ ବିପକ୍ଷ ସିରିଜ୍ ପାଇଁ ଟ୍ରେଣ୍ଟ ବୋଲ୍ଟଙ୍କୁ ମଧ୍ୟ ନ୍ୟୁଜିଲାଣ୍ଡ ଦଳରେ ସ୍ଥାନ ମିଳିନାହିଁ । ପେସ୍ ବିଭାଗ ଦାୟିତ୍ବ ଟିମ୍ ସାଉଦି, ମ୍ୟାଟ୍ ହେନେରୀ (କେବଳ ଦିନିକିଆ), ଲକି ଫର୍ଗୁସନ୍, ବ୍ଲେୟାର ଟିକନର୍ ଏବଂ ଆଡାମ ମିଲନେଙ୍କ ଉପରେ ରହିବ । ୨୦୧୭ ପରେ ଏହି ସିରିଜରୁ ମିଲନେ ଅନ୍ତର୍ଜାତୀୟ ଦିନିକିଆକୁ ପ୍ରତ୍ୟାବର୍ତ୍ତନ କରିବେ | ସେ ଘରୋଇ ମାଟିରେ ଅନୁଷ୍ଠିତ ଶେଷ ତ୍ରାରଷ୍ଟ୍ରୀୟ ଟି-୨୦ ସିରିଜରେ ଖେଳିଥିଲେ। ଦିନିକିଆରେ ୱିକେଟ୍ ରକ୍ଷକ ଦାୟିତ୍ୱ ଟମ୍ ଲାଥାମ୍ ତୁଲାଇବାକୁ ଥିବାବେଳେ ଡେଭନ୍ କନୱେ ଟି-୨୦ ରେ ସମାନ ଭୂମିକା ଗ୍ରହଣ କରିବେ | ତାଙ୍କ ବିବାହ ପାଇଁ ପ୍ରସ୍ତୁତି ଯୋଗୁଁ ଜିମି ନିଶାମ ତୃତୀୟ ଦିନିକିଆ ଖେଳିବେ ନାହିଁ | ତାଙ୍କ ସ୍ଥାନରେ ହେନେରୀ ନିକୋଲସ୍ ଭାରତ ବିପକ୍ଷ ଅନ୍ତିମ ଦିନିକିଆରେ ଖେଳିବେ । ଆଘାତ ଯୋଗୁଁ କାଇଲ୍ ଜେମିସନଙ୍କ ନାମ ଭାରତ ସିରିଜ୍ ପାଇଁ ବିଚାର କରାଯାଇନଥିଲା |
ନ୍ୟୁଜିଲ୍ୟାଣ୍ଡର କୋଚ୍ ଗ୍ୟାରି ଷ୍ଟେଡ୍ କହିଛନ୍ତି ଯେ ବୋଲ୍ଟ ଏବଂ ଗପ୍ଟିଲଙ୍କ ପରି ଅଭିଜ୍ଞ ଖେଳାଳିଙ୍କୁ ଛାଡିବା ସହଜ ନୁହେଁ। କିନ୍ତୁ ଦଳକୁ ଆଗକୁ ଦେଖିବାକୁ ପଡ଼ିବ | ଚଳିତ ବର୍ଷ ଅଗଷ୍ଟରେ ଯେତେବେଳେ ଟ୍ରେଣ୍ଟ ବୋଲ୍ଟ ନ୍ୟୁଜିଲ୍ୟାଣ୍ଡ କ୍ରିକେଟ୍ କେନ୍ଦ୍ରୀୟ ଚୁକ୍ତିରୁ ଓହରିବାକୁ ନିଷ୍ପତ୍ତି ନେଇଥିଲେ, ସେତେବେଳେ ସ୍ଥିର ହୋଇଥିଲା ଯେ କେବଳ ସେହି ଖେଳାଳିଙ୍କୁ ପ୍ରାଥମିକତା ଦିଆଯିବ ଯେଉଁମାନଙ୍କର କେନ୍ଦ୍ରୀୟ କିମ୍ବା ଘରୋଇ ଚୁକ୍ତି ରହିଛି ଏବଂ ଏହି ସିରିଜ୍ ପାଇଁ ଦଳ ବାଛିବାବେଳେ ଆମେ ଏହାକୁ ଧ୍ୟାନରେ ରଖିଛୁ। । ଜଣେ ବୋଲର ଭାବେ ଆମେ ସମସ୍ତେ ବୋଲ୍ଟଙ୍କ ଦକ୍ଷତା ଜାଣୁ | କିନ୍ତୁ ଏହି ସମୟରେ ଯେହେତୁ ଆମେ ବଡ଼ ଟୁର୍ନାମେଣ୍ଟ ଆଡକୁ ଯାଉଛୁ, ତେଣୁ ଆମେ ଯୁବ ଖେଳାଳିଙ୍କୁ ଅଧିକ ସୁଯୋଗ ଦେବାକୁ ଚାହୁଁଛୁ |
