ସୁପ୍ରିମକୋର୍ଟଙ୍କ ଗୁରୁତ୍ବପୂର୍ଣ୍ଣ ରାୟ: ସବୁ ମହିଳାଙ୍କ ଅଛି ଗର୍ଭପାତର ଅଧିକାର

ନୂଆଦିଲ୍ଲୀ: ମହିଳାଙ୍କ ଗର୍ଭପାତ ଅଧିକାର ସମ୍ପର୍କରେ ସୁପ୍ରିମକୋର୍ଟ ଗୁରୁବାର ଏକ ଗୁରୁତ୍ବପୂର୍ଣ୍ଣ ରାୟ ଦେଇଛନ୍ତି । ସମସ୍ତ ମହିଳାଙ୍କ ସୁରକ୍ଷିତ ଏବଂ ଆଇନଗତ ଗର୍ଭପାତ କରିବାର ଅଧିକାର ରହିଛି ବୋଲି କୋର୍ଟ କହିଛନ୍ତି । ଗର୍ଭବତୀ ହେବାର ୨୪ ସପ୍ତାହ ମଧ୍ୟରେ ଅବିବାହିତା ମହିଳା ବି ଗର୍ଭପାତ କରିପାରିବେ ବୋଲି ସୁପ୍ରିମକୋର୍ଟ କହିଛନ୍ତି । ଗର୍ଭପାତ ନେଇ ବିବାହିତ ଓ ଅବିବାହିତ ମହିଳାଙ୍କ ମଧ୍ୟରେ ପାର୍ଥକ୍ୟ ସୃଷ୍ଟି କରିବା ଅସାମ୍ବିଧାନିକ ବୋଲି ସର୍ବୋଚ୍ଚ ନ୍ୟାୟାଳୟ କହିଛନ୍ତି।

କୋର୍ଟ କହିଛନ୍ତି ଯେ ମେଡିକାଲ ଟର୍ମିନେସନ୍ ପ୍ରେଗ୍ନାନ୍ସି (ଏମଟିପି ଆଇନ) ଅନୁଯାୟୀ, ଗର୍ଭବତୀ ହେବାର ୨୪ ସପ୍ତାହ ମଧ୍ୟରେ ଅବିବାହିତା ମହିଳା ଗର୍ଭପାତ କରିପାରିବେ। ଅବିବାହିତା ମହିଳାଙ୍କ କ୍ଷେତ୍ରରେ ଗର୍ଭପାତ ସମ୍ପର୍କିତ ଏକ ମାମଲାର ଶୁଣାଣି କରି ସର୍ବୋଚ୍ଚ ନ୍ୟାୟାଳୟ ଏହି ରାୟ ପ୍ରଦାନ କରିଛନ୍ତି । ବର୍ତ୍ତମାନ ପର୍ଯ୍ୟନ୍ତ କେବଳ ବିବାହିତ ମହିଳାମାନଙ୍କୁ ୨୦ ସପ୍ତାହରୁ ଅଧିକ ଏବଂ ୨୪ ସପ୍ତାହରୁ କମ୍ ଭ୍ରୂଣର ଗର୍ଭପାତ କରିବାର ଅଧିକାର ମିଳୁଥିଲା।

ଏହି ମାମଲାର ଶୁଣାଣି ସମୟରେ ଜଷ୍ଟିସ୍ ଡିଓ୍ବାଇ ଚନ୍ଦ୍ରଚୂଡ କହିଛନ୍ତି ଯେ ସମାଜରେ ପରିବର୍ତ୍ତନ ହେବା ସହିତ ସମାଜର ନିୟମ ମଧ୍ୟ ବଦଳିଥାଏ । ତେଣୁ ଆଇନ ଅପରିବର୍ତ୍ତିତ ରହିବା ଠିକ୍ ନୁହେଁ ।

“ଅସୁରକ୍ଷିତ ଗର୍ଭପାତ ରୋକାଯାଇ ପାରିବ। ମାନସିକ ସ୍ୱାସ୍ଥ୍ୟ ବିଷୟରେ ଆମକୁ ଅଧିକ ଧ୍ୟାନ ଦେବା ଆବଶ୍ୟକ | ଗର୍ଭବତୀ ମହିଳାଙ୍କ ପରିବେଶ ପ୍ରତି ଧ୍ୟାନ ଦେବା ଜରୁରୀ | ବିବାହିତ ମହିଳାମାନେ ମଧ୍ୟ ସ୍ୱାମୀଙ୍କ ବାଧ୍ୟବାଧକତା ଏବଂ ବଳାତ୍କାରର ଶିକାର ହୋଇପାରନ୍ତି।

ଜଷ୍ଟିସ୍ ଡିଓ୍ବାଇ ଚନ୍ଦ୍ରଚୂଡ କହିଛନ୍ତି, “ ଯେକୌଣସି ମହିଳା ସ୍ୱାମୀଙ୍କ ଦ୍ୱାରା ବିନା ସହମତିରେ ସେକ୍ସ ଦ୍ୱାରା ମଧ୍ୟ ଗର୍ଭବତୀ ହୋଇପାରନ୍ତି | ବିବାହ କାହାର ଅଧିକାରର ଆଧାର ହେବା ଉଚିତ୍ ନୁହେଁ | ଯଦିବା ଜଣେ ମହିଳା ବିବାହିତ ନୁହଁନ୍ତି, ତାଙ୍କ ଗର୍ଭପାତ ଅଧିକାର ଛଡ଼ାଇ ନେବାର କୌଣସି ଯଥାର୍ଥତା ନାହିଁ ।