ଇଡ଼ି ସମ୍ମୁଖରେ ରାଣା କପୁରଙ୍କ ଦାବି, ପ୍ରିୟଙ୍କା ଗାନ୍ଧୀଙ୍କ ଠାରୁ ଏମ୍ଏଫ୍ ହୁସେନ୍‌ଙ୍କ ପେଣ୍ଟିଂ ୨ କୋଟିରେ କିଣିବାକୁ ବାଧ୍ୟ କରାଯାଇଥିଲା

ନୂଆଦିଲ୍ଲୀ: ୟେସ୍ ବ୍ୟାଙ୍କର ସହ ପ୍ରତିଷ୍ଠାତା ରାଣା କପୁର ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ସମ୍ମୁଖରେ ଏକ ବଡ଼ ଖୁଲାସା କରିଛନ୍ତି। ସେ ଇଡିଙ୍କୁ କହିଛନ୍ତି ଯେ ସେ ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ଠାରୁ ଏମଏଫ ହୁସେନ୍‌ଙ୍କ ପେଣ୍ଟିଂ କିଣିବାକୁ ତାଙ୍କୁ ବାଧ୍ୟ କରାଯାଇଥିଲା । ସେ କହିଛନ୍ତି ଯେ ପ୍ରଦାନ କରାଯାଇଥିବା ଅର୍ଥକୁ ଗାନ୍ଧୀ ପରିବାର କଂଗ୍ରେସ ସଭାପତି ସୋନିଆ ଗାନ୍ଧୀଙ୍କ ଚିକିତ୍ସା ପାଇଁ ବ୍ୟବହାର କରିଥିଲେ। ମନି ଲଣ୍ଡରିଂ ମାମଲାରେ ଇଡି ଦ୍ବାରା ଦାଖଲ ହୋଇଥିବା ଚାର୍ଜସିଟରେ ଏହି ତଥ୍ୟ ସାମ୍ନାକୁ ଆସିଛି।

କେବଳ ଏତିକି ନୁହେଁ, ରାଣା କପୁର ଇଡି ଆଗରେ ଅନେକ ଖୁଲାସା କରିଛନ୍ତି। ରାଣା ଇଡିଙ୍କୁ କହିଛନ୍ତି ଯେ ତତ୍କାଳୀନ ପେଟ୍ରୋଲିୟମ ମନ୍ତ୍ରୀ ମୁରଲୀ ଦେଓରା ତାଙ୍କୁ କହିଥିଲେ ଯେ ଯଦି ସେ ଏମଏଫ ହୁସେନ୍‌ଙ୍କ ପେଣ୍ଟିଂ ନ କିଣନ୍ତି, ତେବେ ତାଙ୍କୁ ଗାନ୍ଧୀ ପରିବାର ସହ ସମ୍ପର୍କ ସ୍ଥାପନ କରିବାରେ ଅସୁବିଧା ହେବ ଏବଂ ସେ ‘ପଦ୍ମ ଭୂଷଣ’ ପୁରସ୍କାର ପାଇବାରୁ ବଞ୍ଚିତ ହେବେ ।

ଏଜେନ୍ସି ଅନୁଯାୟୀ, ରାଣା କପୁରଙ୍କ ବୟାନ ମନି ଲଣ୍ଡରିଂ ମାମଲାରେ ୟେସ୍ ବ୍ୟାଙ୍କର ସହ-ପ୍ରତିଷ୍ଠାତା, ତାଙ୍କ ପରିବାର, ଦେୱାନ୍ ହାଉସିଂ ଫାଇନାନ୍ସ ଲିମିଟେଡ୍ (ଡିଏଚ୍ଏଫ୍ଏଲ୍) ପ୍ରମୋଟର କପିଲ ଏବଂ ଧୀରଜ ଓ୍ବଧାଓ୍ବନ ବିରୋଧରେ ସ୍ୱତନ୍ତ୍ର କୋର୍ଟରେ ଦାଖଲ ହୋଇଥିବା ଦ୍ୱିତୀୟ ସପ୍ଲିମେଣ୍ଟାରୀ ଚାର୍ଜସିଟ୍ (ତୃତୀୟ ସାମଗ୍ରିକ) ଅଧୀନରେ ରେକର୍ଡ ହୋଇଛି | ରାଣା କପୁର ଦାବି କରିଛନ୍ତି ଯେ ସେ ୨ କୋଟି ଟଙ୍କାର ଚେକ୍ ପ୍ରିୟଙ୍କା ଗାନ୍ଧୀଙ୍କୁ ଦେଇଥିଲେ। ଏହା ପରେ ମିଲିନ୍ଦ ଦେଓରା ତାଙ୍କୁ କହିଥିଲେ ଯେ ବିକ୍ରୟରୁ ମିଳିଥିବା ଅର୍ଥକୁ ଗାନ୍ଧୀ ପରିବାର ନ୍ୟୁୟର୍କରେ ସୋନିଆ ଗାନ୍ଧୀଙ୍କ ଚିକିତ୍ସା ପାଇଁ ବ୍ୟବହାର କରିଥିଲେ।

ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଅଭିଯୋଗ କରିଥିଲା ଯେ ରାଣା କପୁର ଏବଂ ଦେୱାନ ହାଉସିଂ ଫାଇନାନ୍ସ ଲିମିଟେଡ (ଡିଏଚଏଫଏଲ) ପ୍ରମୋଟର କପିଲ ଏବଂ ଧୀରଜ ଓ୍ବଧାଓ୍ବନ ସନ୍ଦେହଜନକ କାରବାର ମାଧ୍ୟମରେ ୫,୦୫୦ କୋଟି ଟଙ୍କାର ଟଙ୍କା ହେରଫେର କରିଥିଲେ। ପ୍ରକାଶଯୋଗ୍ୟ ଯେ ମାର୍ଚ୍ଚ ୨୦୨୦ ରେ ଗିରଫ ହେବା ପରଠାରୁ ସେ ରାଣା କପୁର ଜେଲରେ ଅଛନ୍ତି।