ନାଗରିକତା ସଂଶୋଧନ ଆଇନ ମଧ୍ୟ ପ୍ରତ୍ୟାହାର କରିବାକୁ ବାଧ୍ୟ ହେବେ ସରକାର : ଓଓ୍ବେସି

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ତିନୋଟି କୃଷି ଆଇନ ପ୍ରତ୍ୟାହାର ନେଇ ଘୋଷଣା କରିବା ପରେ ବିରୋଧୀ ଦଳଙ୍କ ପ୍ରତିକ୍ରିୟା ଆସିବାରେ ଲାଗିଛି। ସମାଜବାଦୀ ପାର୍ଟିର ମୁଖ୍ୟ ଅଖିଳେଶ ଯାଦବଙ୍କଠାରୁ ଆରମ୍ଭ କରି ବିଏସପି ମୁଖ୍ୟ ମାୟାବତୀ ଓ କଂଗ୍ରେସ ସାଧାରଣ ସଚିବ ପ୍ରିୟଙ୍କା ଗାନ୍ଧୀ କେନ୍ଦ୍ର ସରକାରଙ୍କୁ ଆକ୍ରମଣ କରିଛନ୍ତି। ଏବେ ଏଆଇଏମ୍ଆଇଏମ୍ ମୁଖ୍ୟ ଅସଦୁଦ୍ଦିନ ଓଓ୍ବେସି ମଧ୍ୟ କୃଷି ଆଇନ ପ୍ରତ୍ୟାହାର ନିଷ୍ପତ୍ତି ଉପରେ ପ୍ରତିକ୍ରିୟା ରଖିଛନ୍ତି। ଓଓ୍ବେସି କହିଛନ୍ତି ଯେ ମୋଦି ସରକାର ଖୁବ ଶୀଘ୍ର ନାଗରିକତା ସଂଶୋଧନ ଆଇନ (ସିଏଏ) ଆଇନ ମଧ୍ୟ ପ୍ରତ୍ୟାହାର କରିବେ।

ଓଓ୍ବେସି କହିଛନ୍ତି, ‘କୃଷି ଆଇନକୁ ରଦ୍ଦ କରିବା ପାଇଁ ସରକାର ବିଳମ୍ବିତ ନିଷ୍ପତ୍ତି ନେଇଛନ୍ତି। ଏହା କୃଷକଙ୍କ ଆନ୍ଦୋଳନ ଏବଂ କୃଷକଙ୍କ ସଫଳତା | ଆଗକୁ ନିର୍ବାଚନ ରହିଛି, ତେଣୁ କେନ୍ଦ୍ର ସରକାର ଏହି ନିଷ୍ପତ୍ତି ନେଇଛନ୍ତି। ସେ ଦିନ ମଧ୍ୟ ଦୂର ନୁହେଁ, ଯେବେ ମୋଦି ସରକାର ‘ସିଏଏ’ ଆଇନ ମଧ୍ୟ ପ୍ରତ୍ୟାହାର କରିବେ |

ଏହାଛଡ଼ା ଓଓ୍ବେସି କାଶ୍ମୀରରେ ଧାରା ୩୭୦ ହଟାଇବା ଏବଂ ଚାଷୀଙ୍କୁ କ୍ଷତିପୂରଣ ଦେବା ଉପରେ ମଧ୍ୟ ମତ ପ୍ରକାଶ କରିଛନ୍ତି। ଓଓ୍ବେସି କହିଛନ୍ତି, ୩୭୦ ଅପସାରଣ ପରେ କାଶ୍ମୀରରେ କଣ ସ୍ଥିତି ସୁଧୁରିଗଲା? କାଶ୍ମୀରରେ କିଛି ପରିବର୍ତ୍ତନ ହେଉ ନାହିଁ |

ଆପଣ (କେନ୍ଦ୍ର)ଙ୍କ ଆଦର୍ଶ ଚିନ୍ତାଧାରାକୁ ବିକଶିତ କରିବା ପାଇଁ ଆପଣ ଏସବୁ କରୁଛନ୍ତି | ମୋଦି ସରକାର ପ୍ରତ୍ୟେକ ଦିଗରେ ବିଫଳ ହୋଇଛନ୍ତି। ବାଧ୍ୟବାଧକତାରେ ସରକାର ଏହି ନିୟମ ପ୍ରତ୍ୟାହାର କରିଛନ୍ତି | କୃଷକ ଆନ୍ଦୋଳନ ବେଳେ ପ୍ରାଣ ହରାଇଥିବା ୭୦୦ ଚାଷୀଙ୍କୁ ସରକାର କ୍ଷତିପୂରଣ ଦେବା ଉଚିତ୍ ବୋଲି ଓଓ୍ବେସି କହିଛନ୍ତି ‌।