ଗୋବର ଦ୍ବାରା କରୋନା ଭଲ ହେବ ନାହିଁ କହିବାରୁ ଦେଶଦ୍ରୋହ ଆଇନରେ ଗିରଫ ହୋଇଥିଲେ, ତୁରନ୍ତ ମୁକ୍ତ କରିବାକୁ ନିର୍ଦ୍ଦେଶ ଦେଲେ ସୁପ୍ରିମକୋର୍ଟ

ନୂଆଦିଲ୍ଲୀ: ଦେଶଦ୍ରୋହ ଆଇନ ଅଧୀନରେ ଗିରଫ ମାମଲାରେ ସୋମବାର ସୁପ୍ରିମକୋର୍ଟ ଏକ ବଡ ନିଷ୍ପତ୍ତି ନେଇଛନ୍ତି। ଆଜି ଅପରାହ୍ନ ୫ଟା ସୁଦ୍ଧା ମଣିପୁରର ରାଜନୈତକ କର୍ମୀ ଏରେଣ୍ଡ୍ରୋ ଲିଚୋମ୍ବୋମଙ୍କୁ ମୁକ୍ତ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ତାଙ୍କ ଫେସବୁକ ପୋଷ୍ଟ ପରେ ଏରେଣ୍ଡ୍ରୋଙ୍କୁ ଗିରଫ କରାଯାଇଥିଲା । ଏରେଣ୍ଡ୍ରୋ ଫେସବୁକ୍ ପୋଷ୍ଟରେ କହିଥିଲେ ଯେ ଗୋମୂତ୍ର ଓ ଗୋବର ଦ୍ବାରା କରୋନା ଭଲ ହୋଇପାରିବ ନାହିଁ।

ସଲିସିଟର ଜେନେରାଲ ତୁଷାର ମେହେଟ୍ଟା ଏହି ମାମଲାର ଶୁଣାଣି ମଙ୍ଗଳବାର ପର୍ଯ୍ୟନ୍ତ ସ୍ଥଗିତ ରଖାଯାଉ ବୋଲି ଯୁକ୍ତି କରିଥିଲେ, କିନ୍ତୁ କୋର୍ଟ ତୁରନ୍ତ ଲିଚୋମ୍ବୋମଙ୍କୁ ମୁକ୍ତ କରିବାକୁ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ୍ ଡିଏ ଚନ୍ଦ୍ରଚୂଡ ଏବଂ ଏମଆର ଶାହାଙ୍କ ଏକ ଖଣ୍ଡପୀଠ କହିଛନ୍ତି ଯେ ଆବେଦନକାରୀଙ୍କୁ ଅଧିକ ଦିନ ଜେଲରେ ରଖିବା ବ୍ୟକ୍ତିଗତ ଏବଂ ସ୍ୱାଧୀନତା ଅଧିକାରର ଉଲ୍ଲଂଘନ ହେବ। ଆଜି ଅପରାହ୍ନ ୫ଟା ସୁଦ୍ଧା ୧୦୦୦ ଟଙ୍କା ବ୍ୟକ୍ତିଗତ ମୁଚାଲିକାରେ ଆମେ ସେମାନଙ୍କ ମୁକ୍ତି ପାଇଁ ଆଦେଶ ଦେଉଛୁ |

ଏରେଣ୍ଡ୍ରୋଙ୍କୁ ମୁକ୍ତ କରିବା ପାଇଁ ତାଙ୍କ ପିତା ସୁପ୍ରିମକୋର୍ଟରେ ଆବେଦନ କରିଥିଲେ। ସାମ୍ବାଦିକ କିଶୋରଚନ୍ଦ୍ର ୱାଙ୍ଗକେମଙ୍କ ସହ ତତ୍କାଳୀନ ରାଜ୍ୟ ବିଜେପି ସଭାପତି ସାଇଖୋମ ଟିକେନ୍ଦ୍ର ସିଂଙ୍କ ମୃତ୍ୟୁ ସମ୍ପର୍କରେ ମନ୍ତବ୍ୟ ଦେଇ ଏରେଣ୍ଡ୍ରୋ ଗିରଫ ହୋଇଥିଲେ। ମଣିପୁର ବିଜେପି ଉପାଧ୍ୟକ୍ଷ ଉଶାମ ଦେବାନ୍ ଏବଂ ସାଧାରଣ ସମ୍ପାଦକ ପି ପ୍ରେମାନନ୍ଦ ମିଟେଇ ତାଙ୍କ ବିରୋଧରେ ଥାନାରେ ଅଭିଯୋଗ ଦେଇଥିଲେ। ସେମାନେ ଏରେଣ୍ଡ୍ରୋଙ୍କ ପୋଷ୍ଟକୁ ଆପତ୍ତିଜନକ ବୋଲି କହିଥିଲେ।