ଇନ୍ଦୋର : ମୋହାଲିରେ ଫ୍ଲାଟ୍ ପିଚରେ ରନ୍ କରିବାରେ ବିଫଳ ହୋଇଥିବା ଶ୍ରେୟସ୍ ଆୟର ରବିବାର ଏଠାରେ ଖେଳାଯିବାକୁ ଥିବା ଅଷ୍ଟ୍ରେଲିଆ ବିପକ୍ଷ ଦ୍ୱିତୀୟ ଦିନିକିଆରେ ନିଜ ନାଁରେ କିଛି ରନ୍ ଯୋଡିବାକୁ ଚେଷ୍ଟା କରିବେ । ସେହିପରି ସ୍ପିନର ରବିଚନ୍ଦ୍ରନ୍ ଅଶ୍ୱିନଙ୍କ ଉପରେ ମଧ୍ୟ ଭଲ ପ୍ରଦର୍ଶନ ପାଇଁ ଚାପ ରହିବ ।
ଅଧିନାୟକ ରୋହିତ ଶର୍ମା ଓ ବିରାଟ କୋହଲିଙ୍କ ସମେତ କିଛି ପ୍ରମୁଖ ଖେଳାଳିଙ୍କ ବିନା ଖେଳୁଥିବା ଭାରତୀୟ ଦଳ ଅଷ୍ଟ୍ରେଲିଆ ବିପକ୍ଷ ପ୍ରଥମ ଦିନିକିଆରେ ସହଜ ବିଜୟ ହାସଲ କରିଥିଲା । ଭାରତ ଏବେ ହାଇ ସ୍କୋରିଂ ପାଇଁ ପରିଚିତ ହୋଲକର ଷ୍ଟାଡିୟମରେ ସିରିଜ୍ ଜିତିବାକୁ ଚାହିଁବ।
ବର୍ଷା ଯୋଗୁଁ ସହରର ତାପମାତ୍ରା ହ୍ରାସ ପାଇଛି । ମୋହାଲିରେ ଆର୍ଦ୍ର ତଥା ଗରମ ପାଣିପାଗର ସମ୍ମୁଖୀନ ହୋଇଥିବା ଖେଳାଳିମାନେ ଏଠାକୁ ଆସି ବହୁତ ଆରାମ ଅନୁଭବ କରୁଛନ୍ତି | ବିଶେଷକରି ପ୍ରଥମ ଦିନିକିଆରେ ମହମ୍ମଦ ସାମି ଏବଂ ସୂର୍ଯ୍ୟକୁମାର ଯାଦବଙ୍କ ପ୍ରଦର୍ଶନ ଭାରତ ପାଇଁ ଏକ ସକରାତ୍ମକ ଦିଗ ଥିଲା । କିନ୍ତୁ ଅକ୍ଟୋବର ୫ରୁ ବିଶ୍ୱକପ ପୂର୍ବରୁ ଭାରତ କିଛି ପ୍ରଶ୍ନର ଉତ୍ତର ଖୋଜୁଛି।
ଆଘାତରୁ ସୁସ୍ଥ ହୋଇ ଫେରିଥିବା ଭାରତର ଚାରି ନମ୍ବର ବ୍ୟାଟ୍ସମ୍ୟାନ୍ ଶ୍ରେୟସ୍ ଆୟର ବିଭିନ୍ନ କାରଣରୁ କ୍ରିଜରେ ପର୍ଯ୍ୟାପ୍ତ ସମୟ ବିତାଇ ପାରିନାହାଁନ୍ତି। ଏସିଆ କପରେ ପିଠି ସମସ୍ୟା ଯୋଗୁଁ ସେ କିଛି ମ୍ୟାଚ୍ ଖେଳିପାରିନଥିବା ବେଳେ ଶୁକ୍ରବାର ପ୍ରଥମ ଦିନିକିଆରେ ମାତ୍ର ୮ଟି ବଲ୍ ଖେଳିବା ପରେ ଆଉଟ୍ ହୋଇଯାଇଥିଲେ। ଏହି ଡାହାଣହାତୀ ବ୍ୟାଟ୍ସମ୍ୟାନ୍ ବିଶ୍ୱକପ ପୂର୍ବରୁ ନିଜର ମନୋବଳ ବଢାଇବା ପାଇଁ ପରବର୍ତ୍ତୀ ଦୁଇଟି ଦିନିକିଆରେ ରନ୍ କରିବାକୁ ଚେଷ୍ଟା କରିବେ।
ଅନ୍ୟପକ୍ଷରେ ଅଶ୍ୱିନ ଫେରିବା ପରେ ରନ୍ ରୋକିଥିଲେ ମଧ୍ୟ ଅଷ୍ଟ୍ରେଲୀୟ ବ୍ୟାଟ୍ସମ୍ୟାନଙ୍କୁ ସେଭଳି ଅସୁବିଧାରେ ପକାଇ ପାରିନଥିଲେ। ସେ ଏକ ଫ୍ଲାଟ ୱିକେଟ୍ ଟର୍ଣ୍ଣ କରିବାରେ ଅସମର୍ଥ ହୋଇଥିଲେ ଏବଂ ତାଙ୍କ ସିଧା ବଲକୁ ବ୍ୟାଟ୍ସମ୍ୟାନମାନେ ସହଜରେ ଖେଳିଥିଲେ।
ଯଦି ଅକ୍ଷର ପଟେଲ ଠିକ୍ ସମୟରେ ଫିଟ୍ ନୁହଁନ୍ତି, ତେବେ ଏହି ଷ୍ଟାର ସ୍ପିନର ତଥାପି ଭାରତର ବିଶ୍ୱକପ ଦଳରେ ସ୍ଥାନ ପାଇପାରିବେ । କିନ୍ତୁ ଟିମ୍ ମ୍ୟାନେଜମେଣ୍ଟ ତାଙ୍କଠାରୁ ଭଲ ପ୍ରଦର୍ଶନ ଆଶା କରିବ | ଦଳରେ ସାମିଲ ଅନ୍ୟ ଜଣେ ଅଫ୍ ସ୍ପିନର ୱାଶିଂଟନ୍ ସୁନ୍ଦରଙ୍କୁ ସୁଯୋଗ ମିଳୁଛି କି ନାହିଁ ମଧ୍ୟ ଦେଖିବାକୁ ବାକି ରହିଲା । ଯଦି ସେ ଚୂଡ଼ାନ୍ତ ଏକାଦଶରେ ସ୍ଥାନ ପାଆନ୍ତି ତେବେ ଅଶ୍ୱିନଙ୍କୁ ବାହାରେ ବସିବାକୁ ପଡିପାରେ |
Comments are closed.