ନୂଆଦିଲ୍ଲୀ: ଡିଫେଣ୍ଡିଂ ଚାମ୍ପିଅନ ବାଂଲାଦେଶକୁ ପାଞ୍ଚ ୱିକେଟରେ ପରାସ୍ତ କରି ଭାରତ ଆଇସିସି ଅଣ୍ଡର-୧୯ ବିଶ୍ୱକପ ୨୦୨୨ର ସେମିଫାଇନାଲରେ ପ୍ରବେଶ କରିଛି । ଏଥିସହ ଭାରତ ୨୦୨୦ ସଂସ୍କରଣ ଫାଇନାଲରେ ପରାଜୟର ମଧୁର ପ୍ରତିଶୋଧ ବି ନେଇଛି । ସେମିଫାଇନାଲରେ ଭାରତର ମୁକାବିଲା ବୁଧବାର ଅଷ୍ଟ୍ରେଲିଆ ସହ ହେବ । ଅନ୍ୟ ଏକ କ୍ୱାର୍ଟର ଫାଇନାଲରେ ଅଷ୍ଟ୍ରେଲିଆ ପାକିସ୍ତାନକୁ ୧୧୯ ରନରେ ପରାସ୍ତ କରି ସେମିଫାଇନାଲରେ ପ୍ରବେଶ କରିଛି | ଏହି ଟୁର୍ନାମେଣ୍ଟରେ ଗତ ୯ଟି କ୍ବାର୍ଟର ଫାଇନାଲ ମଧ୍ୟରୁ ଭାରତ ୭ ଥର ଜିତିବାକୁ ସକ୍ଷମ ହୋଇଛି | ଅଣ୍ଡର-୧୯ ସ୍ତରରେ ଏହା ଭାରତର କ୍ରମାଗତ ସପ୍ତମ ବିଜୟ ।
ଆଣ୍ଟିଗୁଆର କୁଲିଜ୍ କ୍ରିକେଟ୍ ଗ୍ରାଉଣ୍ଡରେ ଅନୁଷ୍ଠିତ କ୍ବାର୍ଟର ଫାଇନାଲରେ ଭାରତ ଟସ୍ ଜିତି ପ୍ରଥମେ ବୋଲିଂ କରି ମ୍ୟାନ୍ ଅଫ୍ ଦି ମ୍ୟାଚରେ ରବି କୁମାରଙ୍କ ଘାତକ ବୋଲିଂ ବଳରେ ବାଂଲାଦେଶ କୁ ମାତ୍ର ୧୧୧ ରନରେ ଅଲ୍ଆଉଟ୍ କରିଥିଲା । ଏହାର ଜବାବରେ ଭାରତ ମାତ୍ର ୫ ୱିକେଟ୍ ହରାଇ ୩୦.୫ ଓଭରରେ ବିଜୟଲକ୍ଷ୍ୟ ହାସଲ କରିନେଇଥିଲା। । ତେବେ ୧୧୨ ରନ୍ର ଟାର୍ଗେଟକୁ ଜବାବରେ ଟିମ୍ ଇଣ୍ଡିଆର ଆରମ୍ଭ ଭଲ ହୋଇନଥିଲା ଏବଂ ହର୍ଣ୍ଣୁର ସିଂ ଖାତା ଖୋଲିବା ପୂର୍ବରୁ ହିଁ ପାଭିଲିୟନ ଫେରିଯାଇଥିଲେ ।
ତେବେ ଅଙ୍ଗ୍କ୍ରିଶ୍ ରଘୁବଂଶୀ ଏବଂ ଉପଅଧିନାୟକ ଶେଖ ରସିଦ ଦ୍ୱିତୀୟ ୱିକେଟ୍ ପାଇଁ ୭୦ ରନ ଭାଗିଦାରୀ ଯୋଡ଼ି ଭାରତର ବିଜୟ ପଥ ପରିଷ୍କାର କରିଥିଲେ | ରଘୁବଂଶୀ ୭ଟି ଚୌକା ସାହାଯ୍ୟରେ ୬୫ ବଲରେ ୪୪ ରନ୍ ସଂଗ୍ରହ କରିଥିବାବେଳେ ରସିଦ୍ ୨୬ ରନ୍ ସଂଗ୍ରହ କରିଥିଲେ। ୩୧ତମ ଓଭରରେ ଜିତିବା ପାଇଁ ଭାରତକୁ କେବଳ ଗୋଟିଏ ରନ୍ ଆବଶ୍ୟକ ଥିବାବେଳେ ଅଧିନାୟକ ୟଶ ଧୂଲ ଏବଂ କୌଶଳ ତାମ୍ବେଙ୍କ ଯୋଡି କ୍ରିଜରେ ଉପସ୍ଥିତ ଥିଲେ।
ତାମ୍ବେ ବ୍ୟାଟିଂ ଶେଷରେ ଥିବାବେଳେ ଧୂଲ ଅଣ-ଷ୍ଟ୍ରାଇକରଙ୍କ ଶେଷରେ ଠିଆ ହୋଇଥିଲେ। ଅଧିନାୟକ ରାକିବୁଲ ହାସନଙ୍କ ଓଭରରେ ଏକ ବିଶାଳ ଛକା ମାରି ତାମ୍ବେ ଭାରତ ବିଜୟରେ ମୁଣ୍ଡି ମାରିଥିଲେ। ତାମ୍ବେ ୧୮ଟି ବଲରୁ ଗୋଟିଏ ଛକା ସହାୟତାରେ ଅପରାଜିତ ୧୧ ରନ୍ କରିଥିବାବେଳେ ଅଧିନାୟକ ଧୂଲ୍ ୨୬ଟି ବଲରୁ ୪ଟି ଚୌକା ସହାୟତାରେ ୨୦ ରନ୍ କରି ଅପରାଜିତ ରହିଥିଲେ।
Comments are closed.