ନୂଆଦିଲ୍ଲୀ – ଦେଶରେ କରୋନା ସଂକ୍ରମଣ ନିୟନ୍ତ୍ରଣ ବାହାରକୁ ଚାଲିଯାଇଥିବା ବେଳେ ଆଜି ସୁପ୍ରିମକୋର୍ଟରେ ଏକ ଜନସ୍ୱାର୍ଥ ମାମଲା ଦାଏର କରାଯାଇ ୧୮ ବର୍ଷରୁ ଉର୍ଦ୍ଧ୍ଵ ବୟସ୍କ ଲୋକଙ୍କ ବି ଟିକାକରଣ କରିବାକୁ ଦାବି କରାଯାଇଛି। ପୂର୍ବରୁ ବହୁ ରାଜନୈତିକ ଦଳ ମଧ୍ୟ ଟିକାକରଣ ପାଇଁ ବୟସ ସୀମା ହ୍ରାସ କରିବାକୁ ଦାବି କରିଛନ୍ତି।
ଆଇନଜୀବୀ ରଶ୍ମୀ ସିଂ ଏହି ଆବେଦନ ସୁପ୍ରିମକୋର୍ଟରେ ଦାଏର କରିଛନ୍ତି। ଆବେଦନରେ ଦର୍ଶାଯାଇଛି ଯେ କରୋନାର ଦ୍ୱିତୀୟ ଲହରୀକୁ ନିୟନ୍ତ୍ରଣ କରିବା ପାଇଁ ସମସ୍ତ ଯୁବକ ଏବଂ ଚାକିରିଆ ଲୋକଙ୍କ ବ୍ୟାପକ ଟିକାକରଣ ଆବଶ୍ୟକ। ଏହି ଆବେଦନରେ ଯୁକ୍ତି କରାଯାଇଛି ଯେ ଟିକାର ଦୁଇ ଡୋଜ ମଧ୍ୟରେ ଛଅରୁ ଆଠ ସପ୍ତାହ ବ୍ୟବଧାନ ରହୁଥିବାରୁ ୧୮ ବର୍ଷ କିମ୍ବା ତା’ଠାରୁ ଅଧିକ ବୟସର ଲୋକଙ୍କ ପାଖରେ ଟିକା ପହଞ୍ଚିବା ବେଳକୁ କରୋନା ସଂକ୍ରମଣ ଆହୁରି ତୀବ୍ରତର ହୋଇଯାଇଥିବ ଏବଂ ଅବସ୍ଥା ଅତ୍ୟନ୍ତ ଖରାପ ହୋଇଯିବ।
ଏହି ଆବେଦନରେ କୁହାଯାଇଛି ଯେ ଭାରତୀୟ ମେଡିକାଲ୍ ଆସୋସିଏସନ୍ (ଆଇଏମ୍ଏ) ସମେତ ଅନେକ ବିଶେଷଜ୍ଞ କରୋନା ଟିକାକରଣକୁ ବ୍ୟାପକ କରିବାକୁ ଦାବି କରିଛନ୍ତି। କିଛି ବିଶେଷଜ୍ଞ ମତ ଦେଇଛନ୍ତି ଯେ ପରିସ୍ଥିତିର ମୁକାବିଲା ପାଇଁ ଭାରତ ପ୍ରତିଦିନ ଅତି କମରେ ୧୦ ନିୟୁତ ଡୋଜ ଲଗାଯିବା ଆବଶ୍ୟକ।
ଏହାପୂର୍ବରୁ ମହାରାଷ୍ଟ୍ରରେ କରୋନାଙ୍କ ଭୟଙ୍କର ଗତିକୁ ଦୃଷ୍ଟିରେ ରଖି ଶିବସେନା ସାଂସଦ ପ୍ରିୟଙ୍କା ଚତୁର୍ବେଦୀ ୧୮ ବର୍ଷରୁ ଉର୍ଦ୍ଧ୍ଵ ଲୋକଙ୍କ ଟିକାକରଣ ପାଇଁ ଦାବି କରିଥିଲେ। ଏହି ପରିପ୍ରେକ୍ଷୀରେ ସେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷ ବର୍ଦ୍ଧନଙ୍କୁ ଏକ ଚିଠି ଲେଖିଥିଲେ ।
Comments are closed.