ଭୁବନେଶ୍ୱର – ଓଡ଼ିଶା ଗ୍ରାମ୍ୟ ଉନ୍ନୟନ ଓ ବିପଣନ ସମିତି (ଓରମାସ) ପଞ୍ଚାୟତିରାଜ ଓ ପାନୀୟ ଜଳ ବିଭାଗ, ଓଡ଼ିଶା ସରକାରଙ୍କ ପକ୍ଷରୁ ସ୍ଥାନୀୟ ବରମୁଣ୍ଡା ବିଜୁ ପଟ୍ଟନାୟକ ପଡ଼ିଆରେ ଶନିବାରଠାରୁ ଆରମ୍ଭ ହୋଇଥିବା ୧୦ ଦିନିଆ ‘ଶିଶିର ସରସ’ ମେଳାରେ ‘ମୋ ସ୍କୁଲ୍ ଅଭିଯାନ’ ପକ୍ଷରୁ ଏକ ସୁନ୍ଦର ଆଇଇସି (ସୂଚନା, ଶିକ୍ଷା ଓ ଯୋଗାଯୋଗ) ଷ୍ଟଲ୍ ଖୋଲାଯାଇଛି। ଏଥିରେ ‘ମୋ ସ୍କୁଲ୍ ଅଭିଯାନ’ର ଲକ୍ଷ୍ୟ ଓ ଆଭିମୁଖ୍ୟ ପ୍ରଦର୍ଶିତ ହୋଇଛି। ଏଥିସହ କଫି ଟେବୁଲ ବୁକ୍, ‘ମୋ ସ୍କୁଲ୍’ ତରଫରୁ ପ୍ରକାଶ ପାଉଥିବା ତ୍ରୈମାସିକ ସୂଚନା ପତ୍ରିକା, ବ୍ରୋଚର, ଲିଫଲେଟ୍, ବ୍ୟାଜ୍ ଆଦି ଦ୍ୱାରା ଲୋକଙ୍କୁ ଏହାର ସଫଳତା ସମ୍ପର୍କରେ ମଧ୍ୟ ସୂଚନା ଦିଆଯାଉଛି। ଯେଉଁ ବିଦ୍ୟାଳୟଗୁଡ଼ିକ ଗୁଣାତ୍ମକ ଶିକ୍ଷାଦାନ କ୍ଷେତ୍ରରେ ଅଗ୍ରଣୀ ଭୂମିକା ନେଉଛନ୍ତି, ସେମାନଙ୍କ ସମ୍ପର୍କରେ ସୂଚନାପତ୍ରରେ ତଥ୍ୟ ପ୍ରଦାନ କରି ସେମାନଙ୍କୁ ଉତ୍ସାହିତ କରାଯାଉଛି। ପ୍ରଥମ ଦିନରେ ଏହି ଷ୍ଟଲକୁ ପ୍ରାୟ ଦୁଇ ହଜାର ଦର୍ଶକ ବୁଲି ଦେଖିଥିବା ବେଳେ ଲିଫଲେଟ୍ ଜରିଆରେ ଏହାର ସଫଳତା ସମ୍ପର୍କରେ ସେମାନଙ୍କୁ ସୂଚନା ଦିଆଯାଇଛି।
ଉଲ୍ଲେଖଯୋଗ୍ୟ, ‘ମୋ ସ୍କୁଲ୍ ଅଭିଯାନ’ ପୁରାତନ ଛାତ୍ରଛାତ୍ରୀ ଓ ସେମାନେ ପଢୁଥିବା ବିଦ୍ୟାଳୟ ମଧ୍ୟରେ ସମ୍ପର୍କର ସୁଦୃଢ଼ ସେତୁଟିଏ ନିର୍ମାଣ କରି ପାରିଥିବା ବେଳେ ସର୍ବାଧିକ ପୁରାତନ ଛାତ୍ରଙ୍କୁ ସେମାନଙ୍କ ବିଦ୍ୟାଳୟ ସହ ଯୋଡ଼ି ଏ କ୍ଷେତ୍ରରେ ଏକ ରେକର୍ଡ କରିପାରିଛି। ଏହି ଷ୍ଟଲ୍ ଜରିଆରେ ଚଳିତ ମାସ ଶେଷରେ ହେବାକୁ ଯାଉଥିବା ‘ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର’ ସମ୍ପର୍କରେ ମଧ୍ୟ ଲୋକଙ୍କୁ ସୂଚନା ଦିଆଯାଉଛି।
Comments are closed.