ନୂଆଦିଲ୍ଲୀ: ଦିନିକିଆ ଫର୍ମାଟରେ ବିରାଟ କୋହଲିଙ୍କ ସ୍ଥାନରେ ବ୍ୟାଟ୍ସମ୍ୟାନ୍ ରୋହିତ ଶର୍ମାଙ୍କୁ ଅଧିନାୟକ ଭାବେ ନିଯୁକ୍ତ କରାଯିବା ପରଠାରୁ ଭାରତୀୟ ଦଳରେ ସବୁ କିଛି ଠିକ୍ ଥିବା ପରି ମନେ ହେଉନାହିଁ । ଯଦିଓ ପୂର୍ଣ୍ଣକାଳୀନ ଅଧିନାୟକ ହେବା ପରେ ରୋହିତ ଏକ ସାମ୍ବାଦିକ ସମ୍ମିଳନୀରେ କହିଥିଲେ ଯେ ସେ ବିରାଟଙ୍କ ଅଧିନାୟକତ୍ୱରେ ଖେଳିବାକୁ ଉପଭୋଗ କରିଥିଲେ, ତେବେ ଦଳରେ ସାମ୍ପ୍ରତିକ ସ୍ଥିତି ଏକ ଭିନ୍ନ କାହାଣୀ କହୁଛି। ଏବେ ଖବର ଆସୁଛି ଯେ ବିରାଟ ଦକ୍ଷିଣ ଆଫ୍ରିକା ବିପକ୍ଷ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜରୁ ଓହରି ଯାଇଛନ୍ତି ଏବଂ ବିସିସିଆଇକୁ ମଧ୍ୟ ସେ ଏହା ଜଣାଇ ଦେଇଛନ୍ତି।
ଏକ ଜାତୀୟ ଖବରକାଗଜରେ ପ୍ରକାଶିତ ରିପୋର୍ଟ ଅନୁଯାୟୀ, ବିରାଟ ବୋର୍ଡକୁ ଜଣାଇଛନ୍ତି ଯେ ସେ ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜ ପାଇଁ ଉପଲବ୍ଧ ହେବେ ନାହିଁ । ଜାନୁୟାରୀ ୧୧ରେ ତାଙ୍କ ଝିଅ ବାମିକାଙ୍କର ପ୍ରଥମ ଜନ୍ମଦିନ ଏବଂ ସେ ଏହାକୁ ତାଙ୍କୁ ପରିବାର ସହ ପାଳନ କରିବାକୁ ଚାହୁଁଛନ୍ତି। କିନ୍ତୁ ଏକ ଧାରଣା ସୃଷ୍ଟି ହୋଇଛି ଯେ ବିରାଟ ବୋଧେ ରୋହିତଙ୍କ ଅଧିନାୟକତ୍ୱରେ ଖେଳିବାକୁ ଚାହୁଁନାହାଁନ୍ତି। ବିରାଟ ଦିନିକିଆ ସିରିଜରୁ ଓହରିବା ପୂର୍ବରୁ ରୋହିତ ମଧ୍ୟ ଦକ୍ଷିଣ ଆଫ୍ରିକା ବିପକ୍ଷ ତିନି ମ୍ୟାଚ ବିଶିଷ୍ଟ ଟେଷ୍ଟ ସିରିଜରୁ ବାଦ୍ ପଡିଥିଲେ। ଏହାର ଅଫିସିଆଲ୍ ଟ୍ୱିଟର ହ୍ୟାଣ୍ଡେଲରେ ସୂଚନା ଦେବାବେଳେ ବିସିସିଆଇ କହିଥିଲା ଯେ ମୁମ୍ବାଇରେ ଦଳର ନେଟ୍ ସେସନରେ ତାଙ୍କ ବାମ ଗୋଡର ମାଂସପେଶୀ ଟାଣି ହୋଇଯିବାରୁ ରୋହିତଙ୍କୁ ଦକ୍ଷିଣ ଆଫ୍ରିକା ବିପକ୍ଷ ତିନି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରୁ ବାଦ୍ ଦିଆଯାଇଛି।
ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଦିନିକିଆ ସିରିଜ୍ ଜାନୁଆରୀ ୧୯ରୁ ଆରମ୍ଭ ହେଉଥିବାବେଳେ ଟେଷ୍ଟ ସିରିଜ୍ ଜାନୁୟାରୀ ୧୫ରେ ଶେଷ ହେବ | ଏହି ଦିନିକିଆ ସିରିଜରେ ରୋହିତ ବିରାଟଙ୍କ ସ୍ଥାନରେ ଅଧିନାୟକତ୍ୱ ଦାୟିତ୍ବ ଗ୍ରହଣ କରିବେ। ଏବେ ବିରାଟ ଦିନିକିଆ ସିରିଜରୁ ଓହରିଯିବା ସହ ଏହା ସ୍ପଷ୍ଟ ହୋଇଯାଇଛି ଯେ ରୋହିତଙ୍କ ଅଧିନାୟକତ୍ୱରେ ବିରାଟଙ୍କୁ ଦେଖିବାକୁ ପ୍ରଶଂସକଙ୍କୁ ଟିକିଏ ଅଧିକ ସମୟ ଅପେକ୍ଷା କରିବାକୁ ପଡ଼ିବ | ରୋହିତ ଏପର୍ଯ୍ୟନ୍ତ ୧୦ଟି ଦିନିକିଆରେ ଦଳର ନେତୃତ୍ୱ ନେଇଛନ୍ତି ଏବଂ ଦଳକୁ ଆଠ ଥର ବିଜୟ ଦେଇଛନ୍ତି |
Comments are closed.