ଆଣ୍ଟିଗୁଆ: କୁଲିଜ୍ କ୍ରିକେଟ୍ ଗ୍ରାଉଣ୍ଡରେ ଖେଳାଯାଇଥିବା ଅଣ୍ଡର -୧୯ ବିଶ୍ୱକପ୍ର ସେମିଫାଇନାଲରେ ଭାରତ ଅଷ୍ଟ୍ରେଲିଆକୁ ୯୬ ରନରେ ହରାଇ ଫାଇନାଲରେ ପ୍ରବେଶ କରିଛି। ଏହା ସହିତ ଟିମ୍ ଇଣ୍ଡିଆ ଫାଇନାଲରେ ପହଞ୍ଚିଛି | ଫେବୃଆରୀ ୫ରେ ଖେଳାଯିବାକୁ ଥିବା ଫାଇନାଲରେ ଭାରତର ମୁକାବିଲା ଇଂଲଣ୍ଡ ସହ ହେବ | ଭାରତ ଲଗାତାର ଚତୁର୍ଥ ଥର ପାଇଁ ଅଣ୍ଡର -୧୯ ବିଶ୍ୱକପ୍ର ଫାଇନାଲରେ ପହଞ୍ଚିଛି।
ଭାରତ ପ୍ରଥମେ ବ୍ୟାଟିଂ କରି ୫୦ ଓଭରରେ ପାଞ୍ଚ ଓ୍ବିକେଟ୍ ହରାଇ ୨୯୦ ରନ୍ ଚ୍ୟାଲେଞ୍ଜିଂ ସ୍କୋର୍ କରିଥିଲା। ଏହାର ଜବାବରେ ଅଷ୍ଟ୍ରେଲୀୟ ଦଳ ୧୯୪ ରନରେ ଅଲ୍ଆଉଟ୍ ହୋଇଯାଇଥିଲା । ଭାରତ ପକ୍ଷରୁ ଅଧିନାୟକ ୟଶ୍ ଧୂଲ ଚମତ୍କାର ୧୧୦ ରନର ଇନିଂସ୍ ଖେଳିଥିଲେ । ଏହି ଶତକୀୟ ଇନିଂସରେ ଧୂଲ୍ ୧୦ଟି ଚୌକା ଓ ଗୋଟିଏ ଛକା ମାରିଥିଲେ । ବୋଲିଂରେ ଭିକି ଓସୱାଲ ସର୍ବାଧିକ ତିନିଟି ୱିକେଟ୍ ନେଇଥିଲେ।
ସେମିଫାଇନାଲ ମ୍ୟାଚରେ ଭାରତୀୟ ଅଧିନାୟକ ୟଶ୍ ଧୂଲ୍ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ। ତେବେ ପ୍ରାରମ୍ଭରେ ଏହି ନିଷ୍ପତ୍ତି ଭୁଲ ମନେ ହେଉଥିଲା କାରଣ ଟିମ୍ ଇଣ୍ଡିଆ ଉଭୟ ଇନଫର୍ମ ଓପନରଙ୍କ ୱିକେଟ୍ ମାତ୍ର ୩୭ ରନରେ ହରାଇଥିଲା। ଅଙ୍ଗକ୍ରୀଶ ରଘୁବଂଶୀ ୩୦ଟି ବଲରେ ୬ ରନ୍ କରି ଆଉଟ୍ ହୋଇଥିବା ବେଳେ ହାର୍ନୁର ସିଂଙ୍କ ମାତ୍ର ୧୬ ରନ୍ କରିଥିଲେ | ଏହା ପରେ ଉପଅଧିନାୟକ ଶେକ୍ ରସିଦ ଏବଂ ଅଧିନାୟକ ୟଶ ଧୂଲ୍ ଦଳୀୟ ସ୍ଥିତି ସମ୍ଭାଳିଥିଲେ ଏବଂ ପଞ୍ଚମ ଓ୍ବିକେଟରେ ୨୦୪ ରନର ଭାଗିଦାରୀ କରିଥିଲେ। ତେବେ ରସିଦ ଶତକରୁ ବଞ୍ଚିତ ହୋଇଥିଲେ। ସେ ଆଠଟି ଚୌକା ଓ ଗୋଟିଏ ଛକା ସହାୟତାରେ ୧୦୮ ବଲରେ ୯୪ ରନ୍ ସଂଗ୍ରହ କରିଥିଲେ। ଅଧିନାୟକ ୟଶ ଧୂଲ୍ ୧୧୦ ରନର ନିର୍ଣ୍ଣାୟକ ଇନିଂସ ଖେଳିଥିଲେ। ଏଥିସହିତ ରାଜବର୍ଦ୍ଧନ ହାଙ୍ଗରଗେକର ୧୦ଟି ବଲରେ ୧୩ ରନ୍ ସଂଗ୍ରହ କରିଥିବା ବେଳେ ନିଶାନ୍ତ ସିନ୍ଧୁ ୧୨ ଏବଂ ୱିକେଟ୍ କିପର ଦୀନେଶ ବାନା ମାତ୍ର ଚାରିଟି ବଲରେ ୨୦ ରନ୍ ସ୍କୋର କରି ଅପରାଜିତ ରହିଥିଲେ।
୨୯୧ ରନ୍ ଟାର୍ଗେଟର ପିଛା କରିବାକୁ ଯାଇ ଅଷ୍ଟ୍ରେଲିଆ ଦଳର ଆରମ୍ଭ ଭଲ ହୋଇନଥିଲା। ଟିଗ ୱିଲି ମାତ୍ର ୧ ରନ୍ କରିବା ପରେ ପାଭିଲିୟନକୁ ଫେରିଥିଲେ। ଏହା ପରେ କ୍ୟାମ୍ପବେଲ କେଲାୱେ ଏବଂ କୋରି ମିଲର ୬୮ ରନ୍ ଯୋଡିଥିଲେ | କେଲାୱେ ୩୦ ଏବଂ ମିଲର୍ ୩୮ ରନ୍ କରିବା ପରେ ଆଉଟ୍ ହୋଇଥିଲେ | ଏହା ପରେ ଅଧିନାୟକ କପୁର୍ କନୋଲି ମାତ୍ର ୩ ରନ୍ କରି ପ୍ୟାଭିଲିୟନ ଫେରିଥିଲେ। ଲାଚଲାନ୍ ଖା ୫୧ ରନ୍ ର ଏକ ଲଢୁଆ ଇନିଂସ ଖେଳିଥିଲେ ମଧ୍ୟ ଅଷ୍ଟ୍ରେଲିଆକୁ ପରାଜୟରୁ ବଞ୍ଚାଇବା ପାଇଁ ଏହା ଯଥେଷ୍ଟ ନଥିଲା । କାରଣ ଅନ୍ୟ ପଟେ ତାଙ୍କୁ ସମର୍ଥନ ମିଳିନଥିଲା। ନିଭଥାନ୍ ରାଧାକ୍ରିଷ୍ଣନ୍ ୧୧, ୱିଲିୟମ୍ ସାଲଜମ୍ୟାନ୍ ୭ ଏବଂ ଟୋବିୟସ୍ ସ୍ନେଲ ୪ ରନ୍ କରି ଆଉଟ୍ ହୋଇଥିଲେ।
Comments are closed.