ଆଜି ବି ଇଡିରେ ହାଜର ହେବେ ନାହିଁ କେଜ୍ରିୱାଲ, ଆପ୍ କହିଲା ଗିରଫ ପାଇଁ ଚାଲିଛି ଷଡ଼ଯନ୍ତ୍ର

ନୂଆଦିଲ୍ଲୀ: ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ପୁଣି ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ନୋଟିସକୁ ଏଡ଼ାଇ ଦେଇଛନ୍ତି। ଆଜି ସେ କେନ୍ଦ୍ରୀୟ ସଂସ୍ଥାରେ ହାଜର ହେବେ ନାହିଁ। ଇଡିକୁ କେଜ୍ରିୱାଲ ତାଙ୍କ ଜବାବ ପଠାଇଦେଇଛନ୍ତି। କେଜ୍ରିୱାଲଙ୍କ ଦଳ ଆପ୍ କହିଛି ଯେ ଅରବିନ୍ଦ କେଜ୍ରିୱାଲ ଇଡି ଅନୁସନ୍ଧାନରେ ସହଯୋଗ କରିବାକୁ ପ୍ରସ୍ତୁତ, କିନ୍ତୁ ତଦନ୍ତକାରୀ ସଂସ୍ଥାର ନୋଟିସ୍ ବେଆଇନ ।

ଆପ୍ କହିଛି ଯେ ଅରବିନ୍ଦ କେଜ୍ରିୱାଲଙ୍କୁ ଗିରଫ କରିବା ପାଇଁ ଏକ ଷଡ଼ଯନ୍ତ୍ର ରଚିଛି। ତାଙ୍କୁ ନିର୍ବାଚନ ପ୍ରଚାରରୁ ବଞ୍ଚିତ କରିବାକୁ ଚେଷ୍ଟା କରାଯାଉଛି। ନିର୍ବାଚନ ପୂର୍ବରୁ ନୋଟିସ ଜାରି କରିବା ଉପରେ ମଧ୍ୟ ପ୍ରଶ୍ନ ଉଠିଛି।

ଉଲ୍ଲେଖଯୋଗ୍ୟ, ଦିଲ୍ଲୀ ଅବକାରୀ ମାମଲାରେ ଇଡି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଜାନୁଆରୀ ୩ରେ ହାଜର ହେବାକୁ କହିଥିଲା । ଏହା ପୂର୍ବରୁ, ଦୁଇଥର ସମନ ସତ୍ତ୍ୱେ ସେ ଇଡିରେ ହାଜର ହୋଇନଥିଲେ। ଏହି ଆଭିମୁଖ୍ୟ ଜାରି ରଖି କେଜ୍ରିୱାଲ ତୃତୀୟ ଥର ଇଡି ଆଗରେ ହାଜର ହୋଇନାହାଁନ୍ତି।

ଏହା ପୂର୍ବରୁ ମଧ୍ୟ କେଜ୍ରିୱାଲ ଇଡି ଦ୍ୱାରା ପଠାଯାଇଥିବା ଦୁଇଟି ସମନ ବିଷୟରେ ଲିଖିତ ଉତ୍ତର ପଠାଇ ପ୍ରଶ୍ନ ଉଠାଇଥିଲେ। ସେ ଇଡି ନୋଟିସକୁ ବେଆଇନ ତଥା ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି କହି ଜେରା ପାଇଁ ହାଜର ନେଇନଥିଲେ।