ଆଜି ହିମାଚଳର ନୂଆ ମୁଖ୍ୟମନ୍ତ୍ରୀ ଭାବେ ଶପଥ ନେବେ ସୁଖବିନ୍ଦର ସୁଖୁ, ମୁକେଶ ଅଗ୍ନିହୋତ୍ରୀ ହେବେ ଉପମୁଖ୍ୟମନ୍ତ୍ରୀ

ଶିମଲା: କଂଗ୍ରେସର ବରିଷ୍ଠ ନେତା ଚାରି ଦଳର ବିଧାୟକ ସୁଖବିନ୍ଦର ସିଂହ ସୁଖୁ ରବିବାର ହିମାଚଳ ପ୍ରଦେଶର ନୂଆ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବେ। ଶପଥ ଗ୍ରହଣ ସମାରୋହ ରାଜ ଭବନରେ ଅନୁଷ୍ଠିତ ହେବା ସମ୍ଭାବନା ରହିଛି। ତାଙ୍କ ସହ ଉପମୁଖ୍ୟମନ୍ତ୍ରୀ ଭାବରେ ମୁକେଶ ଅଗ୍ନିହୋତ୍ରୀ ଶପଥ ନେବେ। ବିଧାନସଭା ନିର୍ବାଚନରେ ​​ବିଜୟ ପରେ କଂଗ୍ରେସ ଦଳରେ ମୁଖ୍ୟମନ୍ତ୍ରୀ ପଦକୁ ନେଇ ଛକାପଞ୍ଝା ଲାଗି ରହିଥିଲା । ଦାବି ଏବଂ ପ୍ରତିବାଦ ମଧ୍ୟରେ ପାର୍ଟି ହାଇକମାଣ୍ଡ ସୁଖୁଙ୍କୁ ମୁଖ୍ୟମନ୍ତ୍ରୀ କରିବାକୁ ନିଷ୍ପତ୍ତି ନେଇଥିଲେ।

ଉଲ୍ଲେଖଯୋଗ୍ୟ ଯେ ହିମାଚଳ ପ୍ରଦେଶର ୬ ଥର ମୁଖ୍ୟମନ୍ତ୍ରୀ ହୋଇଥିବା ବୀରଭଦ୍ର ସିଂହଙ୍କ ପରିବାରକୁ ଟପି ଦଳ ସୁଖବିନ୍ଦର ସିଂହ ସୁଖୁଙ୍କ ଉପରେ ଭରସା ପ୍ରକାଶ କରିଥିଲେ। ମୁଖ୍ୟମନ୍ତ୍ରୀ ପଦ ପାଇଁ ନାମ ସ୍ଥିର ହେବା ପରେ ସୁଖୱିନ୍ଦର ସିଂ ସୁଖୁ ଗାନ୍ଧୀ ପରିବାରକୁ କୃତଜ୍ଞତା ଜଣାଇଛନ୍ତି।

ହିମାଚଳ ପ୍ରଦେଶର ନୂଆ ମୁଖ୍ୟମନ୍ତ୍ରୀ ହେବାକୁ ଯାଉଥିବା ସୁଖବିନ୍ଦର ସିଂହ ସୁଖୁ ଗାନ୍ଧୀ ପରିବାରର ବିଶ୍ୱସ୍ତ ବୋଲି କୁହାଯାଉଛି । ସେ ଦୀର୍ଘ ସମୟ ଧରି ହିମାଚଳ କଂଗ୍ରେସରେ ସକ୍ରିୟ ଅଛନ୍ତି। ସେ ଦଳର ରାଜ୍ୟ ସଭାପତି ଭାବରେ ମଧ୍ୟ ଦାୟିତ୍ବ ତୁଲାଇଛନ୍ତି । ସୂଚନାଯୋଗ୍ୟ ଶିମଲା ମହାନଗର ନିଗମରେ ମଧ୍ୟ ​​ସୁଖୁ ମେୟର ଭାବେ କାର୍ଯ୍ୟ କରିଥିଲେ। ୨୦୦୩ ମସିହାରେ ସେ ପ୍ରଥମ ଥର ପାଇଁ ବିଧାୟକ ଭାବେ ​​ଜିତିଥିଲେ।