ପାରଳାଖେମୁଣ୍ଡି: ପ୍ରଥମେ ସ୍ବାମୀଙ୍କୁ ଘରେ ପଶି ମାରଣାସ୍ତ୍ରରେ ଆକ୍ରମଣ କରି ହତ୍ୟା କଲେ। ଏହାପରେ ପତ୍ନୀଙ୍କୁ ମଧ୍ୟ ଗାଁ ଦାଣ୍ଡରେ ଘର ଆଗରେ ହତ୍ୟା କଲେ। ଗଜପତି ଜିଲ୍ଲା ଅଡବା ଥାନା ଅନ୍ତର୍ଗତ ଘୋଡ଼ାପଙ୍କା ଗାଁରେ ସୋମବାର ରାତିରେ ଏଭଳି ଡବଲ ମର୍ଡର ଘଟିଛି। ହତ୍ୟାର ଶିକାର ହୋଇଛନ୍ତି ମୃତକ ହେଲେ ସେହି ଗାଁର କପିଳେନ୍ଦ୍ର ମଲ୍ଲିକ ଓ ତାଙ୍କ ସ୍ତ୍ରୀ ଶଶିତା ମଲ୍ଲିକ। ଗୁଣି ସନ୍ଦେହରେ ଓ ପୂର୍ବ ଶତ୍ରୁତାରୁ ଏଭଳି ବିଭତ୍ସ କାଣ୍ଡ ଘଟିଥିବା ଅନୁମାନ କରୁଛି ପୋଲିସ। ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ତଦନ୍ତ ଚଳାଇଛନ୍ତି।
ସୋମବାର ରାତି ପ୍ରାୟ ୯ଟା ବେଳେ ୨ ଜଣ ଦୁର୍ବୃତ୍ତ ଘରେ ପଶି ପ୍ରଥମେ କପିଳେନ୍ଦ୍ରଙ୍କୁ ମାରଣାସ୍ତ୍ରରେ ଆକ୍ରମଣ କରି ହତ୍ୟା କରିଥିଲେ। ସ୍ବାମୀଙ୍କୁ ବଞ୍ଚାଇବାକୁ ଉଦ୍ୟମ କରୁଥିବା ଶଶିତାଙ୍କୁ ଘରୁ ଟାଣି ଆଣି ଗାଁ ରାସ୍ତାରେ ହାଣି ପକାଇଥିଲେ ଦୁର୍ବୃତ୍ତ।ଗତ ଫେବ୍ରୁଆରୀ ମାସରେ ମଧ୍ୟ କପିଳେନ୍ଦ୍ରଙ୍କ ଉପରେ ଗୁଳି ମାଡ଼ ହୋଇଥିଲା। ସେ ବାଇକ୍ ଯୋଗେ ଗାଁକୁ ଆସୁଥିବା ବେଳେ ତାଙ୍କୁ କେହି ପଛପଟୁ ଗୁଳି ଚଳାଇ ହତ୍ୟା ଉଦ୍ୟମ କରିଥିଲା। ଚିକିତ୍ସା ପରେ ସୁସ୍ଥ ହୋଇଥିଲେ କପିଳେନ୍ଦ୍ର। ସେତେବେଳେ ତାଙ୍କୁ ଗୁଣି ସନ୍ଦେହରେ ଆକ୍ରମଣ କରାଯାଇଥିବା ନେଇ ଥାନାରେ ଅଭିଯୋଗ କରିଥିଲେ ସେ। ସେହି ମାମଲା ଏବେବି ପୋଲିସର ତଦନ୍ତାଧୀନ ରହିଛି। ଅଥଚ ସୋମବାର ରାତିରେ ସଂଘବଦ୍ଧ ଆକ୍ରମଣ କରି ସ୍ୱାମୀ ସ୍ତ୍ରୀଙ୍କୁ ହତ୍ୟା କରାଯାଇଛି।
Comments are closed.