‘ଘୃଣାର ରାଜନୀତି ବନ୍ଦ କରନ୍ତୁ’, ଦେଶରେ ସାମ୍ପ୍ରଦାୟିକ ହିଂସା ନେଇ ପ୍ରଧାନମନ୍ତ୍ରୀ ମୋଦିଙ୍କୁ ୧୦୦ରୁ ଊର୍ଦ୍ଧ୍ବ ପୂର୍ବତନ ଅମଲାତନ୍ତ୍ରୀଙ୍କ ଖୋଲା ଚିଠି

ନୂଆଦିଲ୍ଲୀ: ନିକଟରେ ଦେଶର ବିଭିନ୍ନ ସ୍ଥାନରେ ଘଟିଥିବା ସାମ୍ପ୍ରଦାୟିକ ହିଂସାରେ ଚିନ୍ତା ପ୍ରକଟ କରି ଶହେରୁ ଉର୍ଦ୍ଧ୍ବ ପୂର୍ବତନ ଅମଲାତନ୍ତ୍ରୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖିଛନ୍ତି। “ଘୃଣାର ରାଜନୀତି” ଶେଷ କରିବା ପାଇଁ ପଦକ୍ଷେପ ନେବାକୁ ସେମାନେ ପ୍ରଧାନମନ୍ତ୍ରୀଙ୍କୁ ନିବେଦନ କରିଛନ୍ତି ।

ମୋଦିଙ୍କ ପାଖକୁ ଲେଖିଥିବା ଏହି ଖୋଲା ଚିଠିରେ ପୂର୍ବତନ ଅମଲାତନ୍ତ୍ରୀମାନେ କହିଛନ୍ତି ଯେ ଆମେ ଦେଶରେ ଘୃଣାରେ ପରିପୂର୍ଣ୍ଣ ଧ୍ବଂସଲୀଳାର ଉନ୍ମାଦନା ଦେଖୁଛୁ, ଯେଉଁଠାରେ ବଳି ବେଦୀରେ କେବଳ ମୁସଲମାନ ଏବଂ ଅନ୍ୟ ସଂଖ୍ୟାଲଘୁ ସମ୍ପ୍ରଦାୟର ଲୋକ ନୁହଁନ୍ତି, ବରଂ ସମ୍ବିଧାନ ମଧ୍ୟ ରହିଛି।

ଚିଠିରେ କୁହାଯାଇଛି ଯେ “ପୂର୍ବତନ ସରକାରୀ କର୍ମଚାରୀ ଭାବରେ ଆମେ ସାଧାରଣତଃ ନିଜର ମତ ଏପରି କଡ଼ା ଶବ୍ଦରେ ପ୍ରକାଶ କରିବାକୁ ଇଚ୍ଛା କରୁନାହୁଁ, କିନ୍ତୁ ଆମର ପୂର୍ବପୁରୁଷଙ୍କ ଦ୍ୱାରା ତିଆରି ସାମ୍ବିଧାନିକ ଭିତ୍ତିଭୂମି ଧ୍ବଂସ ହେବାରେ ଲାଗିଛି।” ଦେଶରେ ଏଭଳି ସ୍ଥିତି ଆମକୁ ସ୍ବର ଉଠାଇବା ଏବଂ ନିଜ କ୍ରୋଧ ଓ ଯନ୍ତ୍ରଣା ବ୍ୟକ୍ତ କରିବାକୁ ବାଧ୍ୟ କରୁଛି ।

ଚିଠିରେ ଦର୍ଶାଯାଇଛି ଯେ ଗତ କିଛି ବର୍ଷ ଏବଂ ମାସ ମଧ୍ୟରେ ଆସାମ, ଦିଲ୍ଲୀ, ଗୁଜରାଟ, ହରିୟାଣା, କର୍ଣ୍ଣାଟକ, ମଧ୍ୟପ୍ରଦେଶ, ଉତ୍ତରପ୍ରଦେଶ ଏବଂ ଉତ୍ତରପ୍ରଦେଶରେ ସଂଖ୍ୟାଲଘୁ ସମ୍ପ୍ରଦାୟ, ବିଶେଷକରି ମୁସଲମାନମାନଙ୍କ ପ୍ରତି ଘୃଣା ଏବଂ ହିଂସା ବୃଦ୍ଧି ହୋଇଛି | ଦିଲ୍ଲୀ ବ୍ୟତୀତ ଏହି ରାଜ୍ୟରେ ବିଜେପି ସରକାର ଅଛି ଏବଂ ଦିଲ୍ଲୀରେ ପୋଲିସକୁ କେନ୍ଦ୍ର ସରକାର ନିୟନ୍ତ୍ରଣ କରୁଛନ୍ତି।

ପୂର୍ବତନ ଅଧିକାରୀମାନେ ପ୍ରଧାନମନ୍ତ୍ରୀଙ୍କ ନିକଟକୁ ସେମାନଙ୍କ ଚିଠିରେ କହିଛନ୍ତି, ଆପଣଙ୍କ ‘ସମସ୍ତଙ୍କ ସହିତ, ସମସ୍ତଙ୍କ ବିକାଶ, ସମସ୍ତଙ୍କ ବିଶ୍ୱାସ’ ସଂକଳ୍ପ ଧ୍ୟାନରେ ରଖି ଆମେ ଆପଣଙ୍କ ବିବେକକୁ ନିବେଦନ କରୁଛୁ । ଏହା ଆମର ଆଶା ଯେ ସ୍ବାଧୀନତାର ଅମୃତ ମହୋତ୍ସବର ଏହି ବର୍ଷରେ, ଦଳୀୟ ଦୃଷ୍ଟିକୋଣରୁ ଊର୍ଦ୍ଧ୍ବକୁ ଉଠି ଆପଣ ଘୃଣାର ରାଜନୀତି ବନ୍ଦ କରିବାକୁ ଆହ୍ବାନ କରିବେ |