କ୍ରିକେଟର ହରଭଜନ ସିଂଙ୍କ ସହ ପାଞ୍ଚ ଜଣ ପ୍ରାର୍ଥୀଙ୍କୁ ରାଜ୍ୟସଭା ପାଇଁ ମନୋନୀତ କଲା ଆପ୍

ନୂଆଦିଲ୍ଲୀ: ପଞ୍ଜାବରୁ ରାଜ୍ୟସଭା ପାଇଁ ଆମ୍ ଆଦମୀ ପାର୍ଟି(ଆପ୍) ପାଞ୍ଚ ଜଣ ପ୍ରାର୍ଥୀଙ୍କ ନାମ ଘୋଷଣା କରିଛି । ଏମାନଙ୍କ ମଧ୍ୟରେ ପୂର୍ବତନ କ୍ରିକେଟର ହରଭଜନ ସିଂ, ଲଭଲି ପ୍ରଫେସନାଲ ୟୁନିଭରସିଟି (ଏଲପିୟୁ)ର କୁଳପତି ଅଶୋକ ମିତ୍ତଲ, ଦଳର ପଞ୍ଜାବ ସହପ୍ରଭାରୀ ତଥା ଦିଲ୍ଲୀ ବିଧାୟକ ରାଘବ ଚଢା, ସଞ୍ଜୀବ ଆରୋରା ଏବଂ ଦିଲ୍ଲୀ ଆଇଆଇଟି ପ୍ରଫେସର ଡକ୍ଟର ସନ୍ଦୀପ ପାଠକ ଅଛନ୍ତି।

୩୩ ବର୍ଷୀୟ ରାଘବ ଚଢା ରାଜ୍ୟସଭା ସଦସ୍ୟ ହେବା ନିଶ୍ଚିତ। ଯଦି ଏପରି ହୁଏ ତେବେ ଚଢା ଦେଶର ସର୍ବ କନିଷ୍ଠ ରାଜ୍ୟସଭା ସଦସ୍ୟ ହେବେ। ଅନ୍ୟପକ୍ଷରେ, ଦିଲ୍ଲୀରେ ୨୦୨୦ ଦିଲ୍ଲୀ ନିର୍ବାଚନ ​​ଏବଂ ପରେ ସଦ୍ୟ ସମାପ୍ତ ପଞ୍ଜାବ ବିଧାନସଭା ନିର୍ବାଚନରେ ​​ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବାରୁ ପାଠକଙ୍କୁ ରାଜ୍ୟସଭା ସିଟ୍ ସହ ପୁରସ୍କୃତ କରାଯାଇଛି। ସନ୍ଦୀପ ପାଠକଙ୍କ କାର୍ଯ୍ୟକୁ ଅରବିନ୍ଦ କେଜ୍ରିୱାଲ ମଧ୍ୟ ପ୍ରଶଂସା କରିଥିଲେ।

କ୍ରିକେଟର ହରଭଜନ ସିଂ ଜଲନ୍ଧରର ବାସିନ୍ଦା ଏବଂ ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନଙ୍କର ଘନିଷ୍ଠ ବୋଲି କୁହାଯାଉଛି | ମାନ ତାଙ୍କୁ ସ୍ପୋର୍ଟସ୍ ୟୁନିଭରସିଟିର ଦାୟିତ୍ବ ହସ୍ତାନ୍ତର କରିପାରନ୍ତି | ଆଜି ନାମାଙ୍କନ ପତ୍ର ଦାଖଲର ଶେଷ ଦିନ | ମାର୍ଚ୍ଚ ୩୧ରେ ରାଜ୍ୟସଭା ନିର୍ବାଚନ ଅନୁଷ୍ଠିତ ହେବ |

ବିରୋଧୀ ଆମ୍ ଆଦମୀ ପାର୍ଟିର ପ୍ରାର୍ଥୀଙ୍କୁ ନେଇ ଆପତ୍ତି ଉଠାଇଛନ୍ତି। ସେମାନେ ଅଭିଯୋଗ କରିଛନ୍ତି ଯେ ଆପ୍ ପଞ୍ଜାବ ବାହାର ଲୋକଙ୍କୁ ରାଜ୍ୟସଭା ପ୍ରାର୍ଥୀ ଭାବେ ମନୋନୀତ କରିଛି । ଆପ୍ ରୁ କଂଗ୍ରେସକୁ ଯାଇଥିବା ବିଧାୟକ ସୁଖପାଲ ଖୈରା କହିଛନ୍ତି ଯେ ପଞ୍ଜାବ ପାଇଁ ସ୍ୱର ଉଠାଇବା ପାଇଁ କେବଳ ପଞ୍ଜାବୀ ମାନଙ୍କୁ ରାଜ୍ୟସଭାକୁ ପଠାଯିବା ଉଚିତ। ଅକାଳି ଦଳର ମୁଖପାତ୍ର ହରଚରନ୍ ସିଂ ବେନ୍ସ ମଧ୍ୟ ଆପ୍ ର କିଛି ରାଜ୍ୟସଭା ପ୍ରାର୍ଥୀଙ୍କୁ ବିରୋଧ କରିଛନ୍ତି।