ଦେଶରୁ ପଳାୟନ କରିବାରେ ଶ୍ରୀଲଙ୍କା ରାଷ୍ଟ୍ରପତିଙ୍କୁ ସାହାଯ୍ୟ କରିଥିବା ଖବରକୁ ଭାରତର ଖଣ୍ଡନ

ନୂଆଦିଲ୍ଲୀ: ଶ୍ରୀଲଙ୍କା ରାଷ୍ଟ୍ରପତି ଗୋଟାବାୟା ରାଜପକ୍ଷେ ଏବଂ ତାଙ୍କ ଭାଇ ବେସିଲ ରାଜପକ୍ଷେ ଦେଶ ଛାଡି ପଳାଇବାରେ ସାହାଯ୍ୟ କରିଥିବା ରିପୋର୍ଟକୁ ଭାରତ ଖଣ୍ଡନ କରିଛି । ଏଭଳି ରିପୋର୍ଟକୁ ଶ୍ରୀଲଙ୍କାର ଭାରତୀୟ ହାଇ କମିଶନ ଭିତ୍ତିହୀନ ବୋଲି କହିଛନ୍ତି । ଭାରତୀୟ ହାଇ କମିଶନ କହିଛନ୍ତି ଯେ ଭାରତ ଶ୍ରୀଲଙ୍କାର ଲୋକଙ୍କୁ ସମର୍ଥନ ଜାରି ରଖିବ । ଉଲ୍ଲେଖଯୋଗ୍ୟ ଯେ, ଆର୍ଥିକ ସଙ୍କଟ ମଧ୍ୟରେ ରାଷ୍ଟ୍ରପତି ରାଜପକ୍ଷେ ବୁଧବାର ଭୋରରେ ଶ୍ରୀଲଙ୍କାରୁ ପଳାୟନ କରି ମାଲଦ୍ୱୀପରେ ପହଞ୍ଚିଛନ୍ତି। ରାଷ୍ଟ୍ରପତି ଦେଶ ଛାଡିଛନ୍ତି ବୋଲି ଶ୍ରୀଲଙ୍କାର ପ୍ରଧାନମନ୍ତ୍ରୀ କାର୍ଯ୍ୟାଳୟ ମଧ୍ୟ ସ୍ପଷ୍ଟ କରିଛି।

ଭାରତୀୟ ହାଇ କମିଶନ ବୁଧବାର ଟ୍ୱିଟ୍ କରି କହିଛନ୍ତି ଯେ ଶ୍ରୀଲଙ୍କାରୁ ଗୋଟାବାୟା ରାଜପକ୍ଷେ ଏବଂ ବେସିଲ ରାଜପକ୍ଷେଙ୍କୁ ଦେଶରୁ ପଳାୟନ କରିବାରେ ଭାରତ ସାହାଯ୍ୟ କରିଥିବା ଗଣମାଧ୍ୟମ ରିପୋର୍ଟ ଭିତ୍ତିହୀନ ତଥା କପୋଳକଳ୍ପିତ । ଏପରି ରିପୋର୍ଟକୁ ହାଇ କମିଶନ ସମ୍ପୂର୍ଣ୍ଣ ଭାବେ ଅସ୍ୱୀକାର କରୁଛନ୍ତି। ପୁଣି ଦୋହରାଇବାକୁ ଚାହୁଁଛୁ ଯେ ଭାରତ ଶ୍ରୀଲଙ୍କାର ଲୋକଙ୍କୁ ସମର୍ଥନ ଜାରି ରଖିବ। କାରଣ ସେମାନେ ଗଣତାନ୍ତ୍ରିକ ଉପାୟ ଏବଂ ମୂଲ୍ୟବୋଧ, ପ୍ରତିଷ୍ଠିତ ଗଣତାନ୍ତ୍ରିକ ଅନୁଷ୍ଠାନ ଏବଂ ସାମ୍ବିଧାନିକ ଢାଞ୍ଚା ମାଧ୍ୟମରେ ସମୃଦ୍ଧି ଏବଂ ପ୍ରଗତି ପାଇଁ ସେମାନଙ୍କର ଆକାଂକ୍ଷାକୁ ହୃଦୟଙ୍ଗମ କରିବାକୁ ଚାହୁଁଛନ୍ତି |

ଉଲ୍ଲେଖଯୋଗ୍ୟ ଯେ ବୁଧବାର ସକାଳେ ରାଷ୍ଟ୍ରପତି ଗୋଟାବାୟା ରାଜପକ୍ଷେ ଦେଶ ଛାଡି ପଳାଇଛନ୍ତି। ରାଷ୍ଟ୍ରପତି, ତାଙ୍କ ପତ୍ନୀ ଏବଂ ଦୁଇଜଣ ସୁରକ୍ଷା କର୍ମୀ ଶ୍ରୀଲଙ୍କା ବାୟୁସେନା ବିମାନରେ ମାଲଦ୍ୱୀପ ରାଜଧାନୀ ମାଲେ ଅଭିମୁଖେ ଯାତ୍ରା କରିଥିଲେ। ରାଷ୍ଟ୍ରପତି ଗୋଟାବାୟା ରାଜପକ୍ଷେଙ୍କ ସହ ତାଙ୍କ ସାନଭାଇ ତଥା ପୂର୍ବତନ ଅର୍ଥମନ୍ତ୍ରୀ ବେସିଲ ରାଜପକ୍ଷେ ମଧ୍ୟ ଦେଶରୁ ପଳାୟନ କରିଛନ୍ତି ।