ଜୟପୁର: ଆଇପିଏଲ୍ ୨୦୨୪ର ଚତୁର୍ଥ ମ୍ୟାଚରେ ରବିବାର ରାଜସ୍ଥାନ ରୟାଲ୍ସ ୨୦ ରନରେ ଲକ୍ଷ୍ନୌ ସୁପର ଜାଏଣ୍ଟସକୁ ହରାଇ ଅଭିଯାନ ଆରମ୍ଭ କରିଛି ।
ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ରାଜସ୍ଥାନ ନିର୍ଦ୍ଧାରିତ ୨୦ ଓଭରରେ ୪ ୱିକେଟ୍ ହରାଇ ୧୯୩ ରନ୍ କରିଥିଲା।
ଏହାର ଜବାବରେ ଲକ୍ଷ୍ନୌ ୬ ୱିକେଟ୍ ହରାଇ ୧୭୩ ରନ୍ କରିବାକୁ ସକ୍ଷମ ହୋଇଥିଲା।
୧୯୪ ରନର ବିଜୟ ଲକ୍ଷ୍ୟକୁ ପିଛା କରିବାକୁ ଯାଇ ଲକ୍ଷ୍ନୌ ସୁପର ଜାଏଣ୍ଟସର ଆରମ୍ଭ ଭଲ ନଥିଲା | ଦଳ ମାତ୍ର ୧୧ ରନରେ ତିନି ୱିକେଟ୍ ହରାଇ ଅସୁବିଧାରେ ପଡ଼ିଥିଲା । ଏହା ପରେ ଅଧିନାୟକ କେ.ଏଲ୍ ରାହୁଲ ୪୪ ବଲରେ ୫୮ ରନ୍ କରିଥିବା ବେଳେ ଦୀପକ ହୁଡା ୧୩ ବଲରେ ୨୬ ରନର ଦ୍ରୁତ ଇନିଂସ ଖେଳିଥିଲେ | ନିକୋଲାସ ପୁରନ ୪୧ ବଲରେ ସର୍ବାଧିକ ୬୪ ରନ କରି ଅପରାଜିତ ରହିଥିଲେ ମଧ୍ୟ ଦଳକୁ ଜିତାଇ ପାରିନଥିଲେ।
ରାଜସ୍ଥାନ ରୟାଲ୍ସ ପକ୍ଷରୁ ଟ୍ରେଣ୍ଟ ବୋଲ୍ଟ ଦୁଇଟି ୱିକେଟ୍ ନେଇଥିଲେ।
ପୂର୍ବରୁ ପ୍ରଥମେ ବ୍ୟାଟିଂ କରିଥିବା ରାଜସ୍ଥାନ ତରଫରୁ ଅଧିନାୟକ ସଞ୍ଜୁ ସାମସନ୍ ୫୨ ବଲରେ ଅପରାଜିତ ୮୨ ରନର ଚମତ୍କାର ଇନିଂସ୍ ଖେଳିଥିଲେ । ତାଙ୍କ ଇନିଂସରେ ୬ଟି ଛକା ଓ ତିନୋଟି ଚଉକା ମାରିଥିଲେ।
ସାମସନଙ୍କ ବ୍ୟତୀତ ରିୟାନ୍ ପରାଗ ୨୯ଟି ବଲରେ ଦ୍ରୁତ ୪୩ ରନ୍ ସଂଗ୍ରହ କରିଥିଲେ। ଯଶସ୍ବୀ ଜୈସୱାଲ ୨୪ ରନ କରିଥିବା ବେଳେ ଧ୍ରୁବ ଜୁରେଲ ୨୦ ରନ୍ କରିଥିଲେ।
ଲକ୍ଷ୍ନୌ ତରଫରୁ ନବୀନ ଉଲ ହକ୍ ଦୁଇଟି ୱିକେଟ୍ ନେଇଥିଲେ।
Comments are closed.