ଅମ୍ବାନୀ-ଆଦାନି ସମସ୍ତଙ୍କୁ କିଣିପାରିବେ, କିନ୍ତୁ ମୋ ଭାଇକୁ ନୁହେଁ: ପ୍ରିୟଙ୍କା

ନୂଆଦିଲ୍ଲୀ: କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ ତାଙ୍କ ଭାଇ ତଥା ସାଂସଦ ରାହୁଲ ଗାନ୍ଧୀଙ୍କୁ ଜଣେ ‘ଯୋଦ୍ଧା’ ବୋଲି ଅଭିହିତ କରିଛନ୍ତି । ତାଙ୍କ ଛବି ଖରାପ କରିବା ପାଇଁ ହଜାର ହଜାର କୋଟି ଟଙ୍କା ଖର୍ଚ୍ଚ କରୁଥିବା ସରକାରଙ୍କ ଚାପକୁ ସେ ଭୟ କରୁନାହାଁନ୍ତି ବୋଲି ପ୍ରିୟଙ୍କା କହିଛନ୍ତି।

ରାହୁଲ ଗାନ୍ଧୀଙ୍କ ନେତୃତ୍ୱରେ ‘ଭାରତ ଯୋଡା ଯାତ୍ରା’ ପ୍ରାୟ ଏକ ସପ୍ତାହର ବିରତି ପରେ ମଙ୍ଗଳବାର ପୁଣି ଆରମ୍ଭ ହୋଇଛି।

ଦିଲ୍ଲୀରୁ ଉତ୍ତରପ୍ରଦେଶକୁ ଯାଉଥିବା ଯାତ୍ରାକୁ ସ୍ୱାଗତ କରିବା ପାଇଁ ପ୍ରିୟଙ୍କା ଗାନ୍ଧୀ ଲୋନି ସୀମାରେ ପହଞ୍ଚିଥିଲେ।

ପ୍ରିୟଙ୍କା କହିଛନ୍ତି ଯେ ଅମ୍ବାନୀ ଏବଂ ଆଦାନୀଙ୍କ ପରି ଦେଶର ବଡ଼ ଶିଳ୍ପପତିମାନେ ବହୁ ରାଜନେତା, ପିଏସୟୁ ଏବଂ ମିଡିଆକୁ କିଣିଥାଇ ପାରନ୍ତି, କିନ୍ତୁ ସେମାନେ ମୋ ଭାଇଙ୍କୁ କେବେ କିଣି ପାରିବେ ନାହିଁ।

ସେ କହିଛନ୍ତି ଯେ ଲୋକମାନେ କହୁଛନ୍ତି ଯେ ରାହୁଲ ଗାନ୍ଧୀ ଥଣ୍ଡା ଅନୁଭବ କରନ୍ତି ନାହିଁ କାରଣ ସେ “ସତ୍ୟର ଢାଲ ପିନ୍ଧିଛନ୍ତି”।

ପ୍ରବଳ ଶୀତ ସତ୍ତ୍ୱେ ରାହୁଲ ଗାନ୍ଧୀ ଗତ କିଛି ଦିନ ହେବ ଟି-ସାର୍ଟ ପିନ୍ଧି ଯାତ୍ରା କରିବା ନେଇ ଚର୍ଚ୍ଚା ହୋଇଥିଲା ।

ଜମ୍ମୁ-କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ତଥା ନ୍ୟାସନାଲ କନଫରେନ୍ସ ନେତା ଫାରୁକ୍ ଅବଦୁଲ୍ଲା ମଙ୍ଗଳବାର ଭାରତ ଯୋଡ ଯାତ୍ରାରେ ଭାଗ ନେଇଥିଲେ।

ଏହି ଯାତ୍ରାରେ ପୂର୍ବତନ ର’ ମୁଖ୍ୟ ଏଏସ୍ ଦୁଲତ୍ ମଧ୍ୟ ସାମିଲ କରିଥିଲେ। ଏହା ପୂର୍ବରୁ ମଧ୍ୟ ରାହୁଲ ଗାନ୍ଧୀଙ୍କ ଏହି ଯାତ୍ରାରେ ପୂର୍ବତନ ଆରବିଆଇ ଗଭର୍ଣ୍ଣର ରଘୁରାମ ରାଜନ, କମଲ ହାସନ, ପୂଜା ଭଟ୍ଟ, ସ୍ୱରା ଭାସ୍କରଙ୍କ ସହ ବହୁ ପ୍ରସିଦ୍ଧ ବ୍ୟକ୍ତି ଯୋଗ ଦେଇଛନ୍ତି।

ବିକେୟୁ ତଥା କୃଷକ ନେତା ରାକେଶ ଟିକାୟତ କହିଛନ୍ତି ଯେ ତାଙ୍କ ଦଳ ସହ ଜଡିତ ଲୋକଙ୍କୁ ଏହି ଯାତ୍ରାରେ ଯୋଗଦେବାକୁ ଅନୁମତି ଦିଆଯାଇଛି, ଯଦିଓ ସେ ଏବଂ ଜିଲ୍ଲା ସଭାପତିଙ୍କ ଉପରେ ଥିବା ନେତାମାନେ ଏଥିରେ ଯୋଗଦେବେ ନାହିଁ।