ଧାରା ୩୭୦ ନେଇ ସୁପ୍ରିମକୋର୍ଟଙ୍କ ରାୟକୁ ଐତିହାସିକ କହିଲେ ପ୍ରଧାନମନ୍ତ୍ରୀ

ନୂଆଦିଲ୍ଲୀ: ଜାମ୍ମୁ କାଶ୍ମୀରରୁ ଧାରା ୩୭୦ ଉଚ୍ଛେଦ ନେଇ କେନ୍ଦ୍ର ସରକାରଙ୍କ ନିଷ୍ପତ୍ତିକୁ କାଏମ ରଖିଛନ୍ତି ସୁପ୍ରିମକୋର୍ଟ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୁପ୍ରିମକୋର୍ଟଙ୍କ ରାୟକୁ ଐତିହାସିକ ବୋଲି କହିଛନ୍ତି ।

ମୋଦୀ ‘ଏକ୍ସ’ରେ କହିଛନ୍ତି, ଧାରା ୩୭୦ ନେଇ ଆଜିର ସୁପ୍ରିମକୋର୍ଟଙ୍କ ନିଷ୍ପତ୍ତି ଐତିହାସିକ। ଏହା କେବଳ ଏକ ଆଇନଗତ ନିଷ୍ପତ୍ତି ନୁହେଁ । ଏହା ଏକ ଆଶାର କିରଣ, ଉଜ୍ଜ୍ୱଳ ଭବିଷ୍ୟତର ପ୍ରତିଶ୍ରୁତି ଏବଂ ଏକ ମଜବୁତ ଓ ଏକଜୁଟ ଭାରତ ଗଠନ ପାଇଁ ଆମର ସାମୂହିକ ସଂକଳ୍ପର ପ୍ରମାଣ | ମୁଁ ଜମ୍ମୁ କାଶ୍ମୀର ଏବଂ ଲଦାଖର ଲୋକଙ୍କୁ ନିଶ୍ଚିତ କରିବାକୁ ଚାହୁଁଛି ଯେ ଆପଣଙ୍କ ସ୍ୱପ୍ନକୁ ସାକାର କରିବା ପାଇଁ ଆମର ପ୍ରତିବଦ୍ଧତା ଅତୁଟ।

ଗୃହମନ୍ତ୍ରୀ ଅମିତ ଶାହ ମଧ୍ୟ ସୁପ୍ରିମକୋର୍ଟଙ୍କ ରାୟକୁ ସ୍ବାଗତ କରିଛନ୍ତିି । ଶାହ କହିଛନ୍ତି ଧାରା ୩୭୦ ହଟାଇବା ପରେ ଗରିବ ଏବଂ ବଞ୍ଚିତ ବର୍ଗ ନିଜ ଅଧିକାର ଫେରିପାଇଛନ୍ତି । ବିଚ୍ଛିନ୍ନତାବାଦ ଏବଂ ପଥର ଫିଙ୍ଗା ଭଳି ଘଟଣା ଏବେ ଅତୀତ ପାଲଟିଛି | ସମଗ୍ର ଅଞ୍ଚଳ ବର୍ତ୍ତମାନ ମଧୁର ସଙ୍ଗୀତ ଏବଂ ସାଂସ୍କୃତିକ ପର୍ଯ୍ୟଟନ ଗୁଞ୍ଜରିତ ‌ହେଉଛି । ଏକତାର ବନ୍ଧନ ମଜବୁତ କରାଯାଇଛି ଏବଂ ଭାରତ ସହିତ ଅଖଣ୍ଡତା ସୁଦୃଢ କରାଯାଇଛି | ଏହା ପୁଣି ଥରେ ଜମ୍ମୁ, କାଶ୍ମୀର ଏବଂ ଲଦାଖ ହୋଇଛି ଯାହା ଆମ ଦେଶର ଥିଲା ଏବଂ ସର୍ବଦା ରହିବ ।

ସୁପ୍ରିମକୋର୍ଟର ୫ ଜଣିଆ ସମ୍ବିଧାନ ପୀଠ ସୋମବାର ଧାରା ୩୭୦ ନିଷ୍ପତ୍ତିକୁ ବୈଧ ବୋଲି କହିଛନ୍ତି। ଜମ୍ମୁ-କାଶ୍ମୀର ପାଇଁ ଧାରା ୩୭୦ ଏକ ସାମୟିକ ବ୍ୟବସ୍ଥା ଥିଲା । ଜମ୍ମୁ-କାଶ୍ମୀର ଭାରତର ଏକ ଅବିଚ୍ଛେଦ୍ୟ ଅଙ୍ଗ। ଏଠାରେ ଭାରତୀୟ ସମ୍ବିଧାନର ସବୁ ବ୍ୟବସ୍ଥା ଲାଗୁ ହେବ ବୋଲି କୋର୍ଟ କହିଥିଲେ ।

କେନ୍ଦ୍ର ସରକାର ୫ ଅଗଷ୍ଟ ୨୦୧୯ରେ ଜମ୍ମୁ କାଶ୍ମୀରରୁ ଧାରା ୩୭୦କୁ ରଦ୍ଦ କରିଦେଇଥିଲେ ଯାହା ଅଧୀନରେ ଜମ୍ମୁ-କାଶ୍ମୀରକୁ ସ୍ବତନ୍ତ୍ର ମାନ୍ୟତା ମିଳିଥିଲା । ଚାରି ବର୍ଷ, ୪ ମାସ ୬ ଦିନ ପରେ କୋର୍ଟ କେନ୍ଦ୍ର ସରକାରଙ୍କ ନିଷ୍ପତ୍ତି ସପକ୍ଷରେ ରାୟ ଦେଇଛନ୍ତି।