ନୂଆଦିଲ୍ଲୀ: ପାରମ୍ପରିକ ପ୍ରତିଦ୍ୱନ୍ଦ୍ୱୀ ଭାରତ ଓ ପାକିସ୍ତାନ ମଧ୍ୟରେ ବହୁ ପ୍ରତୀକ୍ଷିତ ଦିନିକିଆ ବିଶ୍ୱକପ୍ ମୁକାବିଲା ବର୍ତ୍ତମାନ ଅକ୍ଟୋବର ୧୫ ପରିବର୍ତ୍ତେ ଅକ୍ଟୋବର ୧୪ରେ ଖେଳାଯିବ | ଆଇସିସି ଏହା ନିଶ୍ଚିତ କରିବା ସହ ବୁଧବାର ଟୁର୍ଣ୍ଣାମେଣ୍ଟର ୯ଟି ମ୍ୟାଚ୍ କାର୍ଯ୍ୟସୂଚୀରେ ପରିବର୍ତ୍ତନ ଘୋଷଣା କରିଛି।
ସଦ୍ୟତମ ଅପଡେଟ୍ ପରେ ପାକିସ୍ତାନ ଓ ଇଂଲଣ୍ଡର ତିନୋଟି ମ୍ୟାଚ୍ର କାର୍ଯ୍ୟସୂଚୀ (ତାରିଖ କିମ୍ବା ସମୟ) ପରିବର୍ତ୍ତନ କରାଯାଇଛି। ଭାରତର ଦୁଇଟି ମ୍ୟାଚ୍ର ତାରିଖ ବଦଳିଛି ।
ନଭେମ୍ବର ୧୧ରେ ନେଦରଲ୍ୟାଣ୍ଡ୍ସ ବିପକ୍ଷରେ ଭାରତର ଅନ୍ତିମ ଲିଗ୍ ମ୍ୟାଚର ତାରିଖ ମଧ୍ୟ ପୁନଃ ନିର୍ଦ୍ଧାରିତ ହୋଇଛି । ଏହି ମ୍ୟାଚ୍ ବର୍ତ୍ତମାନ ନଭେମ୍ବର ୧୨ରେ ବେଙ୍ଗାଲୁରୁରେ ଖେଳାଯିବ।
ଅକ୍ଟୋବର ୧୫ରେ ନବରାତ୍ରିର ପ୍ରଥମ ଦିନ ହୋଇଥିବାରୁ ସୁରକ୍ଷା ଏଜେନ୍ସିଗୁଡିକ ଭାରତ ବନାମ ପାକିସ୍ତାନ ମ୍ୟାଚ୍ ପାଇଁ ପର୍ଯ୍ୟାପ୍ତ ସୁରକ୍ଷା ଯୋଗାଇବାରେ ସେମାନଙ୍କର ଅକ୍ଷମତା ପ୍ରକାଶ କରିଥିଲେ | ତେଣୁ ଏହି ହାଇ ଭୋଲଟେଜ୍ ମ୍ୟାଚ୍ ଦିନକ ପୂର୍ବରୁ ଅର୍ଥାତ ଅକ୍ଟୋବର ୧୪ରେ ଖେଳାଯିବ ।
ଫଳସ୍ୱରୂପ ଅକ୍ଟୋବର ୧୪ରେ ନୂଆଦିଲ୍ଲୀରେ ହେବାକୁ ଥିବା ଆଫଗାନିସ୍ତାନ ବିପକ୍ଷରେ ଇଂଲଣ୍ଡର ମ୍ୟାଚ୍ ବର୍ତ୍ତମାନ
ଅକ୍ଟୋବର ୧୫କୁ ଘୁଞ୍ଚିଛି ।
ଭାରତ ବିପକ୍ଷ ମୁକାବିଲା ପୂର୍ବରୁ ପାକିସ୍ତାନକୁ ପର୍ଯ୍ୟାପ୍ତ ସମୟ ଦେବାକୁ ଅକ୍ଟୋବର ୧୧ରେ ହାଇଦ୍ରାବାଦରେ ହେବାକୁ ଥିବା ଶ୍ରୀଲଙ୍କା ବିପକ୍ଷ ଏହାର ମ୍ୟାଚ୍ ବର୍ତ୍ତମାନ ଅକ୍ଟୋବର ୧୦ରେ ଖେଳାଯିବ ।
