ନୂଆଦିଲ୍ଲୀ: ଟି-୨୦ ବିଶ୍ୱକପରେ ଭାରତୀୟ ଦଳ ସେମିଫାଇନାଲକୁ ଯାଇପାରି ନାହିଁ । ବିରାଟ କୋହଲିଙ୍କ ଦଳ ସୁପର-୧୨ ପର୍ଯ୍ୟାୟରୁ ହିଁ ବାଦ୍ ପଡିଛି | ଭାରତ ଟୁର୍ଣ୍ଣାମେଣ୍ଟରୁ ଶୀଘ୍ର ବାହାରିବା ପରେ ପ୍ରଶଂସକ ଏବଂ ପୂର୍ବତନ ଖେଳାଳି ନିରାଶ ହୋଇଛନ୍ତି । ଭାରତକୁ ପ୍ରଥମ ଥର ବିଶ୍ୱ ଚାମ୍ପିୟନ କରିଥିବା କପିଳ ଦେବ ମଧ୍ୟ ଏଥର ଭାରତର ପ୍ରଦର୍ଶନକୁ ନେଇ ରାଗିଛନ୍ତି। କପିଳ ଦେବ କହିଛନ୍ତି ଯେ ଭାରତୀୟ ଦଳରେ ସାମିଲ ଷ୍ଟାର ଖେଳାଳିମାନେ ଦେଶ ଅପେକ୍ଷା ଆଇପିଏଲକୁ ପ୍ରାଥମିକତା ଦେଉଛନ୍ତି । ଏହି କାରଣରୁ ବିଶ୍ୱକପରେ ଭାରତର ଷ୍ଟାର ବ୍ୟାଟ୍ସମ୍ୟାନ୍ ଫ୍ଲପ୍ ହୋଇଥିଲେ ।
୧୯୮୩ ବିଶ୍ବକପ ବିଜୟୀ ଅଧିନାୟକ କପିଳ ଏକ ନ୍ୟୁଜ୍ ଚ୍ୟାନେଲକୁ କହିଛନ୍ତି, “ଯେତେବେଳେ ଖେଳାଳିମାନେ ଦେଶ ପାଇଁ ଖେଳିବା ପରିବର୍ତ୍ତେ ଆଇପିଏଲ୍ ଖେଳିବାକୁ ପସନ୍ଦ କରନ୍ତି, ଆମେ କ’ଣ ଆଉ କହିପାରିବା? ପ୍ରତ୍ୟେକ ଖେଳାଳି ନିଜ ଦେଶ ପାଇଁ ଖେଳିବାରେ ଗର୍ବ ଅନୁଭବ କରିବା ଉଚିତ୍। ”
କପିଲ ଦେବ କହିଛନ୍ତି ଯେ ପ୍ରଥମେ ଦେଶ ତା’ପରେ ଫ୍ରାଞ୍ଚାଇଜ କ୍ରିକେଟ୍। କିନ୍ତୁ ଆମର ଖେଳାଳିଙ୍କ ପ୍ରଦର୍ଶନ ଦେଖି ସେପରି ଅନୁଭବ ହୁଏ ନାହିଁ | ଏହି କିମ୍ବଦନ୍ତୀ ଅଲରାଉଣ୍ଡର କହିଛନ୍ତି ଯେ, ମୁଁ ଏହା କହୁ ନାହିଁ ଯେ ଫ୍ରାଞ୍ଚାଇଜ କ୍ରିକେଟ୍ ଖେଳ ନାହିଁ, କିନ୍ତୁ ଦଳର କାର୍ଯ୍ୟସୂଚୀ ଭଲ ଭାବେ ପ୍ରସ୍ତୁତ କରିବା ବିସିସିଆଇର ଦାୟିତ୍ୱ | ଆମକୁ ଆମର ଭୁଲରୁ ଶିଖିବାକୁ ହେବ ଏବଂ ଆଗକୁ ବଢିବାକୁ ପଡିବ |
