କରୋନା ଅପଡେଟ୍: ଦେଶରେ ଆଉ ୩୮,୩୫୩ ନୂଆ ମାମଲା, ଚିନ୍ତା ବଢ଼ାଉଛି ‘ଆର୍’ ଭାଲ୍ୟୁ

ନୂଆଦିଲ୍ଲୀ: ବୁଧବାର ଭାରତରେ ୪୦ ହଜାରରୁ କମ୍ କରୋନା ମାମଲା ରିପୋର୍ଟ ହୋଇଛି । ଗତ ୨୪ ଘଣ୍ଟା ମଧ୍ୟରେ, ୩୮,୩୫୩ ନୂଆ ମାମଲା ଚିହ୍ନଟ ହୋଇଥିବା ବେଳେ ୪୯୭ ଜଣଙ୍କର ମୃତ୍ୟୁ ହୋଇଛି। ଭାରତରେ ସକ୍ରିୟ ମାମଲା ସଂଖ୍ୟା ହେଉଛି ୩,୮୬,୩୫୧ ଯାହା ଗତ ୧୪୦ ଦିନ ମଧ୍ୟରେ ସର୍ବନିମ୍ନ ଅଟେ । ଦେଶରେ ସୁସ୍ଥତା ହାର ମଧ୍ୟ ସର୍ବାଧିକ ୯୭.୪୫% ରହିଛି | ବର୍ତ୍ତମାନ ପର୍ଯ୍ୟନ୍ତ ସମୁଦାୟ ୩,୧୨,୨୦,୯୮୧ ଲୋକ କରୋନାରୁ ଆରୋଗ୍ୟ ହୋଇଛନ୍ତି। ଗତ ୨୪ ଘଣ୍ଟା ମଧ୍ୟରେ ୪୦,୦୧୩ ରୋଗୀ ସୁସ୍ଥ ହୋଇଥିଲେ। ସାପ୍ତାହିକ ପଜିଟିଭିଟି ହାର ୨.୩୪% କମ୍ ଥିବାବେଳେ ଦୈନିକ ପଜିଟିଭିଟି ହାର ୨.୧୬% ଅଟେ । ଏହି ହାର ଗତ ୧୬ ଦିନ ଧରି ୩ ପ୍ରତିଶତରୁ କମ୍ ରହିଛି | ଗତ ୨୪ ଘଣ୍ଟା ମଧ୍ୟରେ ୪୧,୩୮,୬୪୬ ଜଣଙ୍କ ଟୀକାକରଣ ହୋଇଛି | ଏପର୍ଯ୍ୟନ୍ତ ସମୁଦାୟ ୫୧,୯୦,୮୦,୫୨୪ ଟୀକାଦାନ ହୋଇଛି।

କରୋନାର ତୃତୀୟ ଲହର ସମ୍ଭାବନା ମଧ୍ୟରେ ସରକାର ମଙ୍ଗଳବାର କହିଛନ୍ତି ଯେ କରୋନା ସଂକ୍ରମଣର ଜାତୀୟ ‘ଆର୍’ ଭାଲ୍ୟୁ ୧.୦ ରୁ ଅଧିକ ରହିଛି। ଦେଶର କରୋନା ସ୍ଥିତି ସମ୍ପର୍କରେ ସୂଚନା ଦେଇ ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ଯେ ଗତ ମାସରେ ଜାତୀୟ ‘ଆର’ ଭାଲ୍ୟୁ ୧.୦ ଅଙ୍କ ଅତିକ୍ରମ କରିଥିଲା। ଶେଷ ଥର ପାଇଁ ଏହା ମାର୍ଚ୍ଚରେ ୧.୩୨ ଥିଲା । କେତେ ସଂଖ୍ୟାରେ ଦୈନିକ ମାମଲା ପଞ୍ଜିକୃତ ହେଉନା କାହିଁକି, ଯଦି ‘ଆର୍’ ଭାଲ୍ୟୁ ୧.୦ ରୁ ଅଧିକ ହୁଏ, ତେବେ ଏହା ଚିନ୍ତାର ବିଷୟ ବୋଲି ସରକାର କହିଛନ୍ତି। ‘ଆର୍’ ଭାଲ୍ୟୁ ଦର୍ଶାଏ ଯେ ଜଣେ ଆକ୍ରାନ୍ତ ଦ୍ଵାରା କେତେ ଜଣ ସଂକ୍ରମିତ ହୁଅନ୍ତି ।