ସେହି ଦିନ ଇଂଲଣ୍ଡ ଧର୍ମଶାଳାରେ ବାଂଲାଦେଶ ବିପକ୍ଷରେ ଦିବାରାତ୍ର ମ୍ୟାଚ୍ ଖେଳିବାକୁ ଥିଲା । କିନ୍ତୁ ବର୍ତ୍ତମାନ ଏହି ମ୍ୟାଚ୍ ସକାଳ ୧୦.୩୦ରୁ ଖେଳାଯିବ।
ଇଂଲଣ୍ଡ ଏବଂ ପାକିସ୍ତାନ ମଧ୍ୟରେ ମ୍ୟାଚ୍ ଏବେ ୧୨ ନଭେମ୍ବର ପରିବର୍ତ୍ତେ ୧୧ ନଭେମ୍ବରରେ ଖେଳାଯିବ । ଦୁର୍ଗା ପୂଜା ପରେ ବଙ୍ଗୀୟମାନଙ୍କ ପାଇଁ ଦ୍ୱିତୀୟ ବଡ଼ ହିନ୍ଦୁ ପର୍ବ କାଳୀପୂଜା ନଭେମ୍ବର ୧୨ରେ ପାଳିତ ହେବ। ଏହି ମ୍ୟାଚ ପାଇଁ ପର୍ଯ୍ୟାପ୍ତ ସୁରକ୍ଷା ଯୋଗାଇଦେବାକୁ କୋଲକାତା ପୋଲିସର ସନ୍ଦେହ ଥିଲା । ତେଣୁ ଇଂଲଣ୍ଡ-ପାକିସ୍ତାନ ମ୍ୟାଚ୍ ତାରିଖ ଦିନକ ପୂର୍ବରୁ ଖେଳାଯିବ ।
ଚେନ୍ନାଇରେ ବାଂଲାଦେଶ ବିପକ୍ଷରେ ନ୍ୟୁଜିଲ୍ୟାଣ୍ଡର ମ୍ୟାଚ୍ ଅକ୍ଟୋବର ୧୪ରେ ଧାର୍ଯ୍ୟ ହୋଇଥିଲା । ହେଲେ ସଂଶୋଧିତ କାର୍ଯ୍ୟସୂଚୀ ଅନୁଯାୟୀ ଏହା ବର୍ତ୍ତମାନ ଅକ୍ଟୋବର ୧୩ରେ ଖେଳାଯିବ ଏବଂ ଦିବାରାତ୍ର ହେବ। ଅଷ୍ଟ୍ରେଲିଆ ଦଳ ବର୍ତ୍ତମାନ ଅକ୍ଟୋବର ୧୨ରେ ଲକ୍ଷ୍ନୌରେ ଦକ୍ଷିଣ ଆଫ୍ରିକାକୁ ଭେଟିବ ।
କୌଣସି ମ୍ୟାଚର ଭେନ୍ୟୁ ପରିବର୍ତ୍ତନ କରାଯାଇ ନାହିଁ |
ଅଗଷ୍ଟ ୨୫ରୁ ଟିକେଟ୍ ବିକ୍ରି ହେବ ଏବଂ ପ୍ରଶଂସକମାନେ ସମସ୍ତ ଅଣ-ଭାରତୀୟ ୱାର୍ମ ଅପ୍ ମ୍ୟାଚ୍ ଏବଂ ସମସ୍ତ ଅଣ-ଭାରତୀୟ ବିଶ୍ୱକପ୍ ମ୍ୟାଚ୍ ପାଇଁ ଟିକେଟ୍ କିଣିବାର ବିକଳ୍ପ ପାଇବେ |
ଅଗଷ୍ଟ ୩୦ରୁ ସେପ୍ଟେମ୍ବର ୩ ପର୍ଯ୍ୟନ୍ତ ଭାରତର ମ୍ୟାଚ୍ ପାଇଁ ଟିକେଟ ଉପଲବ୍ଧ ଥିବାବେଳେ ସେମିଫାଇନାଲ ଏବଂ ଫାଇନାଲ ପାଇଁ ଟିକେଟ୍ ୧୫ ସେପ୍ଟେମ୍ବରରୁ କ୍ରୟ କରାଯାଇପାରିବ |
Comments are closed.