ବିନା ଟ୍ରାଭେଲ ଲିଙ୍କରେ ଆଫ୍ରିକା ବାହାରେ ବ୍ୟାପୁଛି ମଙ୍କିପକ୍ସ, ବିଶ୍ୱ ସ୍ୱାସ୍ଥ୍ୟ ସଂଗଠନ ଚକିତ

ନୂଆଦିଲ୍ଲୀ: ବିଶ୍ବର ଅନେକ ଦେଶରେ ଏବେ ମଙ୍କିପକ୍ସ ଆତଙ୍କ | ବିଶ୍ୱ ସ୍ୱାସ୍ଥ୍ୟ ସଂଗଠନ (ହୁ) ରବିବାର କହିଛି ଯେ ଗତ ୧୦ ଦିନ ମଧ୍ୟରେ ୧୨ଟି ଦେଶରେ ଏହି ରୋଗର ୯୨ଟି ମାମଲା ରିପୋର୍ଟ ହୋଇଛି । ଆଗାମୀ ଦିନରେ ମଙ୍କିପକ୍ସ ମାମଲା ଆହୁରି ବଢ଼ିପାରେ ବୋଲି ‘ହୁ’ ଚେତାବନୀ ଦେଇଛି ।

ବ୍ରିଟେନ୍, ସ୍ପେନ୍, ପର୍ତ୍ତୁଗାଲ୍, ଇଟାଲୀ, ଆମେରିକା, କାନାଡା ରେ ଏପରି କିଛି ମଙ୍କିପକ୍ସ ରୋଗୀ ଚିହ୍ନଟ ହୋଇଛନ୍ତି, ଯେଉଁମାନେ ପୂର୍ବରୁ କେବେ ଆଫ୍ରିକା ଯାତ୍ରା କରିନାହାଁନ୍ତି | ବର୍ତ୍ତମାନ ପର୍ଯ୍ୟନ୍ତ କେବଳ କେନ୍ଦ୍ରୀୟ ଏବଂ ପଶ୍ଚିମ ଆଫ୍ରିକୀୟ ଦେଶରୁ ଏହି ରୋଗର ମାମଲା ଆସୁଥିଲା | ଏବେ ଆଫ୍ରିକା ବାହାରେ ତଥା ୟୁରୋପରେ ମଧ୍ୟ ମଙ୍କିପକ୍ସ ମାମଲା ରିପୋର୍ଟ ହେଉଥିବାରୁ ବୈଜ୍ଞାନିକଙ୍କ ଚିନ୍ତା ବଢ଼ି ଯାଇଛି ।

‘ହୁ’ ର ଅନେକ ପରାମର୍ଶଦାତା ବୋର୍ଡର ଅଂଶ ଥିବା ନାଇଜେରିଆ ଏକାଡେମୀ ଅଫ୍ ସାଇନ୍ସେସ୍ ର ପୂର୍ବତନ ଅଧ୍ୟକ୍ଷ ଓଏୱାଲେ ଟୋମୋରି ଗଣମାଧ୍ୟମ ସହ କଥାବାର୍ତ୍ତା କରି କହିଛନ୍ତି, “ଅନ୍ୟ ଦେଶର ଲୋକମାନେ ପ୍ରତିଦିନ ଏହି ରୋଗରେ ଆକ୍ରାନ୍ତ ହୋଇଥିବାର ଦେଖି ମୁଁ ଚିନ୍ତିତ । ଆଫ୍ରିକାକୁ କେବେ ଯାଇନଥିବା ଲୋକ ମଧ୍ୟ ଏହି ରୋଗରେ ଆକ୍ରାନ୍ତ ହେଉଛନ୍ତି । ୟୁରୋପ ଏବଂ ଆମେରିକାରେ ଏଭଳି କିଛି ମାମଲା ଆମେ ଦେଖୁଛୁ ଯାହା ଅସ୍ବାଭାବିକ | ୟୁରୋପରେ ଏହି ରୋଗ ଯୋଗୁଁ ଏପର୍ଯ୍ୟନ୍ତ କାହାର ମୃତ୍ୟୁ ହୋଇ ନାହିଁ ବୋଲି ସେ କହିଛନ୍ତି।

