ପୁଟିନଙ୍କ ସହ କଥା ହେଲେ ମୋଦି, ଯୁଦ୍ଧ ପ୍ରଭାବିତ ଅଞ୍ଚଳରୁ ଭାରତୀୟ ଛାତ୍ରମାନଙ୍କ ସୁରକ୍ଷିତ ସ୍ଥାନାନ୍ତର ନେଇ ଆଲୋଚନା

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ କଥା ହୋଇଛନ୍ତି। ଦୁହେଁ ୟୁକ୍ରେନର ସ୍ଥିତିର ସମୀକ୍ଷା କରିଥିଲେ, ବିଶେଷକରି ଖାର୍କିଭରେ ଯେଉଁଠାରେ ଅନେକ ଭାରତୀୟ ଛାତ୍ର ଫସି ରହିଛନ୍ତି। ଉଭୟ ନେତା ୟୁକ୍ରେନର ଯୁଦ୍ଧ ପ୍ରଭାବିତ ଅଞ୍ଚଳରୁ ଭାରତୀୟମାନଙ୍କୁ ନିରାପଦ ସ୍ଥାନାନ୍ତର ବିଷୟରେ ଆଲୋଚନା କରିଥିଲେ।

ଏହାପୂର୍ବରୁ ପ୍ରଧାନମନ୍ତ୍ରୀ ମୋଦୀ ମଧ୍ୟ ରୁଷ-ୟୁକ୍ରେନ ସଙ୍କଟ ଉପରେ ପଞ୍ଚମ ଉଚ୍ଚ ସ୍ତରୀୟ ବୈଠକ କରିଛନ୍ତି ‌। ଏହି ବୈଠକରେ ୟୁକ୍ରେନରେ ଫସି ରହିଥିବା ଭାରତୀୟଙ୍କୁ ଫେରାଇ ଆଣିବା ଉପରେ ଆଲୋଚନା କରାଯାଇଥିଲା। ରୁଷ ଆଜି କ୍ରମାଗତ ଦ୍ୱିତୀୟ ଦିନ ପାଇଁ ୟୁକ୍ରେନର ଖାର୍କିଭ ସହର ଉପରେ ବୋମା ବର୍ଷଣ କରିଛି। ଏହାକୁ ଦୃଷ୍ଟିରେ ରଖି ଭାରତୀୟ ଦୂତାବାସ ଏକ ଆଡଭାଇଜରୀ ଜାରି କରି ଭାରତୀୟମାନଙ୍କୁ ଯଥାଶୀଘ୍ର ଖାରକିଭ୍ ଛାଡିବାକୁ କହିଛି। ଯଦି ଟ୍ରେନ୍, ବସ୍ କିମ୍ବା ଅନ୍ୟାନ୍ୟ ଯାନ ଉପଲବ୍ଧ ନଥାଏ, ତେବେ ଚାଲି ଚାଲି ପେସୋଚିନ୍, ବାବାଏ ଏବଂ ବେଜଲିଉଡୋଭ୍କା ପାଖରେ ପହଞ୍ଚିବାକୁ କୁହାଯାଇଛି | ଖାର୍କିଭରୁ ପେସୋଚିନର ଦୂରତା ୧୧ କିଲୋମିଟର, ବାବାଏ ଠାରୁ ଦୂରତା ୧୨ କିଲୋମିଟର ଏବଂ ବେଜଲିଡୋଭ୍କା ଠାରୁ ଦୂରତା ୧୬ କିଲୋମିଟର |
ବୈଦେଶିକ ବ୍ୟାପାର ମନ୍ତ୍ରଣାଳୟ କହିଛି ଯେ ରୁଷ ପକ୍ଷରୁ ମିଳିଥିବା ସୂଚନା ଆଧାରରେ ୟୁକ୍ରେନରେ ଥିବା ଭାରତୀୟ ଦୂତାବାସ ତୁରନ୍ତ ଏହାର ସମସ୍ତ ନାଗରିକଙ୍କୁ ଖାର୍କିଭ ଛାଡିବାକୁ କହିଛି। ଭାରତରେ ରୁଷର ରାଷ୍ଟ୍ରଦୂତ ଡେନିସ୍ ଆଲିପୋଭ କହିଛନ୍ତି ଯେ ଖାର୍କିଭ, ସୁମି ଏବଂ ୟୁକ୍ରେନର ଅନ୍ୟ ଯୁଦ୍ଧ ପ୍ରଭାବିତ ଅଞ୍ଚଳରେ ଫସି ରହିଥିବା ଭାରତୀୟମାନଙ୍କୁ ନିରାପଦ ସ୍ଥାନ ଦେବା ପାଇଁ ରୁଷ ଏକ ମାନବିକ କରିଡର ସୃଷ୍ଟି କରିବା ପାଇଁ ଜୋରଦାର କାର୍ଯ୍ୟ କରୁଛି।
ଫେବୃଆରୀ ୨୪ରେ ରୁଷ ୟୁକ୍ରେନ ଉପରେ ଆକ୍ରମଣ କରିଥିଲା। ବୈଦେଶିକ ବ୍ୟାପାର ମନ୍ତ୍ରଣାଳୟ ଅନୁଯାୟୀ ଏହି ଆକ୍ରମଣ ପରଠାରୁ ପ୍ରାୟ ୧୭,୦୦୦ ଭାରତୀୟ ୟୁକ୍ରେନ ଛାଡିଛନ୍ତି। ସେ ମଧ୍ୟ କହିଛନ୍ତି ଯେ ଅପରେସନ୍ ଗାଙ୍ଗା ଅଧୀନରେ ଗତ ୨୪ ଘଣ୍ଟାରେ ଛଅଟି ବିମାନ ୟୁକ୍ରନରୁ ଭାରତୀୟଙ୍କୁ ଧରି ସ୍ବଦେଶ ପହଞ୍ଚିଛି।