ସ୍ୱାଧୀନତା ଦିବସ ଅଭିଭାଷଣରେ ପରିବାରବାଦ, ଦୁର୍ନୀତିକୁ ଟାର୍ଗେଟ କଲେ ପ୍ରଧାନମନ୍ତ୍ରୀ ମୋଦୀ, ‘ପାଞ୍ଚ ପଣ’ର ମନ୍ତ୍ର ଦେଲେ

ନୂଆଦିଲ୍ଲୀ: ଆଜି ସମଗ୍ର ଦେଶ ୭୬ ତମ ସ୍ୱାଧୀନତା ଦିବସ ପାଳନ କରୁଛି | ଏହି ଶୁଭ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନବମ ଥର ପାଇଁ ଜାତୀୟ ପତାକା ଉତ୍ତୋଳନ କରିବା ସହ ଲାଲକିଲ୍ଲାର ପ୍ରାଚୀରରୁ ଦେଶକୁ ସମ୍ବୋଧନ କରିଛନ୍ତି । ମୋଦୀ ନିଜ ଅଭିଭାଷଣରେ ଦେଶର ବିକାଶ ଉପରେ ଗୁରୁତ୍ୱାରୋପ କରିଛନ୍ତି । ଦେଶକୁ ବିକାଶର ପଥରେ ଆଗେଇ ନେବା ପାଇଁ ପ୍ରଧାନମନ୍ତ୍ରୀ ମୋଦୀ ଦେଶବାସୀଙ୍କୁ ‘ପାଞ୍ଚ ପଣ’ ମନ୍ତ୍ର ଦେଇଛନ୍ତି । ଏହାଛଡ଼ା ସେ ଦୁର୍ନୀତି ଏବଂ ପରିବାରିବାଦକୁ ଟାର୍ଗେଟ କରିଛନ୍ତି । ସୂଚନାଯୋଗ୍ୟ ମୋଦୀ ନିଜ ଅଭିଭାଷଣରେ କୌଣସି ନୂଆ ସରକାରୀ ଯୋଜନା ଘୋଷଣା କରିନାହାଁନ୍ତି। କିନ୍ତୁ କିଛି ନୂଆ ସ୍ଲୋଗାନ ସହ ଦେଶକୁ ପ୍ରଗତିର ଶୀର୍ଷକୁ ନେବାକୁ ଆହ୍ବାନ କରିଛନ୍ତି ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କର ୮୦ ମିନିଟର ଭାଷଣ ସମାପ୍ତ କରିବା ପୂର୍ବରୁ ପରିବାରବାଦ ଏବଂ ଦୁର୍ନୀତି ଉପରେ ପ୍ରଚଣ୍ଡ ଆକ୍ରମଣ କରିଥିଲେ। ସେ କହିଥିଲେ, ଯେତେବେଳେ ମୁଁ ପରିବାରବାଦ ଓ ଆତ୍ମୀୟବାଦ ବିଷୟରେ କୁହେ ଲୋକମାନେ ଭାବନ୍ତି ମୁଁ କେବଳ ରାଜନୈତିକ କ୍ଷେତ୍ର ବିଷୟରେ କହୁଛି। ଦୁର୍ଭାଗ୍ୟବଶତଃ ରାଜନୀତିର ଏହି କୁପ୍ରଥାକୁ ଭାରତର ଅନ୍ୟ ସମସ୍ତ ଅନୁଷ୍ଠାନରେ ମଧ୍ୟ ପ୍ରଶ୍ରୟ ଦିଆଯାଉଛି | ଏହା ଦ୍ବାରା ମୋ ଦେଶର ପ୍ରତିଭାକୁ ବହୁତ କ୍ଷତି ହେଉଛି।

ସେହିପରି ମୋଦୀ ଦୁର୍ନୀତିକୁ ଦେଶର ବିକାଶରେ ଆଉ ଏକ ଅନ୍ତରାୟ ଭାବେ ଅଭିହିତ କରିଛନ୍ତି । ସେ କହିଥଲେ ଯେ ଦୁର୍ନୀତି ଦେଶକୁ କୀଟ ପରି ପରି ଫମ୍ପା କରିଦେଲାଣି । ଆମକୁ ଏହାର ମୁକାବିଲା କରିବାକୁ ପଡିବ। ସେ କହିଛନ୍ତି ଯେ ଯେଉଁମାନେ ଦେଶକୁ ଲୁଟ୍ କରିଛନ୍ତି ସେମାନଙ୍କୁ ସେହି ସମସ୍ତ ଟଙ୍କା ଫେରସ୍ତ କରିବାକୁ ହେବ ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ତାଙ୍କ ଅଭିଭାଷଣରେ କହିଛନ୍ତି ଯେ ୨୦୪୭ ମସିହାରେ ଦେଶର ସ୍ୱାଧୀନତାର ୧୦୦ ବର୍ଷ ପୂରଣ ହେବ। ଏବଂ ସେପର୍ଯ୍ୟନ୍ତ ଆମକୁ ସ୍ୱାଧୀନତା ସଂଗ୍ରାମୀମାନଙ୍କର ସମସ୍ତ ସ୍ୱପ୍ନ ପୂରଣ କରିବାର ଦାୟିତ୍ବ ଗ୍ରହଣ କରିବାକୁ ପଡିବ | ଏବଂ ଏହା ସମ୍ଭବ ହେବ ଯଦି ଆଗାମୀ ୨୫ ବର୍ଷ ମଧ୍ୟରେ ଆମେ ଆମର ସଂକଳ୍ପକୁ ‘ପାଞ୍ଚ ପଣ’ ଉପରେ ଧ୍ୟାନ ଦେବା | ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଏହି ‘ପାଞ୍ଚ ପଣ’ ହେଲା ବିକଶିତ ଭାରତ, ଦାସତ୍ୱରୁ ମୁକ୍ତି, ଐତିହ୍ୟର ଗର୍ବ, ଏକତା ଏବଂ ନାଗରିକଙ୍କ କର୍ତ୍ତବ୍ୟ। ଏହି ପାଞ୍ଚ ପଣ ସହ ଦେଶକୁ ୨୦୪୭ ସୁଦ୍ଧା ବିକଶିତ କରିବା ଉପରେ ମୋଦୀ ଗୁରୁତ୍ୱାରୋପ କରିଛନ୍ତି।