ମଙ୍କିପକ୍ସ ପ୍ରଥମେ ୧୯୫୮ ମସିହାରେ ଏକ ମାଙ୍କଡ଼ ଦେହରେ ମିଳିଥିଲା | ୧୯୭୦ ମସିହାରେ ପ୍ରଥମ ଥର ପାଇଁ ଏହି ଭାଇରସ୍ ମଣିଷ ଶରୀରରେ ଠାବ ହୋଇଥିଲା | ଏହି ଭୂତାଣୁ ମୁଖ୍ୟତଃ କେନ୍ଦ୍ରୀୟ ଏବଂ ପଶ୍ଚିମ ଆଫ୍ରିକାର ବର୍ଷା ଜଙ୍ଗଲ ଅଞ୍ଚଳରେ ଦେଖାଯାଏ |

ସଂକ୍ରମିତ ବ୍ୟକ୍ତି କିମ୍ବା ପଶୁଙ୍କ ସଂସ୍ପର୍ଶରେ ଆସିବା କିମ୍ବା ସେମାନଙ୍କ ସହିତ କୌଣସି ପ୍ରକାରେ ସମ୍ପର୍କ ରଖିଲେ ମଙ୍କିପକ୍ସ ବ୍ୟାପିଥାଏ | ରୋଗୀର କ୍ଷତରୁ ବାହାରି ଏହି ଭୂତାଣୁ ଆଖି, ନାକ, କାନ ଏବଂ ପାଟି ଦେଇ ଶରୀରରେ ପ୍ରବେଶ କରିଥାଏ | ଏହାଛଡ଼ା ମାଙ୍କଡ, ମୂଷା ଏବଂ ଗୁଣ୍ଡୁଚି ମୂଷା ପରି ପଶୁମାନଙ୍କ କାମୁଡ଼ିବା ଦ୍ବାରା ମଧ୍ୟ ଏହି ଭାଇରସ୍ ବ୍ୟାପିବାର ଆଶଙ୍କା ରହିଛି । ଯୌନ ସମ୍ପର୍କ ଦ୍ବାରା ମଧ୍ୟ ସଂକ୍ରମଣ ହୋଇପାରେ | ବିଶ୍ବ ସ୍ୱାସ୍ଥ୍ୟ ସଂଗଠନ କହିଛି ଯେ ସମଲିଙ୍ଗୀ ସମ୍ପର୍କ ସହ ଜଡିତ ଅନେକ ମାମଲାର ଯାଞ୍ଚ୍ କରାଯାଉଛି।

ଭାରତ ସରକାର ମଧ୍ୟ ମଙ୍କିପକ୍ସକୁ ନେଇ ଆଲର୍ଟ ମୋଡରେ ଅଛନ୍ତି। ବିଦେଶରେ ମଙ୍କିପକ୍ସ ପରିସ୍ଥିତି ଉପରେ ନଜର ରଖିବାକୁ କେନ୍ଦ୍ର ସରକାର ଜାତୀୟ ରୋଗ ନିୟନ୍ତ୍ରଣ କେନ୍ଦ୍ର (ଏନସିଡିସି) ଏବଂ ଆଇସିଏମଆରଙ୍କୁ କହିଛନ୍ତି। ଏହା ସହିତ ପ୍ରଭାବିତ ଦେଶରୁ ଆସୁଥିବା ସନ୍ଦିଗ୍ଧ ଅସୁସ୍ଥ ଯାତ୍ରୀଙ୍କ ନମୁନା ପରୀକ୍ଷା କରିବାକୁ ନିର୍ଦ୍ଦେଶ ଦିଆଯାଇଛି। ବର୍ତ୍ତମାନ ପର୍ଯ୍ୟନ୍ତ ଦେଶରେ ଏହି ରୋଗର କୌଣସି ମାମଲା ଠାବ ହୋଇନାହିଁ | ଅନ୍ୟପକ୍ଷରେ ବ୍ରିଟେନ, ସ୍ପେନ୍, ଇଟାଲୀ ସମେତ ଅନ୍ୟାନ୍ୟ ଦେଶରେ ଏହାର ମାମଲା ବଢ଼ିବାରେ ଲାଗିଛି | ‘ହୁ’ ଅନୁଯାୟୀ, ମଙ୍କିପକ୍ସରେ ମୃତ୍ୟୁ ହାର ୧୦ ପ୍ରତିଶତ ହୋଇପାରେ।