ଆଇପିଏଲ ଇତିହାସରେ ସବୁଠାରୁ ଦାମୀ ଖେଳାଳି ଭାବେ କୋହଲିଙ୍କ ସମକକ୍ଷ ହେଲେ ରାହୁଲ, ୧୭ କୋଟିରେ ଲକ୍ଷ୍ନୌ ଟିମ୍ ସହ ଚୁକ୍ତିବଦ୍ଧ

ନୂଆଦିଲ୍ଲୀ: ଭାରତୀୟ ଦଳର ଓପନର୍ କେ.ଏଲ୍ ରାହୁଲଙ୍କୁ ନୂଆ ଆଇପିଏଲ୍ ଦଳ ଲକ୍ଷ୍ନୌର ଅଧିନାୟକ କରାଯାଇଛି। ରାହୁଲ ୧୭ କୋଟି ଟଙ୍କା ସହ ଏହି ଫ୍ରାଞ୍ଚାଇଜ୍ ସହ ଯୋଡ଼ି ହୋଇଛନ୍ତି । ଏଥସହ ରାହୁଲ ଆଇପିଏଲ ଇତିହାସରେ ସବୁଠାରୁ ଦାମୀ ଖେଳାଳି ଭାବେ କୋହଲିଙ୍କ ସମକକ୍ଷ ହୋଇଛନ୍ତି। କୋହଲିଙ୍କୁ ୨୦୧୮ ରୁ ୨୦୨୧ ସିଜନ୍ ଯାଏଁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ୧୭ କୋଟି ଟଙ୍କା ଦେଉଥିଲା, ଯଦିଓ ଏଥର ତାଙ୍କୁ ଆରସିବି ୧୫ କୋଟିରେ ବଜାୟ ରଖିଛି । ରାହୁଲଙ୍କ ବ୍ୟତୀତ ଲକ୍ଷ୍ନୌ ଅନକ୍ଯାପଡ୍ ଭାରତୀୟ ଖେଳାଳି ରବି ବିଷ୍ଣୋଇଙ୍କୁ ୪ କୋଟି ଟଙ୍କା ଦେଇଥିବା ବେଳେ ଅଷ୍ଟ୍ରେଲୀୟ ଅଲରାଉଣ୍ଡର ମାର୍କସ ଷ୍ଟୋଇନିସଙ୍କୁ ୯.୨ କୋଟି ଟଙ୍କାରେ ନିଜ ଦଳରେ ସାମିଲ କରିଛି।

ଆଇପିଏଲ୍ ୨୦୨୨ରେ ଲକ୍ଷ୍ନୌ ଦଳର କମାଣ୍ଡ ବର୍ତ୍ତମାନ ରାହୁଲଙ୍କ ହାତରେ ରହିବ । ରାହୁଲ ୨୦୨୦ ଏବଂ ୨୦୨୧ ଆଇପିଏଲରେ ପଞ୍ଜାବ କିଙ୍ଗ୍ସର ଅଧିନାୟକ ଥିଲେ। ରାହୁଲ ଆଇପିଏଲର କ୍ରମାଗତ ୪ ସିଜନରେ ୫୭୫ରୁ ଊର୍ଦ୍ଧ୍ବ ସ୍କୋର କରିଛନ୍ତି | ୨୦୨୦ରେ ସେ ପାଞ୍ଚଟି ଅର୍ଦ୍ଧ ଶତକ ଏବଂ ଏକ ଶତକ ସାହାଯ୍ୟରେ ହାରାହାରି ୫୫.୮୩ରେ ୧୪ଟି ମ୍ୟାଚରେ ୬୭୦ ରନ୍ ସଂଗ୍ରହ କରି ଅରେଞ୍ଜ କ୍ୟାପ୍ ଜିତିଥିଲେ | ୨୦୨୧ ସଂସ୍କରଣରେ ରାହୁଲଙ୍କ ବ୍ୟାଟରୁ ୬୨୬ ରନ୍ ଆସିଥିଲା ​​|

ରାହୁଲ ଆଇପିଏଲ୍-୨୦୨୨ର ସବୁଠାରୁ ମହଙ୍ଗା ଖେଳାଳି ହୋଇଛନ୍ତି | ତାଙ୍କ ପୂର୍ବରୁ ଚେନ୍ନାଇ ସୁପର କିଙ୍ଗ୍ସର ରବିନ୍ଦ୍ର ଜାଡେଜା (୧୬ କୋଟି ଟଙ୍କା) ଏବଂ ଦିଲ୍ଲୀ କ୍ୟାପିଟାଲ୍ସର ରିଷଭ ପନ୍ତ (୧୬ କୋଟି ଟଙ୍କା) ଆଇପିଏଲ ୨୦୨୨ର ଦାମୀ ଖେଳାଳି ତାଲିକାରେ ଥିଲେ | ଏଥିସହିତ ମୁମ୍ବାଇ ଇଣ୍ଡିଆନ୍ସ ଅଧିନାୟକ ରୋହିତ ଶର୍ମାଙ୍କୁ ୧୬ କୋଟି ଟଙ୍କା ଏବଂ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର୍ ଅଧିନାୟକତ୍ୱ ଛାଡିଥିବା ବିରାଟ କୋହଲିଙ୍କୁ ୧୫ କୋଟି ଟଙ୍କାରେ ରଖିଛି।

ଆଇପିଏଲର ଦ୍ୱିତୀୟ ନୂଆ ଦଳ ଅହମ୍ମଦାବାଦ ହାର୍ଦ୍ଦିକ ପାଣ୍ଡ୍ୟା ଏବଂ ରସିଦ ଖାନଙ୍କୁ ୧୫ କୋଟି ଟଙ୍କାରେ ସାମିଲ କରିଛି। ହାର୍ଦ୍ଦିକଙ୍କୁ ଅହମ୍ମଦାବାଦ ଦଳର ଅଧିନାୟକ ମଧ୍ୟ କରାଯାଇଛି। ଭାରତ ବନାମ ଦକ୍ଷିଣ ଆଫ୍ରିକା ୨ୟ ଦିନିକିଆ ମ୍ୟାଚ୍ ପରେ ଅହମ୍ମଦାବାଦ ଆଇପିଏଲ ଦଳର ମାଲିକମାନେ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା, ଆଫଗାନିସ୍ତାନର ସ୍ପିନର ରସିଦ ଖାନ ଏବଂ ଭାରତୀୟ ଓପନର୍ ଶୁବମାନ ଗିଲଙ୍କୁ ସାମିଲ କରାଯାଇଥିବା ଘୋଷଣା କରିଛି। ଗିଲଙ୍କୁ ୮ କୋଟି ଟଙ୍କା ମିଳିଛି।