ଭାରତ ସହ ଆମଦାନୀ-ରପ୍ତାନୀ ବନ୍ଦ କଲା ତାଲିବାନ, ମହଙ୍ଗା ହେଲା ଶୁଖିଲା ଫଳ

ନୂଆଦିଲ୍ଲୀ: ତାଲିବାନ ଭାରତ ବିରୋଧରେ ନିଜର ପ୍ରକୃତ ରଙ୍ଗ ଦେଖାଇବା ଆରମ୍ଭ କରିଛି। କ୍ଷମତାକ ଫେରିବା କ୍ଷଣି ତାଲିବାନ ଭାରତ ସହ ଆମଦାନୀ ଏବଂ ରପ୍ତାନି ଉପରେ କଟକଣା ଲଗାଇଛି। ଭାରତୀୟ ରପ୍ତାନୀ ମହାସଂଘ ସଂଗଠନ କହିଛି ଯେ ତାଲିବାନ ପାକିସ୍ତାନ ମାର୍ଗ ଦେଇ ସମସ୍ତ ମାଲ ପରିବହନକୁ ବନ୍ଦ କରି ଦେଇଛି। ଯାହାର ପ୍ରଭାବ ଦିଲ୍ଲୀ ସମେତ ଦେଶର ଅନେକ ସହରରେ ପଡ଼ିଛି | ବିଶେଷକରି ଶୁଖିଲା ଫଳର ମୂଲ୍ୟରେ ଅହେତୁକ ବୃଦ୍ଧି ଘଟିଛି | ଦିଲ୍ଲୀର ବୃହତ୍ତମ ଶୁଖିଲା ଫଳ ବଜାର ଖାରି ବାବଲିରେ ଶୁଖିଲା ଫଳ ୨୦ ପ୍ରତିଶତ ପର୍ଯ୍ୟନ୍ତ ମହଙ୍ଗା ହୋଇଛି।

ଗୋଟିଏ ସପ୍ତାହ ମଧ୍ୟରେ ଭାରତରେ ଶୁଖିଲା ଫଳର ମୂଲ୍ୟ କିଲୋଗ୍ରାମ ପିଛା ୨୦୦-୨୫୦ ଟଙ୍କା ବୃଦ୍ଧି ପାଇଛି। ପିସ୍ତା, ବାଦାମ, ଡିମ୍ବିରି ପରି ଅନେକ ଶୁଖିଲା ଫଳ ଆଫଗାନିସ୍ତାନରୁ ଭାରତକୁ ଆସିଥାଏ | ବ୍ୟବସାୟୀମାନେ କହିଛନ୍ତି ଯେ ୧୫-୨୦ ଦିନ ଧରି କୌଣସି ଦ୍ରବ୍ୟ ଆସୁନାହିଁ, ଯେଉଁ କାରଣରୁ ବଜାରରେ ଶୁଖିଲା ଫଳର ଅଭାବ ରହିଛି | ଏହାଛଡା ଆଗକୁ ରକ୍ଷା ବନ୍ଧନ ଆସୁଛି, ତେଣୁ ଭାରତରେ ଶୁଖିଲା ଫଳର ଚାହିଦା ମଧ୍ୟ ବୃଦ୍ଧି ପାଇଛି।

ଆଫଗାନିସ୍ତାନ ହେଉଛି ଭାରତ ପାଇଁ ଶୁଖିଲା ଫଳର ଏକ ପ୍ରମୁଖ ଉତ୍ସ | ଏଠାରେ ବାଦାମ, ଓଲୁଅ ପରି ଶୁଖିଲା ଫଳ ପ୍ରଚୁର ପରିମାଣରେ ଉତ୍ପାଦନ ହୁଏ | କିନ୍ତୁ ଏବେ ଚରମପନ୍ଥୀ ତାଲିବାନ ପୁଣି ଥରେ ଆଫଗାନିସ୍ତାନକୁ ନିଜ ଅଧୀନକୁ ନେଇଛି। ଏହା ଦୁଇ ଦେଶ ମଧ୍ୟରେ ବ୍ୟବସାୟିକ ସମ୍ପର୍କକୁ ପ୍ରଭାବିତ କରିପାରେ | ବିଶେଷଜ୍ଞମାନେ କହିଛନ୍ତି ଯେ ତାଲିବାନ ଯୁଗରେ ଭାରତ-ଆଫଗାନିସ୍ତାନ ସମ୍ପର୍କ ପୂର୍ବ ଭଳି ରହିବା ସମ୍ଭବ ନୁହେଁ।