ନୂଆଦିଲ୍ଲୀ: ଏୟାର ଇଣ୍ଡିଆକୁ କେନ୍ଦ୍ର ସରକାର ଗୁରୁବାର ଟାଟା ଗ୍ରୁପକୁ ଆନୁଷ୍ଠାନିକ ଭାବେ ହସ୍ତାନ୍ତର କରିଛନ୍ତି । ଅଧିଗ୍ରହଣ ପ୍ରକ୍ରିୟା ଶେଷ ହେବା ପରେ ଏବଂ ସରକାରଙ୍କୁ ପୂର୍ଣ୍ଣ ରାଶି ପୈଠ କଲାପରେ ଏୟାର ଇଣ୍ଡିଆର ମାଲିକାନା ହାସଲ କରିଛି ଟାଟା ଗ୍ରୁପ୍ । ଟାଟା ସନ୍ସ ଚେୟାରମ୍ୟାନ୍ ଏନ୍. ଚନ୍ଦ୍ରଶେଖରନ କହିଛନ୍ତି ଯେ ଏୟାର ଇଣ୍ଡିଆକୁ ଫେରି ପାଇ ଆମେ ବହୁତ ଖୁସି। ଏହାକୁ ଏକ ବିଶ୍ୱ ସ୍ତରୀୟ ଏୟାରଲାଇନରେ ପରିଣତ କରିବାକୁ ଆମେ ପ୍ରତିଶ୍ରୁତିବଦ୍ଧ | ଔପଚାରିକ ହସ୍ତାନ୍ତର ପୂର୍ବରୁ ଚନ୍ଦ୍ରଶେଖରନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଧ୍ୟ ଭେଟିଥିଲେ।
ଗତ ବର୍ଷ ଅକ୍ଟୋବରରେ ସରକାର ଏୟାର ଇଣ୍ଡିଆର ବିକ୍ରୟ ପାଇଁ ଟାଟା ଗ୍ରୁପ୍ ସହିତ ୧୮,୦୦୦ କୋଟି ଟଙ୍କାରେ ସେୟାର କ୍ରୟ ଚୁକ୍ତି କରିଥିଲେ। ଏହି ଚୁକ୍ତିରେ ଏୟାର ଇଣ୍ଡିଆ ଏକ୍ସପ୍ରେସ ଏବଂ ଏହାର ସହକାରୀ କମ୍ପାନୀ ଏଆଇଏସଟିଏସ୍ ବିକ୍ରି ମଧ୍ୟ ଅନ୍ତର୍ଭୁକ୍ତ |
ହସ୍ତାନ୍ତର ପ୍ରକ୍ରିୟା ପୂର୍ବରୁ ବିନିବେଶ ଏବଂ ସାଧାରଣ ସମ୍ପତ୍ତି ପରିଚାଳନା ବିଭାଗ (ଡିଆଇପିଏଏମ୍) ଜାନୁଆରୀ ୨୪ରେ ଏୟାର ଇଣ୍ଡିଆର ଲିମିଟେଡ୍ ଏବଂ ଏଆଇ ଆସେଟ୍ ହୋଲ୍ଡିଂ ଲିମିଟେଡ୍ (ଏଆଇଏଏଚ୍ଏଲ୍) ମଧ୍ୟରେ ହୋଇଥିବା ଚୁକ୍ତିନାମାର ରୂପରେଖ ସମ୍ପର୍କରେ ସୂଚିତ କରିଥିଲେ | ଏୟାର ଇଣ୍ଡିଆ ଗ୍ରୁପର ଋଣ ଏବଂ ଅଣପ୍ରମୁଖ ସମ୍ପତ୍ତି ରଖିବା ପାଇଁ ସରକାର ୨୦୧୯ରେ ଏଆଇଏଏଚ୍ଏଲ୍ ପ୍ରତିଷ୍ଠା କରିଥିଲେ |
Comments are closed.