ମୁମ୍ବାଇ: ହାଇ ପ୍ରୋଫାଇଲ୍ ଡ୍ରଗ୍ସ ପାର୍ଟି ମାମଲାରେ ବଲିଉଡ୍ ସୁପରଷ୍ଟାର ଶାହରୁଖ ଖାନଙ୍କ ପୁଅ ଆର୍ୟନଙ୍କୁ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନସିବି) ଗିରଫ କରିଛି। ପୂର୍ବରୁ ଏହି ମାମଲାରେ ତାଙ୍କୁ ବହୁ ଘଣ୍ଟା ଧରି ଜେରା କରାଯାଇଥିଲା। ଏହି ମାମଲାରେ ୩ ଯୁବତୀଙ୍କ ସମେତ ଅନ୍ୟ ୮ ଜଣଙ୍କୁ ମଧ୍ୟ ଗିରଫ କରିଛି ଏନସିବି। ଏକ କ୍ରୁଜ୍ ସିପ୍ ରେ ଚାଲିଥିବା ଉକ୍ତ ଡ୍ରଗ୍ସ ପାର୍ଟିର ଆୟୋଜକଙ୍କୁ ଏନସିବି କାର୍ଯ୍ୟାଳୟକୁ ପଚରାଉଚରା ପାଇଁ ଅଣାଯାଇଛି।
ଏନସିବି ମୁଖ୍ୟ ଏସ.ଏନ୍ ପ୍ରଧାନ କହିଛନ୍ତି ଯେ ଦୁଇ ସପ୍ତାହ ତଦନ୍ତ ପରେ ଆମେ ଏହି ରେଡ୍ କରିଥିଲୁ। ଏଥିରେ ବଲିଉଡର ଅନେକ ଲୋକଙ୍କ ଲିଙ୍କ୍ ସାମ୍ନାକୁ ଆସିଛି। ଆମେ ନିରପେକ୍ଷ ଭାବେ କାର୍ଯ୍ୟାନୁଷ୍ଠାନ ଗ୍ରହଣ କରୁଛୁ।
‘କର୍ଡେଲିଆ ଦି ଇମ୍ପ୍ରେସ୍’ ନାମକ ଏକ ଜାହାଜରେ ଏନସିବି ଶନିବାର ରାତିରେ ରେଡ୍ କରିଥିଲା। ଏହି ଅପରେସନ୍ ବହୁ ଘଣ୍ଟା ଧରି ଚାଲିଥିଲା |
ଉକ୍ତ କ୍ରୁଜ୍ ଜାହାଜରେ ଏକ ଡ୍ରଗ୍ ପାର୍ଟି ଚାଲିଥିବା ନେଇ ସୂଚନା ପାଇବା ପରେ ଏନସିବି ଟିମ୍ ଅପରେସନ ଆରମ୍ଭ କରିଥିଲା । ଏନସିବି ଅଧିକାରୀମାନେ ନିଜକୁ ଯାତ୍ରୀ ଭାବରେ ପରିଚୟ ଦେଇ କ୍ରୁଜରେ ଚଢିଥିଲେ। ଏହାପରେ ଡ୍ରଗ୍ସ ପାର୍ଟି ଉପରେ ସେମାନେ ରେଡ୍ କରିଥିଲେ। ସୂଚନାନୁସାରେ, ଜାହାଜରୁ ବିପୁଳ ପରିମାଣର ଡ୍ରଗ୍ସ ଜବତ କରାଯାଇଛି। ଏହାର ମୂଲ୍ୟ ବହୁ କୋଟି ଟଙ୍କା ହେବ ବୋଲି କୁହାଯାଉଛି। ଜବତ ହୋଇଥିବା ଡ୍ରଗ୍ସ ମଧ୍ୟରେ ଏମଡି କୋକ୍ ଏବଂ ହ୍ୟାଶିଶ୍ ଭଳି ନିଷିଦ୍ଧ ନିଶାଦ୍ରବ୍ୟ ରହିଛି ।
ଡ୍ରଗ୍ ପାର୍ଟି ଚାଲିଥିବା ଏହି କ୍ରୁଜରେ ଏଣ୍ଟ୍ରି ଫି’ ୬୦ ହଜାରରୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ରଖାଯାଇଥିଲା। ଏନସିବି ରେଡ୍ ସମୟରେ ପ୍ରାୟ ୬୦୦ ହାଇ ପ୍ରୋଫାଇଲ୍ ଲୋକ ଏହି କ୍ରୁଜରେ ଉପସ୍ଥିତ ଥିଲେ । ଏହି ବିଳାସମୟ କ୍ରୁଜ୍ ଜାହାଜର କ୍ଷମତା ପ୍ରାୟ ୧୮୦୦ ବୋଲି କୁହାଯାଇଛି | ଏହି ସମସ୍ତ ବଡ ହାଇ ପ୍ରୋଫାଇଲ୍ ଲୋକଙ୍କୁ ଇନଷ୍ଟାଗ୍ରାମ ଏବଂ ଅନ୍ୟାନ୍ୟ ସୋସିଆଲ୍ ମିଡିଆ ପ୍ଲାଟଫର୍ମ ମାଧ୍ୟମରେ ଏହି ପାର୍ଟିକୁ ନିମନ୍ତ୍ରଣ କରାଯାଇଥିଲା | ଡ଼ାକରେ ମଧ୍ୟ କିଟ୍ ମାଧ୍ୟମରେ କିଛି ଲୋକଙ୍କୁ ନିମନ୍ତ୍ରଣ ପଠାଯାଇଥିଲା |
Comments are closed.