ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଦେଶରେ ବହୁ ପ୍ରତୀକ୍ଷିତ ୫-ଜି ସେବାର ଶୁଭାରମ୍ଭ କରିବେ। ଏହି ହାଇସ୍ପିଡ୍ ଇଣ୍ଟରନେଟ ସେବା ପ୍ରଥମ ପର୍ଯ୍ୟାୟରେ ୧୩ଟି ସହର ଅହମ୍ମଦାବାଦ, ବେଙ୍ଗାଲୁରୁ, ଚଣ୍ଡିଗଡ଼, ଚେନ୍ନାଇ, ଦିଲ୍ଲୀ, ଗାନ୍ଧିନଗର, ଗୁରୁଗ୍ରାମ, ହାଇଦ୍ରାବାଦ, ଜାମନଗର, କୋଲକାତା, ଲକ୍ଷ୍ନୌ, ମୁମ୍ବାଇ ଏବଂ ପୁଣେରେ ଆରମ୍ଭ ହୋଇପାରେ |
ଭାରତ ଉପରେ ୫-ଜି ର ମୋଟ ଅର୍ଥନୈତିକ ପ୍ରଭାବ ୨୦୩୫ ସୁଦ୍ଧା ୪୫୦ ବିଲିୟନ ଆମେରିକୀୟ ଡଲାର ପର୍ଯ୍ୟନ୍ତ ହେବ ବୋଲି ଆକଳନ କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର (ଅକ୍ଟୋବର ୧) ଭାରତରେ ୫-ଜି ସେବା ଆରମ୍ଭ କରିବେ ଏବଂ ଅକ୍ଟୋବର ୧ରୁ ୪ ଯାଏଁ ନୂଆଦିଲ୍ଲୀର ପ୍ରଗତି ମଇଦାନରେ ଅନୁଷ୍ଠିତ ହେବାକୁ ଥିବା ଇଣ୍ଡିଆ ମୋବାଇଲ କଂଗ୍ରେସ ୨୦୨୨ର ଷଷ୍ଠ ସଂସ୍କରଣର ଉଦଘାଟନ ମଧ୍ୟ କରିବେ ବୋଲି ଏକ ସରକାରୀ ବିବୃତିରେ କୁହାଯାଇଛି। ଉଲ୍ଲେଖଯୋଗ୍ୟ, ୪-ଜି ଠାରୁ ୫-ଜି ନେଟୱାର୍କ ସ୍ପିଡ୍ ୧୦ ଗୁଣ ଅଧିକ ଓ ଏହା ନିରବଚ୍ଛିନ୍ନ କନେକ୍ଟିଭିଟି ପ୍ରଦାନ କରିଥାଏ । ଏହାଛଡ଼ା ଏହି ସେବା ଏକା ସଙ୍ଗେ କୋଟି କୋଟି ଡିଭାଇସରେ ରିଅଲ ଟାଇମ୍ ଡାଟା ସେୟାର କରିବାରେ ସକ୍ଷମ | ସରକାରୀ ବିବୃତ୍ତିରେ କୁହାଯାଇଛି ଯେ ୫-ଜି ନୂତନ ଅର୍ଥନୈତିକ ସୁଯୋଗ ଏବଂ ସାମାଜିକ ଲାଭ ଆଣିପାରେ । ଯେଉଁଥିପାଇଁ ଏହା ଭାରତୀୟ ସମାଜ ପାଇଁ ଏକ ପରିବର୍ତ୍ତନଶୀଳ ଶକ୍ତି ହେବାର କ୍ଷମତା ରଖିଛି। ଏହା ଦେଶର ଅଭିବୃଦ୍ଧିର ପାରମ୍ପରିକ ପ୍ରତିବନ୍ଧକକୁ ହଟାଇବା, ଷ୍ଟାର୍ଟଅପ୍ ଏବଂ ବ୍ୟବସାୟିକ ଉଦ୍ୟୋଗ ଦ୍ୱାରା ଅଭିନବ ପ୍ରୟାସ ତଥା ‘ଡିଜିଟାଲ୍ ଇଣ୍ଡିଆ’ର ଦୃଷ୍ଟିକୋଣକୁ ଆଗେଇ ନେବାରେ ସାହାଯ୍ୟ କରିବ |
ପଞ୍ଚମ ପିଢ଼ି ତଥା ୫-ଜି ଟେଲିକମ୍ ସେବା ଦ୍ବାରା ମାତ୍ର କିଛି ସେକେଣ୍ଡ ମଧ୍ୟରେ ମୋବାଇଲ୍ କିମ୍ବା ଅନ୍ୟାନ୍ୟ ଡିଭାଇସରେ ଉଚ୍ଚମାନର ଲମ୍ବା ଭିଡିଓ କିମ୍ବା ଫିଲ୍ମ ଡାଉନଲୋଡ୍ କରି ହେବ | ଏହା ଏକ ବର୍ଗ କିଲୋମିଟର ପର୍ଯ୍ୟନ୍ତ ପ୍ରାୟ ଏକ ଲକ୍ଷ ଡିଭାଇସକୁ ସପୋର୍ଟ କରିବ | ଏହି ସେବା ସୁପରଫାଷ୍ଟ ସ୍ପିଡ୍ (୪-ଜି ଠାରୁ ପ୍ରାୟ ୧୦ ଗୁଣ କ୍ଷୀପ୍ର), କନେକ୍ଟିଭିଟି ବିଳମ୍ବକୁ କାଟିବା ଏବଂ କୋଟି କୋଟି ସଂଯୁକ୍ତ ଡିଭାଇସ୍ ମଧ୍ୟରେ ରିଅଲ୍ ଟାଇମ୍ ଡାଟା ସେୟାର କରିବାରେ ସକ୍ଷମ | ଏହା ୩-ଡି ହୋଲଗ୍ରାମ କଲିଂ, ମେଟାଭର୍ସ ଏବଂ ଶିକ୍ଷାଗତ ପ୍ରୟୋଗର ଏକ ନୂଆ ଅନୁଭୂତି ପ୍ରଦାନ କରିବ |
Comments are closed.