ଟି-୨୦ ବିଶ୍ୱକପ୍ ପୂର୍ବରୁ ଆଇପିଏଲ୍ ର ଦ୍ବିତୀୟ ପର୍ଯ୍ୟାୟ ୟୁଏଇରେ ଅନୁଷ୍ଠିତ ହୋଇଥିଲା । ଏଥିରେ ସବୁ ଭାରତୀୟ ଖେଳାଳି ଖେଳିଥିଲେ । ଆଇପିଏଲ୍ ଓ ଟି-୨୦ ବିଶ୍ୱକପ୍ ମଧ୍ୟରେ ବେଶ୍ କମ୍ ଦିନର ବ୍ୟବଧାନ ଥିଲା । ଟି-୨୦ ବିଶ୍ୱକପ୍ ବେଳକୁ ଭାରତୀୟ ଖେଳାଳି ମାନସିକ ଓ ଶାରିରୀକ ଭାବେ କ୍ଲାନ୍ତ ହୋଇପଡିଥିଲେ ବୋଲି କିଛି ପୂର୍ବତନ ଖେଳାଳି କହିଥିଲେ । ଟି-୨୦ ବିଶ୍ୱକପ୍ ପୂର୍ବରୁ ଆଇପିଏଲ୍ ଆୟୋଜନ କରିବା ଭୁଲ୍ ନିଷ୍ପତ୍ତି ଥିଲା ବୋଲି କିଛି ବିଶେଷଜ୍ଞ ମତବ୍ୟକ୍ତ କରିଥିଲେ ।
ନ୍ୟୁଜିଲାଣ୍ଡ ଠାରୁ ଆଫଗାନିସ୍ତାନର ପରାଜୟ ପରେ ଭାରତୀୟ ଦଳର ସେମିଫାଇନାଲରେ ପହଞ୍ଚିବା ପାଇଁ ଶେଷ ଆଶା ମଧ୍ୟ ମଉଳି ଯାଇଥିଲା। ଟୁର୍ଣ୍ଣାମେଣ୍ଟ ଆରମ୍ଭରେ ଟାଇଟଲ ପାଇଁ ଭାରତୀୟ ଦଳ ଦୃଢ ଦାବିଦାର ବିବେଚିତ ହେଉଥିଲା। କିନ୍ତୁ ପ୍ରଥମ ମ୍ୟାଚ୍ରେ ପାକିସ୍ତାନ ଠାରୁ ୧୦ ୱିକେଟରେ ଏବଂ ଦ୍ବିତୀୟ ମ୍ୟାଚରେ ନ୍ୟୁଜଲାଣ୍ଡ ନିକଟରୁ ୮ ଓ୍ବିକେଟରେ ହାରିବା ଭାରତକୁ ମହଙ୍ଗା ପଡ଼ିଥିଲା।
ଟି-୨୦ ବିଶ୍ୱକପ୍ ପରେ ଭାରତୀୟ ଦଳ ନ୍ୟୁଜିଲ୍ୟାଣ୍ଡ ବିପକ୍ଷରେ ଘରୋଇ ପରିବେଶରେ ସିରିଜ୍ ଖେଳିବ । ନଭେମ୍ବର ୧୭ ରୁ ଟି-୨୦ ସିରିଜ୍ ଖେଳାଯିବ | ଏହା ପରେ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଖେଳାଯିବ । ଏହି ସିରିଜରୁ ରାହୁଲ ଦ୍ରାବିଡ ଭାରତୀୟ ଦଳର ନୂଆ କୋଚ୍ ଭାବେ ଦାୟିତ୍ଵ ଗ୍ରହଣ କରିବେ । ଟି-୨୦ ବିଶ୍ୱକପ୍ ପରେ କୋହଲି ଏହି ଫର୍ମାଟରେ ନେତୃତ୍ବ ଛାଡିବା ନେଇ ଘୋଷଣା କରିଥିଲେ । ତାଙ୍କ ସ୍ଥାନରେ ରୋହିତ ଶର୍ମା ନ୍ୟୁଜିଲାଣ୍ଡ ବିପକ୍ଷ ସିରିଜରୁ ପୂର୍ଣ୍ଣକାଳୀନ ଟି-୨୦ ଅଧିନାୟକ ଭାବେ ନିଯୁକ୍ତ ହେବା ସ୍ପଷ୍ଟ ହୋଇଛି । ଏହାଛଡ଼ା କୋହଲିଙ୍କ ହାତରୁ ଦିନିକିଆ ଅଧିନାୟକତ୍ବ ମଧ୍ୟ ଯିବା ସମ୍ଭାବନା ରହିଛି।
Comments are closed.