ଶ୍ରୀକାକୁଲମ ଠାରେ ଓଏସଆରଟିସି ବସ୍ ଦୁର୍ଘଟଣାରେ ୨୦ ଆହତ

ପାରଳାଖେମୁଣ୍ଡି: ମାଲକାନଗିରିରୁ ଭୁବନେଶ୍ବର ଯାଉଥିବା ଓଡ଼ିଶା ରାଜ୍ୟ ସଡ଼କ ପରିବହନ ନିଗମ (ଓଏସଆରଟି) ବସ୍ ଆନ୍ଧ୍ରପ୍ରଦେଶର ଶ୍ରୀକାକୁଲମ ଠାରେ ଦୁର୍ଘଟଣାଗ୍ରସ୍ତ ହୋଇଛି। ଶୁକ୍ରବାର ମଧ୍ୟରାତ୍ରରେ ଘଟିଥିବା ଏହି ଦୁର୍ଘଟଣାରେ ଡ୍ରାଇଭର୍ ଓ କଣ୍ଡକ୍ଟର୍ ସମେତ ପ୍ରାୟ ୨୦ ଜଣ ଆହତ ହୋଇଛନ୍ତି। ଆହତ ଯାତ୍ରୀମାନଙ୍କୁ ନିକଟସ୍ଥ ଶ୍ରୀକାକୁଲମ ଡାକ୍ତରଖାନାରେ ଚିକିତ୍ସା କରାଯାଇଛି। ବଙ୍ଗୋପସାଗରରେ ବାତ୍ୟା ପ୍ରଭାବରେ ଶୁକ୍ରବାର ରାତିରେ ପ୍ରବଳ ବର୍ଷା ହେଉଥିଲା। ଶ୍ରୀକାକୁଲମ ରାସ୍ତାରେ ଏକ ମୋଡରେ ବସ୍ ବୁଲୁଥିବା ବେଳେ ଭାରସାମ୍ୟ ହରାଇ ଏକ ଟ୍ରକ୍ ପଛପଟେ ବସଟି ପିଟି ହୋଇଯାଇଥିଲା। ଦୁର୍ଘଟଣାରେ ବସ୍ ଚାଳକ ଓ କଣ୍ଡକ୍ଟରଙ୍କ ଅବସ୍ଥା ଗୁରୁତର ରହିଛି। ଶ୍ରୀକାକୁଲମ ପୋଲିସ ଦୁର୍ଘଟଣାଗ୍ରସ୍ତ ବସ୍ ଜବତ କରି ତଦନ୍ତ ଚଳାଇଛି।