ଚାଷୀ ଆନ୍ଦୋଳନକୁ ବିଜେନ୍ଦରଙ୍କ ସମର୍ଥନ: କୃଷି ଆଇନ ପ୍ରତ୍ୟାହାର ନ କଲେ ଖେଳରତ୍ନ ପୁରସ୍କାର ଫେରାଇବାକୁ ଚେତାବନୀ

ନୂଆଦିଲ୍ଲୀ – ଅଲିମ୍ପିକ୍ ପଦକ ବିଜେତା ବକ୍ସର ବିଜେନ୍ଦର ସିଂ ଚାଷୀଙ୍କ ଆନ୍ଦୋଳନକୁ ଖୋଲାଖୋଲି ସମର୍ଥନ କରିଛନ୍ତି। ରବିବାର ଦିଲ୍ଲୀର ସିଙ୍ଗୁ ସୀମାରେ ପହଞ୍ଚି ବିରୋଧୀ ଚାଷୀଙ୍କ ସହ କଥା ହୋଇଥିଲେ। ସରକାରଙ୍କୁ ଖୋଲା ଚେତାବନୀ ଦେଇ ବିଜେନ୍ଦର କହିଛନ୍ତି ଯେ ଯଦି ସରକାର ତିନୋଟି କୃଷି ଆଇନ ପ୍ରତ୍ୟାହାର ନ କରନ୍ତି, ତେବେ ସେ ଦେଶର ସର୍ବୋଚ୍ଚ କ୍ରୀଡ଼ା ପୁରସ୍କାର ଫେରାଇବେ। ବିଜେନ୍ଦର ରାଜୀବ ଗାନ୍ଧୀ ଖେଳରତ୍ନ ପୁରସ୍କାର ପାଇଛନ୍ତି। ସେ କଂଗ୍ରେସ ଟିକେଟରେ ଦକ୍ଷିଣ ଦିଲ୍ଲୀରୁ ୨୦୧୯ ଲୋକସଭା ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିଥିଲେ ମଧ୍ୟ ହାରି ଯାଇଥିଲେ। ତିନୋଟି ଯାକ କୃଷି ଆଇନକୁ ସମ୍ପୂର୍ଣ୍ଣ ପ୍ରତ୍ୟାହାର କରିବା ହେଉଛି ଆନ୍ଦୋଳନରତ ଚାଷୀଙ୍କ ମୁଖ୍ୟ ଦାବି । ବିଜେନ୍ଦରଙ୍କ ପୂର୍ବରୁ ପଞ୍ଜାବ-ହରିୟାଣାର ଅନେକ ଆଥଲେଟ୍ ଚାଷୀଙ୍କ ସମର୍ଥନରେ ପଦ୍ମଶ୍ରୀ ଓ ଅର୍ଜ୍ଜୁନ ପୁରସ୍କାର ଫେରାଇବାକୁ ନିଷ୍ପତ୍ତି ନେଇଛନ୍ତି ।

ଡିସେମ୍ବର ୮ ରେ କୃଷକ ସଂଗଠନ ଆହ୍ବାନ କ୍ରମେ ଭାରତ ବନ୍ଦକୁ ବିଜେନ୍ଦରଙ୍କ ଦଳ କଂଗ୍ରେସ ସମର୍ଥନ କରିଛି। ଏହି ଦିନ ସେ ଚାଷୀଙ୍କ ଦାବିକୁ ସମର୍ଥନ କରି ସମସ୍ତ ଜିଲ୍ଲା ଓ ରାଜ୍ୟ ମୁଖ୍ୟାଳୟରେ ପ୍ରଦର୍ଶନ କରିବେ ବୋଲି କହିଛନ୍ତି ।