ସେ ଆହୁରି ମଧ୍ୟ କହିଛନ୍ତି, ‘ହ୍ବାଇଟ୍-ବଲ୍ କ୍ରିକେଟ୍ ରେ ଟପ୍ କ୍ରମରେ ଫିନଙ୍କ ଉଭା ହେବା ଏବଂ ସଫଳତାର ଅର୍ଥ ହେଉଛି ମାର୍ଟିନ୍ ଗପ୍ଟିଲଙ୍କ ପରି ଜଣେ ବ୍ୟାଟ୍ସମ୍ୟାନଙ୍କୁ ଦଳରୁ ବାହାର କରିବାକୁ ପଡ଼ିଲା । ଆସନ୍ତା ବର୍ଷ ଭାରତରେ ଦିନିକିଆ ବିଶ୍ୱକପ ଅନୁଷ୍ଠିତ ହେବ। ଆମେ ଏଲେନଙ୍କୁ ଅଧିକ ସୁଯୋଗ ଦେବାକୁ ଚାହୁଁଛୁ | ବିଶେଷକରି ଭାରତ ଭଳି ଦଳ ବିପକ୍ଷରେ।
ସିରିଜ୍ ଭାରତ ଏବଂ ନ୍ୟୁଜିଲ୍ୟାଣ୍ଡ ମଧ୍ୟରେ ପ୍ରଥମେ ଟି-୨୦ ସିରିଜ୍ ଖେଳାଯିବ | ସିରିଜର ପ୍ରଥମ ମ୍ୟାଚ୍ ନଭେମ୍ବର ୧୦୮ରେ ୱେଲିଙ୍ଗଟନରେ ଅନୁଷ୍ଠିତ ହେବ । ଦ୍ୱିତୀୟ ମ୍ୟାଚ୍ ନଭେମ୍ବର ୨୦ ରେ ତୌରଙ୍ଗା ଏବଂ ତୃତୀୟ ଟି-୨୦ ନଭେମ୍ବର ୨୨ ରେ ନାପିଅରରେ ଖେଳାଯିବ | ପ୍ରଥମ ଦିନିକିଆ ୨୫ ନଭେମ୍ବରରେ ଅକଲ୍ୟାଣ୍ଡରେ ଅନୁଷ୍ଠିତ ହେବ | ଦ୍ୱିତୀୟ ୨୭ ନଭେମ୍ବରରେ ହାମିଲଟନରେ ଏବଂ ତୃତୀୟ ଦିନିକିଆ ୩୦ ନଭେମ୍ବରରେ ଖ୍ରୀଷ୍ଟଚର୍ଚରେ ଖେଳାଯିବ | ଦିନିକିଆ ସିରିଜରେ ଟିମ୍ ସାଉଦିଙ୍କୁ ତାଙ୍କର ୨୦୦ ୱିକେଟ୍ ପୂରଣ କରିବାର ସୁଯୋଗ ମିଳିବ |
ନ୍ୟୁଜିଲାଣ୍ଡ ଦିନିକିଆ ଓ ଟି-୨୦ ଦଳ:
କେନ୍ ୱିଲିୟମ୍ସନ୍ (କ୍ୟାପଟେନ୍), ଫିନ୍ ଆଲେନ୍, ମାଇକେଲ୍ ବ୍ରେସୱେଲ, ଡେଭନ୍ କନୱେ (ଟି -20 ଓ୍ବିକେଟକିପର), ଲକି ଫର୍ଗୁସନ୍, ମ୍ୟାଟ ହେନେରୀ (ଦିନିକିଆ), ଟମ ଲାଥାମ (ଦିନିକିଆ), ଡାରିଲ ମିଚେଲ, ଆଡାମ ମିଲନେ, ଜିମି ନିଶାମ, ଗ୍ଲେନ ଫିଲିପ୍ସ, ମିଚେଲ ସାଣ୍ଟନର୍, ଇଶ୍ ସୋଧୀ (ଟି-୨୦), ଟିମ୍ ସାଉଦି, ବ୍ଲେୟାର ଟିକନର୍ (ଟି-୨୦) |
Comments are closed.