ଏହି ଷ୍ଟାର୍ ଖେଳାଳି ହେବେ ଭାରତର ନୂଆ ଟେଷ୍ଟ ଅଧିନାୟକ, ଦିନିକିଆ ସିରିଜ୍ ପରେ ବିସିସିଆଇ କରିବ ଘୋଷଣା

ନୂଆଦିଲ୍ଲୀ: ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜରେ ଭାରତର ୧-୨ ପରାଜୟ ପରେ ବିରାଟ କୋହଲି ଟେଷ୍ଟ ଅଧିନାୟକ ପଦ ଛାଡ଼ିଦେଇଛନ୍ତି । ଏବେ ବଡ଼ ପ୍ରଶ୍ନ ହେଉଛି କୋହଲିଙ୍କ ସ୍ଥାନରେ କାହାକୁ ଟେଷ୍ଟ ଦଳର ନେତୃତ୍ବ ଦିଆଯିବ । ଏହି ପ୍ରଶ୍ନର ଉତ୍ତର ଊଣା ଅଧିକେ ସ୍ପଷ୍ଟ ହେବାରେ ଲାଗିଛି । ଭାରତର ସୀମିତ ଓଭର ଅଧିନାୟକ ରୋହିତ ଶର୍ମାଙ୍କୁ ହିଁ ଟେଷ୍ଟ ଦଳର ନେତୃତ୍ବ ହସ୍ତାନ୍ତର କରାଯାଇପାରେ। ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜ୍ ପରେ ବିସିସିଆଇ ଏନେଇ ଆନୁଷ୍ଠାନିକ ଘୋଷଣା କରିବା ସମ୍ଭାବନା ରହିଛି ।

ବିସିସିଆଇର ଜଣେ ଅଧିକାରୀ କହିଛନ୍ତି, ‘ରୋହିତ ଶର୍ମାଙ୍କୁ ଭାରତର ନୂଆ ଟେଷ୍ଟ ଅଧିନାୟକ କରାଯିବ, ଏଥିରେ କ କୌଣସି ସନ୍ଦେହ ନାହିଁ। ଦକ୍ଷିଣ ଆଫ୍ରିକା ଗସ୍ତ ପୂର୍ବରୁ ରୋହିତ ଶର୍ମାଙ୍କୁ ଟେଷ୍ଟ ଦଳର ଉପ-ଅଧିନାୟକ କରାଯାଇଥିଲା, ତେଣୁ ସେ ଅଧିନାୟକ ହେବାକୁ ଯାଉଛନ୍ତି। ଏହି ଘୋଷଣା ଶୀଘ୍ର କରାଯିବ | ରୋହିତଙ୍କ ଉପରେ ଅନେକ କାର୍ଯ୍ୟ ଭାର ରହିବ, ତାଙ୍କୁ ନିଜକୁ ବହୁତ ଫିଟ୍ ରଖିବାକୁ ପଡିବ | ମୁଁ ଭାବୁଛି ଚୟନକର୍ତ୍ତାମାନେ ତାଙ୍କ ସହିତ କଥା ହୋଇଥିବେ ନିଶ୍ଚୟ | ତାଙ୍କୁ ତାଙ୍କ ଫିଟନେସ୍ ଉପରେ ଅତିରିକ୍ତ କଠିନ ପରିଶ୍ରମ କରିବାକୁ ପଡିବ |

ଶ୍ରୀଲଙ୍କା ବିପକ୍ଷରେ ଘରୋଇ ଟେଷ୍ଟ ସିରିଜରୁ ରୋହିତ ଶର୍ମା ପୂର୍ଣ୍ଣକାଳୀନ ଟେଷ୍ଟ ଅଧିନାୟକ ଭାବେ ଦାୟିତ୍ଵ ଗ୍ରହଣ କରିପାରନ୍ତି। ଏଥି ସହିତ ବିସିସିଆଇ କେଏଲ ରାହୁଲ ଏବଂ ରିଷଭ ପନ୍ତଙ୍କୁ ଭବିଷ୍ୟତର ଅଧିନାୟକ ଭାବରେ ପ୍ରସ୍ତୁତ କରିବାକୁ ଚାହୁଁଛି। ଏହି ଦୁଇଜଣଙ୍କ ମଧ୍ୟରୁ କାହାକୁ ଉପ-ଅଧିନାୟକ କରାଯିବ ତାହା ଏପର୍ଯ୍ୟନ୍ତ ସ୍ଥିର ହୋଇନାହିଁ। ବିସିସିଆଇ ଅଧିକାରୀ ଜଣକ କହିଛନ୍ତି, “ଉପ-ଅଧିନାୟକ ଯିଏ ହେବେ ସିଏ ଟିମ୍ ଇଣ୍ଡିଆର ଭବିଷ୍ୟତର ଲିଡର୍ ମଧ୍ୟ ହେବେ । କେ.ଏଲ୍ ରାହୁଲ, ରିଷଭ ପନ୍ତ ଏବଂ ଯସପ୍ରୀତ ବୁମ୍ରା ସବୁ ଭବିଷ୍ୟତର ଅଧିନାୟକ ବୋଲି ସେ କହିଛନ୍ତି ।