ବର୍ଜ୍ୟ ପରିଚାଳନା ପାଇଁ ବିଏମସିର ଅହରହ ଉଦ୍ୟମ , ନାଗରିକଙ୍କ ସହଯୋଗ ଲୋଡିଲେ କର୍ତ୍ତୃପକ୍ଷ

ଭୁବନେଶ୍ୱର – ସହରର ପରିମଳକୁ ବ୍ୟବସ୍ଥିତ କରିବାପାଇଁ ଭୁବନେଶ୍ବର ମହାନଗର ନିଗମ ( ବିଏମସି ) ତରଫରୁ ପ୍ରୟାସ ଚାଲିଛି । କେବଳ ସେତିକି ନୁହେଁ , ଗୋଷ୍ଠୀ ସହଯୋଗରେ କିପରି ଏହାକୁ ଅଧିକ ସକ୍ରିୟ କରି ହେବ ସେଥିପାଇଁ ମଧ୍ୟ ତୃଣମୂଳ ସ୍ତରରୁ ସହକର୍ମୀମାନଙ୍କୁ ସକ୍ରିୟ କରାଯାଉଅଛି । ସୂଚନାଯୋଗ୍ୟ , ବର୍ଷବର୍ଷ ଧରି ଦାରୁଠେଙ୍ଗ ଡମ୍ପିଂ ୟାର୍ଡଠାରେ ପକାଯାଉଥିବା ଅଳିଆକୁ ସବୁଦିନ ପାଇଁ ବନ୍ଦ କରାଯାଇଅଛି ଏବଂ ପଡି ରହିଥିବା ଅଳିଆର ନିୟମଗତ ଏବଂ ସାମାଜିକ ସମାଧାନକୁ ସାମ୍ନାକରି ବିଏମସି କର୍ତ୍ତୃପକ୍ଷ ନିଜ ଅଂଚଳରେ ବର୍ଜ୍ୟ ପରିଚାଳନା କରିବାର ପ୍ରତିଶ୍ରୁତି ପାଳନ କରିଛନ୍ତି । ତେଣୁ ୧୭ ମଇ ୨୦୨୩ ପରଠାରୁ ବିଏମସି ଅଂଚଳର ବର୍ଜ୍ୟ ଦାରୁଠେଙ୍ଗ ନ ଯାଇ ସ୍ଥାନୀୟ ଟିଟିଏସ୍ ଏବଂ ଏମ୍ସିସି ଓ ଏମଆରଏଫମାନଙ୍କରେ ପ୍ରକ୍ରିୟା ପାଇଁ ଅଣାଯାଇ ଏହାର ପ୍ରକ୍ରିୟାକରଣ କରାଯାଉଅଛି । ଘରୋଇ ଏବଂ ଆବାସିକ ଅଂଚଳର ବର୍ଜ୍ୟକୁ ପୃଥକକରଣ ଭାବରେ ସଫାଗାଡି ଦ୍ଵାରା ସଂଗ୍ରହ କରାଯାଇ ଓଦା ବର୍ଜ୍ୟବସ୍ତୁରୁ ମୋଖତ ପ୍ରସ୍ତୁତ ହେଉଥିବାବେଳେ ଶୁଖିଲା ବର୍ଜ୍ୟବସ୍ତୁକୁ ଏମ୍ ଆର୍ ଏଫ୍ ରେ ପୃଥକ କରାଯାଇ ଏହାର ପୁନଃ ବିନିଯୋଗ ନିମନ୍ତେ ରାଜ୍ୟ ପ୍ରଦୂଷଣ ବୋର୍ଡର ଅନୁମୋଦନ ପ୍ରାପ୍ତ ସଂସ୍ଥାଙ୍କୁ ନିୟମ ମୁତାବକ ହସ୍ତାନ୍ତର କରାଯାଉଛି । ସହରରୁ ବାହାରୁଥିବା ମିଶ୍ରିତବର୍ଜ୍ୟକୁ ଟିଟିଏସ୍ କୁ ନିଆଯାଇ ରଖାଯାଉଅଛି । ଏହି ଅଳିଆର ବିଜ୍ଞାନ ସମ୍ମତ ପକ୍ରିୟାକରଣ ପାଇଁ ବି ଏମ୍ ସି କର୍ତ୍ତୃପକ୍ଷ ସେହିଦିନଠାରୁ ନିଜସ୍ଵ ଯୋଜନା କରି ସାରାଦେଶରେ ଉପଲବ୍ଧ ପ୍ରଯୁକ୍ତିରୁ କେଉଁଟି ବେଶ୍ ଉପଯୋଗୀ ତାହର ବ୍ୟବହାର କରିବାକୁ କାର୍ଯ୍ୟଚାଲୁ ରହିଛି । ସହରରୁ ବାହାରୁଥିବା ମିଶ୍ରିତ ବର୍ଜ୍ୟ କିପରି ପୃଥକିକୃତ କରିହେବ ଯାହାକି ରହିଥିବା ଶୁଖିଲା ବସ୍ତୁକୁ ବଡରୁ ଛୋଟ କରି ବାଛିବା , ଇନର୍ଟ ଆଦି ପଡ଼ିରହିଥିବା ବର୍ଜ୍ୟର ପୃଥକି କରଣ , ସଂଗେ ସଂଗେ ପ୍ରତିଦିନ ଆସୁଥିବା ବର୍ଜ୍ୟର ପ୍ରକ୍ରିୟାକରଣ , ସ୍ଵତନ୍ତ୍ର ଜୈବିକ ଦ୍ରବଣର ପ୍ରୟୋଗରେ ବର୍ଜ୍ୟର କ୍ଷୟ ପ୍ରକ୍ରିୟା କରାଯାଇ ପରିମଳ ପରିଚାଳନା କରାଯାଉଅଛି । ଏଥିପାଇଁ ସ୍ଵତନ୍ତ୍ର ପଦ୍ଧତିରେ ଜମିରହିଥିବା ଅଳିଆକୁ ଛୋଟ ଛୋଟ ଗଦାରେ ପରିଣତ କରିବାକୁ ହୋଇଥାଏ , ତେଣୁ ପଡିରହିଥିବା ଅଳିଆକୁ ଆଣିବାବେଳେ ଏଥିରୁ ସ୍ବାଭାବିକଭାବେ ଗନ୍ଧ ବାହାରିଥାଏ । ପୁନଶ୍ଚ , ଏହି ଗନ୍ଧକୁ କମାଇବା ନିମନ୍ତେ ସ୍ଵତନ୍ତ୍ର ସିଂଚନ ମଧ୍ୟ କରାଯାଉଛି । ତେଣୁ ଏହି ଅଳିଆକୁ ଯଥାଶୀଘ୍ର ପ୍ରକ୍ରିୟାକରଣ କରିବା ଏବଂ ଏଥିପାଇଁ ଆବଶ୍ୟକ ଯନ୍ତ୍ରପାତି ସ୍ଥାପନ କରି କାର୍ଯ୍ୟ ଆରମ୍ଭ କରିବାକୁ କିଛିସମୟର ଆବଶ୍ୟକତା ରହିଅଛି । ବର୍ଜ୍ୟବସ୍ତୁର ପୃଥକିକରଣନିମନ୍ତେ ଏଠାରେ ସମାଧାନ ନିମନ୍ତେ ଦୁଇଟି ଧାଡିରେ ଆଠୋଗୋଟି ଟ୍ରମେଲର ଉପଯୋଗ କରାଯିବ । ଗୋଟିଏ ପଟର ଟ୍ରମେଲ ଦ୍ବାରା ଘଣ୍ଟାକୁ ୩୫ ରୁ ୪୦ ଟନ୍ ର ବର୍ଜ୍ୟ ପ୍ରକ୍ରିୟାକରଣ କରାଯାଇପାରିବାର ବ୍ୟବସ୍ଥା କରାଯାଉଛି । ଦୁଇପଟର ଟ୍ରମେଲ୍ ଦ୍ବାରା ଏକ ଘଂଟାକୁ ୭୦ ରୁ ୮୦ ଟନ୍‌ ବର୍ଜ୍ୟ ପ୍ରକ୍ରିୟାକରର ହୋଇପାରିବ । ବର୍ତମାନ ଟ୍ରମେଲ୍ ବସାଇବା କାର୍ଯ୍ୟ ଚାଲୁରହିଛି । ଏହି କାର୍ଯ୍ୟ ପ୍ରାୟ ୧୫ ଦିନ ମଧ୍ୟରେ ସରିଗଲେ , ଟ୍ରମେଲ୍‌ରେ ପୃଥକିକରଣ କାର୍ଯ୍ୟ ଆରମ୍ଭ ହୋଇଯିବ ଏବଂ ୬ ରୁ ୭ ମାସ ମଧ୍ୟରେ ଅଳିଆଗଦା କମିଆସିବ । ଏହାପରେ ବର୍ଜ୍ୟବସ୍ତୁ ଜମାରହିବା ସମ୍ପୂର୍ଣ୍ଣ ବନ୍ଦ ହୋଇଯିବ ଏବଂ ଡମ୍ଫ ଫ୍ରି ସିଟିର ଲକ୍ଷ୍ୟରେ ଆମେ ପହଂଚିବା ବୋଲି କହିଛନ୍ତି ବିଏମସି କମିଶନର ବିଜୟ ଅମୃତା କୁଲାଙ୍ଗେ । ଏହି ପ୍ରକ୍ରିୟାରେ ସହଯୋଗ ପାଇଁ ସେ ସରକାର , ସୈନିକ ସ୍କୁଲ କର୍ତ୍ତୃପକ୍ଷ ଏବଂ ସ୍ଥାନୀୟ ଗୋଷ୍ଠୀଙ୍କୁ ବଧେଇ ଜଣାଇଛନ୍ତି । ତେବେ , ଉକ୍ତ ବିଜ୍ଞାନ ସମ୍ମତ ପଦ୍ଧତିକୁ ଉତ୍ତମ ରପେ କରି ଏହାକୁ କାର୍ଯ୍ୟକ୍ଷମ କରିବାପାଇଁ ସ୍ଵତନ୍ତ୍ର ସମୟର ଆବଶ୍ୟକତା ରହିଅଛି ।ବିଏମସି ଏଥିପାଇଁ କାର୍ଯ୍ୟରତ ସଂସ୍ଥାଙ୍କ ସହଯୋଗରେ ନିୟମିତ କାର୍ଯ୍ୟର ତଦାରଖ କରିଚାଲିଅଛି । ଏପରିକି ଆମେ ରାତିରେ ମଧ୍ୟ କାମ ଚାଲୁ ରଖିଛୁ । ସଂପୃକ୍ତ ଅଂଚଳରେ ବୃକ୍ଷରେ।ପଣ ଏବଂ ଆନୁସଂଗିକ ଭିତିଭୂମି ବିକାଶ କାର୍ଯ୍ୟ ପାଇଁ ସ୍ଵତନ୍ତ୍ର ଯୋଜନା କରାଯାଇଛି । ଏହି ପରିପ୍ରେକ୍ଷୀରେ ନାଗରିକଙ୍କ ସହଯୋଗ ଏକାନ୍ତ ଜରୁରୀ ଯାହା ଆମ ଭୁବନେଶ୍ୱରର ପରିମଳ ପରିଚାଳନାର ସ୍ଥାୟୀ ସମାଧାନକୁ ଆଗେଇନେବ ବୋଲି ବି ଏମ୍ ସି ପକ୍ଷରୁ ନିବେଦନ କରାଯାଇଅଛି ।