ନୂଆଦିଲ୍ଲୀ: ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି)ର ପୁରୁଷ ଟିମ୍ ଯାହା ୧୬ ବର୍ଷ ଧରି କରିପାରି ନାହାଁନ୍ତି, ତାହା ମହିଳା ଦଳ ମାତ୍ର ଦ୍ବିତୀୟ ସଂସ୍କରଣରେ କରି ଦେଖାଇଛି । ସ୍ମୃତି ମନ୍ଧାନାଙ୍କ ନେତୃତ୍ୱାଧୀନ ଆରସିବି ମହିଳା ପ୍ରିମିୟର ଲିଗ୍ (ଡବ୍ଲୁପିଏଲ୍) ଟାଇଟଲ୍ ଜିତିଛି । ରବିବାର ଅନୁଷ୍ଠିତ ଫାଇନାଲରେ ଦିଲ୍ଲୀ କ୍ୟାପିଟାଲ୍ସକୁ ୮ ୱିକେଟରେ ହରାଇ ଚାମ୍ପିୟନ ହୋଇଛି ଆରସିବି।
ଭଲ ଆରମ୍ଭ ସତ୍ତ୍ବେ ଦିଲ୍ଲୀ ଆରସିବିର ସ୍ପିନରଙ୍କ ଜାଲରେ ଫସି ଚଳିତ ବର୍ଷ ମଧ୍ୟ ଟାଇଟଲ୍ ସୁଯୋଗ ହାତଛଡ଼ା କରିଥିଲା | ଗତ ବର୍ଷ ଟୁର୍ଣ୍ଣାମେଣ୍ଟର ପ୍ରଥମ ସଂସ୍କରଣରେ ବି ଦିଲ୍ଲୀ ଫାଇନାଲରେ ମୁମ୍ବାଇ ଇଣ୍ଡିଆନ୍ସ ଠାରୁ ହାରି ଯାଇଥିଲା।
ଆରସିବି ମହିଳା ଦଳ ପାଇଁ ଏହା ପ୍ରଥମ ଫାଇନାଲ ଥିଲା। ଧୀର ଆରମ୍ଭ ପରେ ସେମାନେ ଚାପର ମୁକାବିଲା କରି ଶେଷରେ ବିଜୟ ହାସଲ କରିଥିଲେ ।
ଆରସିବି ବୋଲିଂ ସାମ୍ନାରେ ଦିଲ୍ଲୀ କ୍ୟାପିଟାଲ୍ସ ବ୍ୟାଟରଙ୍କ ଖରାପ ପ୍ରଦର୍ଶନ ଯୋଗୁଁ ଦଳ ୧୮.୩ ଓଭରରେ ମାତ୍ର ୧୧୩ ରନ୍ କରି ଅଲ୍ଆଉଟ୍ ହୋଇଯାଇଥିଲା ।
ଏହି ଲକ୍ଷ୍ୟର ଜବାବରେ ଆରସିବି ମନ୍ଥର ଆରମ୍ଭ କରିଥିଲା । ତେବେ ଶେଷରେ ୧୯.୩ ଓଭରରେ ଦୁଇ ୱିକେଟ୍ ହରାଇ ୧୧୫ ରନ୍ କରି ଟାଇଟଲ୍ ଜିତିଥିଲା | ଆରସିବି ବ୍ୟାଟରମାନେ ଦଳର ପ୍ରଥମ ଫାଇନାଲରେ ବହୁତ ଚାପରେ ଥିବା ମନେ ହୋଇଥିଲେ । କିନ୍ତୁ ଶେଷରେ ଚାପର ମୁକାବିଲା କରିବାରେ ସଫଳ ହୋଇଥିଲେ | ରିଚା ଘୋଷ (୧୭*, ୧୪ ବଲ୍, ୨ ଚୌକା) ଦଳ ପାଇଁ ବିଜୟ ସୂଚକ ଚୌକା ମାରିଥିଲେ।
କ୍ୟାପଟେନ ମନ୍ଧାନା ୩୯ ବଲରେ ୩୧ ରନର ମନ୍ଥର ଇନିଂସ ଖେଳିଥିବା ବେଳେ ସୋଫି ଡିଭାଇନ୍ ପାଞ୍ଚଟି ଚୌକା ଓ ଗୋଟିଏ ଛକା ସହିତ ୨୭ ବଲରେ ୩୨ ରନ୍ କରିଥିଲେ। ଏଲିସି ପେରି ୩୫ ରନ୍ କରି ଅପରାଜିତ ରହିଥିଲେ।
ମହିଳା (ଡବ୍ଲୁପିଏଲ୍) ଏବଂ ପୁରୁଷ ଫ୍ରାଞ୍ଚାଇଜ୍ କ୍ରିକେଟ୍ (ଇଣ୍ଡିଆନ୍ ପ୍ରିମିୟର ଲିଗ୍)ରେ ଆରସିବିର ଏହା ପ୍ରଥମ ଟାଇଟଲ୍ |
Comments are closed.